Pekbet maw laksak na duh (sim tu Rev. Fr. Pius Cung)

“Pekbet maw laksak na duh.” 

Thuthangtha sim tu Rev. Fr. Pius Cung

November 18, 2020.

Siarding: Thu 4:1-11; Saam 150; Lk 19:11-28.                                

            Bawipa ih hnangam daihnak nan hnenah thleng hramseh. Damnak le can sunglawi in petu Pathian a hmin ka thangthat. Kan tikcucan kan zoh le hmun tinah natnak,  harnak le ramuk awknak thuhla pawl thawn buaibainak a tam culci. Pathian thuhla thupitak ih buaipi le tuan suaknak can remcang a mal vivo. Lei tisa hrang lawng silo in kan thlarau hrang khal ralring fimkhur ten, thlahthlam lo in kan tuan ringring cio pei.                              

            2020, Nov 18,  ni ih kan siarmi Lk 19:11-28 sungah hnatuan tu hnenum hrekkhat pawlih a miat an ngah dan le hnatuan lo hnenum ih siatralnak an ton dan pawl fiang te in kan hmu. Jesuhnih thuthimnak in pek mi cu, Bawipakhat in a hnenum pa10 hnenah sui tangka fang 1 cio a pek. Khual tlawnnak ihsin a ra tlunsal tikah Pakhathnu pakhat a paisa thu a sut. Fang 10 le fang5 a pungzai tertu pawlcu paisa khal a pe bet, khua tampi uk theinak khal a pek. Siangpahrang a sinak duh lo tu le phaisa pungzai ter lo tu pawl cu an neih sunh khal laksak dingin le an minung khal thah dingin thu a pek. Kan sut aw cio hnik pei, “Pekbet maw laksak na duh.”  Neihmi laksak hnak cun pekbet cu kan duh cio ding ka zum.                   

           Pekbet si thei dingin kan tuah tulmi pa 3 a um.

1. Bawipa ih thucah thatei ngai ding.

          “Himi thawn sum rak tuah uh, ziangzat nan ngah ka zoh hnik pei” Bawipa in a ti. Hi tiih thu a cah nak cu a a pungzai mi, a miat ngah duh men ruanah si loin, hnenum pawl hna an tuan ding a duhsak ruangah a si sawn. Amiat an hmuh mi kha an Bawipa in a la lo, a tuan tui hrang thotho a si ih lawman laksawng hman a bet. Pathian in minung in sersiam thok in hmuan kilkhawi dingah a ret. Loram tuan a fial. Jesuh Krih in Thlarau Thianghlim in pek ih vancunguknak hrang ih hna tuan dingah in thlah. Lei tisa hrang le thlarau nunnak hrang phun 2 in hna tuan kan nei tinak a si. Kan ruangpum le kan thlarau a komh awk vek in ruangpumhrang le thlarau hrang hna phunhnih tuan ding kan nei ringring.

          Ziangzat nan ngah ka zoh ding in ti. Kan Bawipa Pathian in kan tuan mi a cekfel tengteng ding. Tuan ding khal in fial ih, in cekfel ding khal ralrin in pek. Suitum kengih suak naute an um loih Bible kengih suak khal an um ce lo. Nikhat sungih nazi 24 khal zo bulce hrangah a tam cuang lo ih maldeuh ih co khal kan um lo. Curuangah kan hram thawhnak cu kan bangrep thluh ko. Hnenum pawlih fang1 cio bangran ih an co vekin kan bangawk thluh mi a tampi. Lei tisa hrangkhal tuan in thlarau hrang khal ah can pe in tuan sin u si. Kan nunnak ni netabikni a thlen tikah Bawipa in kan tuanzat a zoh tengteng ding a si.

2. Hnatuan milaw si ding.

          Leitlun tisa hrangah laimi pawl hi hnatuan an law, an zuam tiah lomhnak kan co theu. Thlarau hrang khalah cuvek thotho ih milaw le taima kan si ding hi Bawipa in a duh. Biaknak lamih daithlang le pawhzawh, pelhpawng rero men ding kan si lo. Leitlun sumsaw thilri cu pungzai ding le tamsin ding in mitampi in kan zuam, kan hawl, kan khawl rero theu.Asi nain, thlarau lam, biaknak le zumnak lamah teh karhzai le tamsin vivo thei kan si maw silo ti hi napi ih zohaw ding cekaw ding kan si. fang 1 in fang 10 suah thei kan um ding ih fangkhat in fang5 suah thei khal kan um ding. Tuan thiamdan le thazangcahnak a bangawk lo vekin a pungzai le a miat khal a dang aw ko ding. Va dang aw ko seh, theitawk le sitawkzawn te ih kan tuan rero ding hi Bawipa ih a duh mi le a thangthat mi a si.                                            

           Fang1 ngah mi a mah kelte ih, pungzai loih ret men cu mai thlaksiatnak le Bawipai thin hengnak a si sawn. Christian kan ti aw nain Bible cahnah kau hnakin Phaisa cahnah tham nuam ti sawn kan tam vivo tla hi cu a poi tuk lawmman. Baptism tikholhnak kan ngah laiih Pathianfa kan sinak, Thiang thlarau kan co nak a mah kel tal in a hmun thei lai maw? Biaknak lam ih kan zuamnak le kan thathawhnak teh par bang in a ziam, a uai cuahco maw? Jesuh ih pekmi hnangam daihnak le lungawinak teh kan nunah a kang in a car ruahro maw? Athanglian mi le a pungzaimi nunnak tel lo cun Kan Bawipa kan tong ngam ding maw? Tisa hrangah cun milaw hnak ih zual deuh in taimak kan suah tuk lamih mi duh aam, mi duhham  can sual a ol te. Bible cathianghlim siarnak ah, thuthangtha simnak le ngainak ah, thangthat hlasak le thlacam nunah, midang bawmnak le zangfah duhdawtnak nunah, lungawinak le hngangam nakah, milaw le taima si thei hram cio u si. Hlawhman partha cu tuisan hrimhrim khalah hmuh a si ih nehhnu san khalah kumkhaw daih in a ee, a mawi sin ding, pekbet rero kan si ding a si.

3. Bawipa hnenih rak ken sal ding.

          Kan neihzat, kan sizat kha Bawipa hnen ah thlenpi u si. Tam sinsin ngahnak a si. Ziangruangah so kan sup, kan tih. Kan neihzat tla suahpi lo in kan sidan tla sim ngamtheh loin Bawipa kan pan tikah lomhnak le laksawng kan ngah dingzat kan ngah nawn lo. Tihphannak um lo le siangzet in kan minung le kan neihmi Bawipa Pathian hnenah keng u si, thlenpi u si. Laksawng tampi ngahbet nak a si ih, lomh le nunsaunak khal co bet a si.     Kan Bawipa theih thei lo dingin thuh theimi zianghman kan nei lo. Thuh rero tulmi hrimhrim khal a si lo. Tuih kan sizia le dinhmun te hin Bawipa hnen pan ko u si, a tleunak ih in tlet, in et cun kan sualnak le fam kim lonak pawl cu kan dunglamah kan thlamthawn thimnak ah a tang ding a si. Kan fanau le unau sungkhat pawl, ramtha thleng thei dingin le hnatuantha ngah thei dingin harnak tampi lakah kan tanpi, kan zuam pi rero. Biakinn thlenpi ding le vanram tiang hruai ding teh kan kan hnatuan a si ko lo maw. Bawipai hnen kan thlenpi  dingmi an si ko lo maw. Situk pan teh. Minung kan thih tikah thlankhur sungah ken theimi zianghman kan nei lo kan ti theu. Thlarau lamah cun kan fale le unau sungkhat, rualpi pawlpi mipi tampi vancung tiang kan keng thei, kan thlen pi thei. Leithlun kan dam laiih thlarau lam ih kan hlimnak, kan phurnak, kan lungawinak le hnangamnak pawl tla hi, vancungtiang kan ken thei mi an si thluh. Neihmi le sumsaw thilri siseh kan mai nun le fanau, rualpi ih nun siseh Bawipa hnenah thlenpi u si, lomhnak lungawinak le nunnak cu Bawipa in in pebet tengteng ding a si.

          Kan Bawipa Jesuh ih thucah mi tha tein a ngaitu a cingkeng theitu le a tuan suaktu si thei dingin Thiang thlarau in fimnak le thazang cahnak in pe hram seh. Kan sinak le kan neih ziangkim Bawipa hnenah thlenpi theitu si dingin Thiang thlarau in lam in hruai sin hram seh. Bawipa ih lomhmi, cawisanmi, nunnak pekmi cu mi lungawi le mi thluasuah kan si. Pa le Fapa le Thiangthlarau hmin in, Amen.