Fimnak cu Ziang (sim tu Rev. Fr. Polycarp Thawngte)

Fimnak cu Ziang?

Zarhkel (32) nak Zarhpi-A

Thuthangtha sim tu Rev. Fr. Polycarp Thawngte

            Hmuntin le ramtin ihsin Falam RVA zilthli thiang a rak hawp theutu duhdawt Chrih ah unauza nan zate’n mah le um nak cio ah Bawipai zaangfahnak thawn dam in nan um cio ding ti ruahsan nak thawn cibai ka lo buk.  Tu laifang cu thinlung buaibik caan a hleice in American ram le Kawlram um pawl hrangah Covid-19 lakah pelhsolh theihlo mi rampi hrilawknak thawn kan buai cio ko ding.  Thinlung sa lakah Bawipai daihnak nan hnenah thleng hram seh ti’n thluasuah peknak thawn thla ka lo sak duh bet. Kan zate khal in khat le khat kan bawm aw ton kei uh tin ka lo sawm duh bet.  American ram ih buai culcinak vek pawl hi Kawlram ah thleng lo hram seh tin khal thla kan cam bet kei uh.  Ziangvek cozah a din khal le fimnak taktak thawn mipi in kai hruai theinak dingin, thindai te’n thlacamnak thawn siseh, kan ti thei daan dangdang in khal siseh kan bawm a tul ti sawn hi hngilhlo te’n zuam tlang uh si law. 

            Curuangah tuini kan siarmi Cathianghlim sungin lawrkham ih ruah tlang dingah fimnak thu ruahtlang ka duh.  Vei-1 nak kan siarmi Cathianghlim in fimnak cu ziangvek a si ti in sim ih Thuthang tha sungin miaa fala-5 le mifim fala-5 thu kan thei a si.  Fimnak neitu cu zovek an si ti ruat tlang ta sehla.  Nitin kan nundaan ih mifim, fimnak nei kan ti mi cu a hmaisa bik ah tlawngkai cathiam sang pawl in hmai an thi ding.  Hihi a tha zet mi a si ko.  Kan tlangval lai (brother) kan Thlarau lam hruaitu siangbawi-1 ih in suhdahmi thu hi tu tiang ka hngilh thei dah lo.  Ziang in ti tile, nan thlarau lam lam hmuhtu dingah Pathian thu zirnak lamih Degree sang zet zet ngah, cathiam mifim maw, mahte zuam ih zuam, mahte that ih tha, nun felfai zetih Pathian tihzah, mi menmen ha nan hril ding ti si. Tuan Ling Thang hla bangin “ka awlok na ti song” ti ding khop in hril thiam a har ih kan bangaw cuci lo tikah amah in neta bik ih in simmi cu: “Ziangkhalasile nan siatralnak ding duhtu a silo phot cun Cathiam mifim timi degree ngahtu sawn hi nan hril le a tha; ziangahtile amah a thlun theilo mi lamzin a si hman ah nan hrang thatnak a sizia thei in lamzin a lo sim ding; mahte zuamnak men ih feh rero mi kha cun amai hrang a that hman ah lamzin a lo sim theilo men ding” in rak ti dah.  Hihi leipar kan nundaan, kan kiang le kap kan zoh tikah a dik zet tin kan hmu thei ko ding.  Lamzin daan thuhla angantu khal lamzin ih cangsual pangtong in a thi; mi damhtu doctor khal in natnak thawn a thi ti vek khal kan ti theu.  Canganthiam tampi le thusim thiam tampi hi mi an that ter thei tlukin anmah cu a tha lo khal a si thei.  Kan hrang thatnak ih kan hman thiam le kan thansonak a si thei cun kanmah kha mifim kan si ve. 

            Asinan, leipar fimnak, tlawngkai cathiamnak hi tahfung ih kan hman cun a poinak tampi a um thei a si.  Leilung pumpuluk raltho tertu le buai tertu pawl khal cathiam mifim pawl an si thotho.  Cumi rel-lo Pathian thu zumnak lamih buainak suahtu, thentheknak tuahtu khal cathiam mifim pawl thotho an si.  Curuangah Sunday School ihsi thokin kan zir suahmi: Thufim 1:7, Ps 111:10, Pathian tihzah cu fimnak ih hramthawhnak a si timi hi kan nun ih kan zir a tul nasa.  Acuih Pathian tihzah timi hmanah kan dungte ah Rih lam ihsin Pathian ih fial tiih mithat thuthang tivek siseh, Pathian ih simmi ti-ih profet vekin thu phuang ta hrat ah “CNLD me pe lo ih, Kawl party me petu hmuahhmuah cu Hell an tla ding” ti vek men thuhla pawl tla FB rualpi pawl hnenin ka rak thei ngah ve.  Kha pawl cu lungmolh, mibanglo te an si tla si men thei nan, mifim ti aw mi sung rori khal in a cang theimi thil an si.  Tuini vei-1 nak Cathianghlim ih fimnak a timi hi Bawipa Zesuh a khihhmuh mi asi.  Nunnak sung, thinlung sungih Bawipa a sang taktak tu kan si ah cun, leipar fimthiamnak kan neihlo khal le Pathian tihzah hmuah ti cing ih mi cam siattu, Hell ih mi thla tumtu le mi siatsuahtu silo dingin thlarau fimnak in lam in hruai ding.  Curuangah kan nun ih Bawipa neitu kan si theinak dingin tuini Saamhla a sawn ih, “Aw Bawipa, ka thlarau in nangmah a lo hal” timi nitin ih kan sak thei ding hi a poimawh asi. 

            Thunet nakah tuini hi Caantluang Zarhkar (32) nak kan thleng zo ih tui hnu zarhhnih cun Biaknak kum cem ding thlang a si ruangah kan Thuthangtha in a tikcu le caan nan theilo ruangah ralring te’n um uh, tim tuah aw cia uh in ti.  Cuih tikcu le caan cu nang le kei hrangah Leilungpi cem le cem lo ding thu a silo.  Kan nunnak tikcu caan cemni a si.  November thla cu kan hlan ih a rak feh ciatu pawl hngilhlonak thla a si bangin cuih thihnak tikcu caan cu kan riah siatnak men si lo in kan hngahhlapmi famkim theinak ding asi zia Vei-2 nak Cathianghlim thawn thazaang thar kan lak tlang theinak dingin ziangkim titheitu Pathian, Pa le Fapa le Thiangthlarau in thuasuahnak in pe hram seh.