Hmailam caan hrang Timtuahnak (sim tu Rev. Fr. Peter Zin)

“Hmailam Caan hrang Timtuahnak”

Thuthangtha sim tu Rev. Fr. Peter Zin

November 6, 2020.

Siarding: Filipi 3:17-4:1; Saam 122:1-5; Luka 16:1-8.

Duhdawtmi nu le pa, u le nau pawl, nan dam cio maw? Pathian pekmi thluasuah: harhdamnak, lungawinak le daihnak pawl cu nan zate hnenah um ringring hram seh. Tuni November 6, 2020 (Tlawngkai ninga) ni ih kan siar dingmi Bible pawl thawn pehpar in ‘Hmailam caan hrang timtuahnak’ timi thulu thawn thlarau thazang kan lak tlang ding in ka lo sawm. Kan siar dingmi Bible pawl cu Filipi 3:17-4:1 tiang, Saam 122:1-5 tiang le Gospel cu Luka 16:1-8 tiang pawl an si. 

Leitlun kan nun sung hrangah siseh, kan thih hnu tiang hrang khal ah siseh hmailam kan tik cu caan hrangah timtuahnak hi kan nei ṭul ringring mi a si. Matthai 6:34 ah Bawi Jesuh in ‘thaisun hrangah donhar in um hlah uh; thaisun in dohharnak amah tawk in a nei ve ding. Ni, nikhat ih a phurhmi harsatnak tlunah a dang betcih ding a si lo,’ a ti. Asinan zianghman ruat lem lo in nuam huah ho in um men ding tiduhnak cu asilo ih thinphang, donhar in um lo ding tiduhnak sawn a si. thinhar le baidong lo tein kan hmailam caam hrang cu thu ruat kan ṭul, tim tuah kan ṭul a si. Tuni Gospel kan siarmi sungah milian zet pa pakhat ih thilri kikhawitu pa in a hnaṭuannak in dawi suak a si hlan ah hmai lam caan ah ziangtin ka nung ding timi a timtuah awnak thu Bawi Jesuh in a simmi thu kan hmu thei asi. A thu hla te kan mit thlam ah a lang sal theinak ding ah kan ngai tlang ta hrih pei. 

Luka 16:1-8

1Jesuh in a dungthluntu pawl hnenah, “Veikhat ah milian zet pakhat a um ih a thilri kilkhawitu dingah siahhlawh pakhat a nei. Cuih a siahhlawh pa cun na tangka a thehvorh a si, tiah a bawipa cu an sim. 2Cuhrangah a hnenah a ko ih ‘Na thu ka theihmi hi ziangtinso a si? Ka thilri na kilnak cazin kim tein i pe aw; ziangahtile ka thilri kilkhawitu na si thei nawn lo ding,’ tiah a ti. 3Cutikah a siahhlawh pa cun ‘Ka bawipa in ka hnaṭuan ihsin i dawi tum a si hi! Ziangso ka tuah pei? Leilung lai ding le ka ti thei lo; mi thil dil ih um ding le ka ning a zak fawn. 4Asinan thil pakhat tuah ding ka thei! Ka hnaṭuan a cem tikah an inn ih i umter siangtu rualpi ṭha ka neih a ṭul ding,’ tiah a thinlung in a ruat. 

5Cuhrangah a bawipa hnenih leiba a neitu hmuahhmuah a ko khawm. Pakhatnak pa cu ‘Ziangzatso ka bawipa na baak?’ tiah a sut. 6Anih in ‘Olif hriak pung zakhat,’ tiah a let. Thilri kilkhawitu pa cun ‘Hihi na cazin a si ding: To awla pung sawmnga, tiah ngan aw,’ tiah a ti. 7Cule a dang pakhat pa cu, ‘Nangteh ziangzatso na baak?’ tiah a sut. Anih in, ‘sangvut dip thawngkhat,’ tiah a let. Thilri kilkhawitu pa cun, ‘Hihi na cazin a si ding: Dip zariat, tiah ngan aw,’ tiah a ti. 

8Hi mihrokhrawl thilri kilkhawitu pa hi cubangtuk in fimvar zet ih thil ti a thiam ruangah a bawipa in a porh zet, ziangahtile hi leilungtlun mi pawl hi anmah ih thu tawlrelnak ahcun tleunak sungih a ummi pawl hnakin an fimvar sawn a si,” tiah a ti.

Himi a bawipa in a porhnak hi mihrokhrawl a sinak raungah si lo in hmailam caan ah ziangtin ka nung ding timi timtuahnak a nei ih hmailam caan hrangah a thuruatmi sawn ruangah a porh mi a si. Thilri kilkhawitu mihrokhrawl pa in a bawipa hnenih leiba a neitu pawl a ko khawm ih Olif hriak pung 100 a bak tu hnen ah pung 50 tin a ngan ter, sangvut dip 1000 a baktu hnen ah dip 800 tiah a ngan ter mi hi Bible thiam pawl, Bible thuanthu thei tu pawl in ziang an ti ti sile, thilri kilkhawi tu pa in a mah covo a si dingmi pawl lawng kha leiba cazin in a hnuk ter ih a Bawipa covo a hnuk ter mi a silo ti asi. Hmailam caan ah a mah a bawm sal tu ding rualpi a rak hawl cia nak a si. Curuangah a bawipa in thin heng lo in a rak porh sawn nak a si. Bawi Jesuh in ‘hi leilungtlun mi pawl hi anmah ih thu tawlrelnak ahcun tleunak sungih a ummi pawl hnakin an fimvar sawn a si,” tiah a ti tikah kan theithiam sual lo ding hi a thupi zet. Himi mihrokhrol pa cu leitlun hrang lawng ruat tu a si vek in leitlun ih a nun nak hrang lawng zoh ah cu a tawk zet a thiam zet kan ti pei. Asinan tleunak sungih a ummi pawl hrangah cu leitlun thilri ah silo in thlarau hrang sawnah fimvar ding kan si. Leitlun mi in leitlun hmailam an nunnak hrangah an fimver zet vek in tleunak sungih a ummi in hmailam kan nunnak hrang le kan thlarau hrang tiang ruat in fimvar zet in kan nung ding ah Bawipa in a duh asi. 

Hi mi hrokhrawl pa cun a hmailam a nunnak ding hrangah mi a bawm ih rualṭha a hawl cia, kan nih zumtu pawl in teh hmai lam kan nunnak hrangah ti ruat in mi va bawm ve ding kan si lo maw? Mi kan bawm mi, midang hrangih thilṭha kan tuah mi hmuahhmuah hi hmailam kan nunnak, kan taksa hrang ah siseh kan thlarau hrangah siseh timtuahnak kan tuah rero hi a si. Matthai 25 sungah kan hmu vek in minau ta bik par ih na tuah mi hmuahhmuah hi ka par ah na tuah a si tiah kan Bawipa in in ti leh ding asi. Sii-pua-yi a tuah tu pawl in investment tiin an ko ih a-miat ngah sal ding ti tumtah nak thawn pai-sa an bur khawm ṭheu. Keimah ih ka ruahnak ah cu midang va bawm hi investment tuah nak ah a ṭha bik tiin ka zum. Ziangruangah ti sile mi kan va bawmnak thawng in van thluasuah lawng si lo in leitlun rori khal ah kan ngah sal ringring asi. 

Veikhatnak Bible kan siar mi sungah St. Paul in leitlun thilri hranglawng ruat lo in vancung ram sawn ruat in nung ding in in forh asi. Vancung ih laksawng kan ngah dingmi ruat in hna kan ṭuan thei kan nung thei a si le cu Saam sung ih kan hmu mi ‘Bawipa ih inn ah feh u si in ti tikah ka lungawi’ a ti vek in kan nih khal kan lungawi ve ding asi. Leitlun mi mihrokhrawl pa in hmailam caan a nunnak hrang ruat in hna a ṭuan vek in kan nih zumtu, tleunak sungum mi pawl sinsin tla cu hmailam caan hrang ruat in hna ṭuan sinsin ding, midang a bawm tu kan si sinsin ding cu a ṭul zet mi le a ṭha zet mi a si. Vancung hrang ruat in mi kan bawm mi, thilṭha kan tuah mi pawl in kan thlarau le kan taksa hrang khal ah humhimnak in pek ding a si. Cu-asi-raungah midang va bawmnak thawn in hmailam caan hrang timtuahtu kan si theinak ding in zuam cio uh si. A net nak ah Bible ca tlang pakhat te kan ngai ta hrih pei. Matthai 6:33 nak, ‘Pathian Uknak le a felnak hawl hmaisa sawn uhla thil dang hmuahhmuah cu a lo pebet ding a si.

Fr. Peter Lal Zin Thang (Hakha Diocese)