Thlawsuah Dil Daan (sim tu Rev. Fr. Lucas Sum) November 14, 2020.

Thlawsuah Dil Daan

Thuthangtha sim tu Rev. Fr. Lucas Sum

November 14, 2020

          Duhdawtmi u le nau, nan zaten a thar in Pathian in thlawsuah lo pe hram seh. 

          Leitlun ah ka fimbik, ka thiamkim, tiih a ruat aw tu tampi kan um ttheu. Asinan, ttha tei kan zoh a si ah cun zo hman famkim taktak kan um lo. Ttul samnak a nei mi lawnglawng kan si. Tah tthimnak ah, a hrek cu damnak kan ttul. A hrek cu innsang hrangah ttul mi pakhat khat kan nei. Cun a hrek cu sumpai kan ttul ih, a hrek khat cu thlarau cahnak kan ttul. Cutin a phunphun ttul mi kan nei ciau ttheu.

          Cui kan ttul mi pawl a zatei in pe thei tu hi, leitlun ah pakhat hman an rum lo. Asian kan biak Pathian cun kan ttul mi a zatei a nei ttheh ih, in pe thei ttheh a si. Pathian in milai in duhdawt tuk ruangah, nan ttul sam mi I dil uh, in ti. Kan biak kan Pathian a ttha duh. Mathai 7: 7 ah hi tin in sim: “Dil uh nan ngah ding; hawl uh nan hmu ding; king uh nan hrangah sangka on a si ding,” in ti. 

          Bawi Jesuh in kan hmin in dil uh la nan ngah ding, in ti bangin kan ttul sam mi hi Jesuh ih hmin in Pathian hnen ah kan dil ttheu. Asinan, kan dil mi kan ngah maw?, timi kan ruah sal a silen kan dil mizaten kan ngah ttheh lo a si, Curuangah dil uh la nan ngah ding tiah Jesuh in in kam fawn, kan dil ih kan ngah fawn lo, tiah mangbang in kan um; kan riah a sia; kan bei a dong; thlacam kan paih nawn lo in kan um ttheu. 

          Ziangruang bik ah kan ngah lo a si pei? Ziangruangah kan dil mi a zaten kan ngah lo a si timi thu hi phun hnih thum lai tla a um men thei. Asinan, tui tthum ih kan Baibal ih in sim fiang mi cu ka ngah tengteng ko ding timi zumih thinsau le bei dong loin thlacam ding, timi a si. Himi thu thawn peh par aw in Bawi Jesuh in ziangtin in zirh a si timi Baibal ca tlang kan ngah ta hrih pei.

Lk 18: 1 - 8.

          “Jesuh in a dung thlun tu pawl kha thinnau loin thla nan cam ringring pei, ti zirh duh ah tah tthimnak pakhat a sim. An hnen ah cun “khua pakhat ah Pathian a tthih lo ih milai khal a hmai zah lo tu thu tthen tu pakhat a um. Cui khua thotho ah nu hmei nu pakhat a um ih nu hmei nu cun, I ral tu thawn ih thu kan neih mi ah hin I bawm hram aw, tiah a tu le a tu a ra dil ringring. Thutthen tu in cui thu cu caan reipi relsak duh loin a um; asinan a ne ta bik ah cun “Pathian ka tthih lo ih mi khal ka hmai zah lo nan, hi nu hmei nu in i hnai hnok ringring ruangah a thu cu ka rel sak pei. Ka relsak lo a si ah cun cat bang lo in a ra ringring dingih a net nak ah cun kei mah leh lam thin lung bang in i tuah ding, tiah a ruat, tiah a sim. 

          Cui an bawipa cun an hnen ah “Hi a hman lo mi thutthen tu ih ttongkam cu nan thei. Cuti a si ah cun Pathian in a mai bomnak sun zan dil in a au rero tu a minung pawl cu an thu tthen sak lo in a um pei maw? An mah bawm dingah a khul a fung pei maw? Fiang ten ka lo sim, zamrang zet in a rel sak dingih thiam a co ter ding a si. sikhalseh la Mi Fapa hi leilung ih a rat tik ah zumnak nei tu a hmu pei maw?, tiah a ti.” 

          Zumtu u le nau, mi tui kan ngai mi ca thianghlim in kan zaten Pathian hnen ih thlaza camih kan ttul mi kan dil tik ih kan ttul mi pathum in sim fiang a si. 

          A pakhat nak ah, Pathian in pe thei a si timi zumnak nei ding. Ka ngah tengteng ding; Pathian in I pe tengteng ding tiih zum feknak nei ding. 

          Cun a pahnih nak ah thinsaunak thawi dil ding, timi a si.  Dil ve tei ngah cih timi a um tuk lemlo. Zarh khat maw, thla khat maw, lolen kumkhat maw, a rei men thei. Thin sau tei thlacamnak thawi dil ringring ding tinak a si. 

          Zum tu u le nau, in duhdawt tu le kan ttul mi ziangkim in pe thei tu Pathian hnen ah duhdawtnak, zumnak le thinsaunak thawn thlaza cam in kan ttul mi van thlawsuah le lei thlawsuah dil ciau uh si. Pathian in nan ttul mi thlawsuah lo pe ciau hram seh. Amen.