Jesuh Khrih tonnak cu siam thar sinak (sim tu Rev. Fr. Joseph Ro Nei Thang)

"Jesuh Khrih tonnak cu siam thar sinak”

Thuthangtha sim tu Rev. Fr. Joseph Ro Nei Thang

November 17, 2020

Siarding: Thuphuan 3:1-6, 14-22; Ps 15:1-2, 3-4, 5; Luka 19:1-10.

          Bawi Khrih ah duhdawtmi nu le pa, u le nau pawl, “kan Bawipa Jesuh Khrih ih zaangfahnak veel, Pa Pathian ih duhdawtnak le Thlarau Thianghlim ih pumkhat sinak pawl cu nanmah thawn um hram seh” tiah cibai ka run lo buk hai. Tuihni cu 2020, November thla ni 17, Tlawngkai nilini asi. November ni 17 ni cu Hungary ramih St Elizabeth ih puaini asiih himi hmin latu hmuahhmuah tla “Happy Feast day” tiah cibai ka run lo buk. Tuihni kan siar dingmi Pathian ih ttongkam tla cu Thuphuan 3:1-6, 14-22 tiang; Ps 15:1-2, 3-4, 5 tiang le Luka 19:1-10 tiangah miniamte Zacheus ih thu pawl kan siar ding asi. Tuihni ih kan ruah khawm dingmi cu “Jesuh Khrih tonnak cu siam thar sinak” tiah asi pei.

          Thuphuan 1:9-3:22 tiang kan zoh tikah Kawhhran 7 hnenih St John ih cakuatnak pawl kan hmu thei ding asi. Cumi Kawhhran 7 pawl cu Efesa, Smyrna, Pergamum, Thyatira, Sardis, Philadelphia le Laodicea pawl tla ansiih St John in Patmos tikulh ihsin ralrinnak ca a kuatnak asi. Tuihni kan siarmi Bible a voikhatnak ah Pathian ih thlarau phun sarih a neitu in Sardis khua ih Kohhran member pawl le Laodicea khua ih Kohhran member pawl hnenah a simmi cu “Nan sualnak sir uh” tiah asi. Kan sualnak sir dingah Jesuh Khrih in a duhih kan thinlung sangka kiangah tla amah a ding ringring ih kan sangka cu a kiing asi. Kan thinlung sangka ong ta hratin Bawipa ih kawhnak aw cu ngai uhsi. A cancan ah sual sir ttullo vekin maw, sual neilo vekin maw, kan rak um ciamco tikah tuihni kan siarmi Cathianghlim in “Na hnattuanmi ka thei. A daih khal na dai lo; a sat khal na saa fawnlo. Na dai asile dai lawlaw aw; na sat asi khalle saa lawlaw cila ka duh asi. A daih le dai silo, a sat le saa silo; a hlum menmen na si ruangah ka kaa sung ihsin ka lo khaat suak ding” tiah Thuphuan 3:15-16 ah kan siar thei. Kan suarnak hmuahhmuah cu Bawipa in amahih zaangfahnak tumpi thawn in tlengfai sak zo, in hnul sak thluh zo, kan sualnak cazin cu in phiat sak thluh zo asi. Kannih in Bawipa ih zaangfahnak kan pan thlang maw? Bawipa ih in ko rero mi duhdawtnak aw nemte cu kan ngai thlang maw? Kan sualnak pawl tlansan in Bawipa hnenah kirsal in nunnak thar nei dingah kan tum hrimhrim a ttul asi. Galati 5:24 “Jesuh Khrih ih ta asimi pawl cu an taksa hurnak le hiarnak pawl cu thinglamtah ah an khenthat zo asi” tiah in zirh. Jesuh Khrih nih in khenthat sak si lo in kanmah rori in kan khenthat ttulmi asi. Rome 6:6 ah “Kan nun hlun cu Khrih thawn thinglamtah parah khencih a si zo ti thei” tiah asi. Kan nun hlun cu sualnak thawn a khahmi asi. Sihmansehla Jesuh Khrih kan zumih baptism kan ngahnak thawngin Jesuh Khrih ah siam thar mi ah kan cang zo asi. Curuangah 2Korin 5:17 ah “Zozo khal Khrih thawn an pehzom awk tikah siamthar ah a cang. A nun-hlun cu a cemih nunthar a thok zo asi” tiah Paul nih in zirh. 

• Peter in Jesuh a ton tikah amah le amah misual asi ti a thei thiam awk asi. Amah ih sualnak a hmu ih tangdor tein “Bawipa, I fehsan hram aw; ziangahtile kei hi misual ka si” tiah Luka 5:8 ah kan hmu thei. Cun Luka 5: 10-11 ah Jesuh in Peter hnenah “Na thin phang hlah; a tu thokin minung kaitu nasi ding” tiah ati. An lawng pawl cu tikap ah an dinter ih an thil hmuahhmuah fehsanin Jesuh cu an thlun asi” tiah kan hmu. Simon Peter in Jesuh Khrih thawn a ton hnu ah nunthar a thok asi. 
•  
• Mt 9:9-10 ah “Cuih hmun ihsin Jesuh cu a suakih a feh rero lai ah siahkhongtu pakhat Matthew an timi pa a zung sungih a to kha a hmu ih ‘I thlun aw’ tiah a ti. Matthew cu a tho ih Jesuh cu a thlun. Jesuh cu Matthew ih inn ah zanriah a ei lai ah siahkhongtu dang tampi le misual tiih mi ih hnonmi  pawlin Jesuh le a dungthluntu pawl cu rawl an ei pi” tiah asi. Matthew cu Jesuh Khrih ih kawhnak aw a thei ih a thlun. “I thlun aw” timi cu kan nuncan ziaza i cawng aw tinak asi. Matthew in a hnattuan le a yaatthu pawl a tansan ih Bawipa a thlun asi. Amah vekin siahkhongtu dang pawl le misual asi tiah mi ih hnonmi pawl tla Bawipa ih zaangfahnak an hmu ih Bawipa thawn rawl an ei tlang asi. Bawipa thawn an tlanleng tlang asi. Bawipa ih simmi thu pawl thawn siamtharnak an co ve asi. 
•  
• “Sual neimi nunau pakhat in Jesuh cu Pharisee pa inn ah rawl a ei ding ti a thei tikah alabaster timi lung ih tuahmi thawl pakhat in zihmui a ra kengih Jesuh ih dunglam, a ke hramah ding tahratin a ttap ih a mitthli cu Jesuh ih ke ah a tlater ruangah a ciar. Cule Jesuh ih ke cu a sam in a hnawt hulih a hnam hnu ah a zihmui cu a toih asi” tiah Luka 7:37-38 ah kan hmu thei. Jesuh thawn a tong awk tikah amah le amah sualneimi asi ti a thei ih siam tharmi ah a cang asi. Jesuh in cumi nu hnenah “Na zumnak in a lo rundam suak zo; hnangam tein vat lung aw” tiah ati tiin Luka 7:50 a ti bet. 
•  
• Tuihni kan siarmi Thuthang ttha sungah Zacheus cu Jesuh Khrih ton a cak tuk ruangah theipi kung parah a kai. Cuticun Jesuh Khrih cu a hmu ngah. Jesuh in ‘“Zacheus, zamrang in rung ttum aw, tuihsun na inn ah kan tlung ding” tiah ati. Zacheus cu zamrang zetin a ttumih Jesuh kha a inn ah lungawi zetin a tlunter. Zacheus cu a dingih Bawipa hnenah cun, ‘Bawipa, I ngai hnik! Ka neimi ih hrekkhat cu mifarah pawl ka pe ding; cule ka bummi an um ahcun a letli in ka sam sal ding’ tiah ati. Bawipa Jesuh in a hnenah ‘tuih sun ah hi pa ih inn ah rundamnak a ra thleng zo’ tiah a ti asi” tiin Luka 19:5-6, 8-9 tiangah kan hmu thei.  Jesuh Khrih a tonnak le Jesuh Khrih ih ttongkam ruangah Zacheus cu siamthar ah a cang asi. 
•  
• Paul tla Jesuh Khrih ih Kohhran hremtu a rak si dah nain Jesuh Khrih thawn an ton awk ngah hnu ahcun siam tharnak a ngahih Jesuh Khrih hrangah thuthang ttha phuan in a nunnak a liamta dah asi. 
•  
• Nang le kei tla, Jesuh Khrih thawn a thi le sa kan sannak thawn siseh, a ttongkam kan siarnak le kan ngainak thawn siseh, Amaih hmin in pahnih, pathum komin thla kan cam tikah siseh, a siahhlawh puithiam pawl ah siseh, Sacrament pawl kan sannak thawn siseh, mina pawl kan le thlawngtla pawl kan veh, mi farah pawl kan bawm, in ding le ei ding neilotu pawl in ding le ei ding kan pek, mikhual pawl inn ah kan tlunternak thawn siseh, Mithi pawl kan vuinak ah siseh, Bawipa kan tong ttheu asi. Siamtharnak kan nei ngaingai maw? 
•  
• Pathian ih thukham pahra kan thlun hlei ah Christian nundaan tla nei bet hrih uhsi. Zaangzel lo ding, thinhenglo ding, sual puh lo ding, thintawinak neilo ding, mi iksik lo ding, mi hamttamlo ding, mi nautat lo ding, zu ri lo ding, puar thaulo ding, zumnak, ruahsannak, duhdawtnak pawl nei ringring ding, tangdornak, zaangfah zawnruahnak, lungnemnak, tangdornak, thin saunak, mi bawm duhnak pawl kan nei ttul mi…. cumi pawl cu nangmah le nangmah na duhdawt aw vekin midang tla duhdawt aw timi duhdawtnak thukham asi.
•  
• Bawipa in nan zate in lo thlawsuah hram seh. Amen.