Zohthim tlak Samarih Nun (sim tu Rev. Fr. Pius Cung)

Zohthim tlak Samarih Nun

Thuthangtha sim tu Rev. Fr. Pius Cung

Siarding: Titas 3;1-7; Saam 23; Lk 17;11-19.

November 11, 2020.

            Duhdawtmi u le nau pawl, ruangpum, thinlung le thlarau ih damcahnak Pathian in lo pe hram seh. Leitlun boruak, harnak tampi lakah thuthangtha hlawmaw tlang thei dingih cantha in petu Bawipa a hmin sunglawi sin ko seh. Nov 11, tlawngkai ni 3 niih kan siardingmi cathianghlim pawl cu Titas 3;1-7/ Saam 23/ le Lk 17;11-19 pawl an si. Thuthangtha siarnak sungah Jesuh nih miphar 10 a dam ternak thu, pakhat te lawngin Jesuh hnenah lungawithu a ra simsal tile Cupa cu Samaria mi a si ti thu pawl kan thei. Himi thuhla sirhsan in “Zohthim tlak Samarih Nun” ti mi thu, hlawmawk tlang ding in ka hril. 

            Samaria mi pawl cu minung tisanak lam cun nautat hmuhsuamnak an tong rero ko nain thlarau lam le zumhnak lamah cun hmintha an ngah, lomh mi le zohthim tlak nun an nei theu a si. Nautat an tonnak san cu miphun dang a si mi Zentail mi pawl thawn cawkrawiaw ih umtlang, nungtlang, tthiaw tonmi an si. Cutikah Judah pawl cun, Pathian miphun thingte nan sinawn lo kahpia nan si tiah an nautat, ziangah an siar lo. Judah mi pawl cun miphundang thisen rawi lo kan si, Abraham ih tesinfa citte kan si an ti ih, uarawnak, uansuan awknak le hngalnak an nei.  Samaria mi pawl nih Jerusalem Biakinnpi feh nawnlo in an mai ramih Gerizim tlangpar ah Biakinn an sak tikah Judah pawl ih mitkemnak le huatnak an tong sinsin. Jesuh Bawipa cu Judah mi phun felfel a si ko nan, a mah co hlang lo tu, a mah el tu a mai miphunpi pawl hnak in, phunnauta si ko nain amah cohlangtu Samiria mipawl cu a lawm, a thangthat theu a si. Damiahnih thi dawk, nung dawk ih an thawimi bawmtu, tuamhlawm tu kha “Samaria mitha” kan ti theu. Jacob tikhur ih tikhai tu Samaria nu khalkha a khawpi pawl minungtampi Jesuhhnen rak thlenpi tu “thuthangtha phuangsuak tu” a si kha vun mang sal u si. Tuisun ih kan theihmi Samaria mipharpa hnen khalin lomhtlak, cawntlak thutha tampi ka hmu.

1. Jesuh a rinsan:

            “Jesuh Bawipa, in zangfah hram aw” tiih au rero tu pa 10 lakah a tel ve. Jesuh in i damter thei ti a zum, a rinsan. Ziangvek natnak ha kan ton, ziangvek harnak ha kan neih, Jesuh hnen kan au ding, kan dil ding. Ka natnak a dam ter theitu, ka harnak a cem ter theitu Jesuh ka kiangah a um thei in rinsannak tumpi thawn bawmnak dil u si, thla cam u si.

2. Jesuh ih thupek a ngai:

            Jesuh ih fial mi a tuah, a pok, a feh mai. Jesuh ih fialmi thlunmai hi kan hrangih thiltha zet a si. Kanaan mopuai khalah Jesuh ih tidai khai a fialmi an ngai, an tuah tikah mangbangza tumpi a thleng. Dungthluntu pawl khal Jesuh ih a kawh veten ziangkim tan in an pok mai. Kanmai thatnak ding hrang le Amai sunlawinak hrangah Jesuh fialmi ngaiin, pokkam u si, phuang u si, tuan u si. A lak pakhathman a um lo, man nei hlir an si. 

3. Ka dam ti a thei aw:

            Mah le mah theihawk hi a thupi tuk. Samaria pa hi a nat lam khal a thei aw ih, a dam lam khal a thei aw. Fapa tlan hlo khalkha, a pa ih thatzia le a mai har zia a thei ih a lung a fim ruro sisi. Sual sungih mihlo le mithi kan si zia theiawk mumal lo cun maw, rundamtu Jesuh seherhnak le tulnak khal fiang cuca lo ah hokhaw kan can ding. Kan pumsa hrangah cun damcahnak ding sii kan in, sibawi kan pan, eiin kan ralring, thiltha zet asi. Kan thlarau khal ah a naa maw, a dam maw ti hi cekaw ding, thei aw ding, zoh aw ding kan si ringring.

4. A pan dingmi a thei.

            Ka dam ti a thei awk veten Jesuh hnen ah a kir. Is 1:3 ah “ caw in a neitu an thei; laak khal in an bawipa ih rawlpeknak kuang an thei. Asinain ka minung Israel cun cutluk hman an thei lo” tiah Bawipa in a ti. Satil hman in mai buk le in pan hna an thiam. Krifa pakhat kan si cengmang ah cun nitin Jesuh hnen kir sal thiamtu, a mah naih sinsin thei tu kan si tengteng a tul. Jesuh kan sungih nung tu hnenah kirsal cingcing u si. khal tu nei lo tuurun lak ih vak kual rero men ih lungkim men tla kan si pang kei. Pawipa hnen kirsal dinghi kan hmabak. Jesuh hnenih kirsal lo zindang zawh poiti cuang lo, tong nunih nun huahho mai hi kan thlarau hrang ahcun thla a ring tuk. Kan nunnak khua a thimhlanah Jesuh hnenah kir u si, tin thlang usi.

5. Aw ring zet in Pathian a thangthat.

            Jesuh hnen a thlen tikah awthang in Pathian athangthat. Bawipa thangthat hi a nuam ih, a sunglawi tukmi le man nei tuk a si fawn. Bawipa thangthat thei lo krifa hrekkhat kan hmu theu, kan um theu. Tui na dinhmun, tufang ih na sizat le na neihzat ah Bawipa thangthat aw. Pathian thangthatnakah kan aw sup lo in, kan can uii lo in, kan neih pamhmai lo in siangzet le thatho in thangthat u si. Thiral le mithi topi bang ih zo thaw khal lo, meriamriam ih khawm suah tla hi cu maw, thangthat nun kan tlasam tuk tinak a si. Biakinn kan thleng, kan khawm ta cengmang lungawi sopar ten thangthat u si.

6. Tangdor nun a nei.

            Jesuh kehram leilunhah a bok. Mi tangdor cu cawisan an si ding Jesuh in zirh. Amai nunnak le a neih ziangkim Jesuh hnenah a hlan awaw a si. nun hlan awk thei hi a thupi tuk. Tangdornak thawi Jesuh kan pan tikah a nih in in cawisang a si.  

7. Mi lungawi a si.

            Jesuh hnenah lungawithu a sim. Nauhak tete muthai kan pek le ka lungawi an titheu. An ti lo le nule pa le u le pawl in “ka lungawi ti hmen” tiah kan zirh kan fial theu. Lungawi thiamhi tam sinsin ngahnak a si. Ngah tui hrang le petui hrangah man a nei.  Thla kan cam tik khal ah kan tulmi le duhmi sim hmaisak hnakin Bawipa hnen ih lungawithu kan sim hmaisa bik ringring ding hi Krifa nun a si. 

8. Thinlung le thlarau ih damnak a ngah.

            Pharnat ruangih khawleng ih a umnak ruang hin thinthanaunak tampi a suak ter. Sungkhat khawpi pawlih hnon nak cu thin a na zet. Samaria mi a siruang khal ah a rualpi pa 9 pawl khalin kom duh lonak le nautat zennak tampi an pek tikah thin a na zet. Jesuh krih in “Na zumnak in a lo dam ter zo” a ti cun rual le pi pawlthawi duhtawk ih tlantlang a ngah zo ih, a thlarau khal in thianhlimnak a co a si. Ruangpum, thinlung le thlarau ih damnak cu minung 10 sungah Samaria pa lawng in a co ngah. A rualpi pa 9 cu ruangpum damnak an hmunan, thlarau ih damnak an co ban lo. ziangruangah tile anmah le mah an theiaw lo, Jesuh hnen an kir sal lo. Jesuh hnenih thangthatnak, lungawinak an nei lo tikah thlarau rundamnak an co ngah lo.

            Ruangpum, thinlung le thlarau ih damcahnak Bawipa in ni tin in pe hram seh. Kan nih khal in a mah rinsannak nei in a hnen kir u si, a kehramah bok u si. lungawi in thangthat u si. “Na zumnak in a lo dam ter zo” ti mi Bawipa ih annkanem cu nang le kei hrangah a si. Amen.