Ralthatnak le hnangamnak (sim tu Rev. Fr. Pius Cung), November 25, 2020.

Ralthatnak le hnangamnak

Thuthangtha sim tu Rev. Fr. Pius Cung

November 25, 2020

Siarding: Lk 21:12-19

          Pa le Fapa le Thiangthlarau hmin in, Amen. Bawipa ih pekmi hnangam daihnak nan parah thleng hram seh. Thuthangtha Lk 21:12-19 tiang. “Cubangtuk thil a thlen hlanah nannih tla cu kaihnak le hremnak nan tuar ding; sinakok i nan thu rel dingin le thawngthlak dingin midang pawl ih kut ah pek nan si ding. Keimah ih ruangah siangpahrang le uktu bawi pawl ih hmaiah suahpi nan si ding. Cucu nan hrangah Thuthangtha simnak cantha a si ding. Ziangtinso kan hum awknak dingah kan ttan ding tiah a hlankhan ihsin nan donhar lo dingin nan thin lung rak timtuah cia uh. Ziangah tile tongkam thiamnak le fimnak nasa zetin ka lo pe ding ih nan ral pawl zohman in nan tongmi kha an el thei lo ding ih nan palh a si a ti theitu khal an um lo ding. Nan nu le nan pa, nan u le nan nau, nan sungkhat le nan rualpi pawl in an lo phiar dingih mi then khat cu thah tla nan tong ding. Keimah ih ruangah mi hmuahhmuah in an lo hua ding. Sikhal seh la nan lu par ih samphang pakhat hman a tlong lo ding. Hnet zetin ding ko uh; cu ticun nan runaw ngah ding a si,’’ tiah a ti. Kan Bawipa ih thuthangtha a si.  Kan siarmi thuthangtha sungin “Ralthatnak le hnangamnak” hlawm aw tlang u si. 

1. Kan ralthatnak cu Bawipa ih Tongkam a si.

          Minung in ttihphan nak kan ton tikah rinsan ding kan hawl. Kan cahnak maw, hriamnam maw, neihnak maw pakhatkhat kan rinsan. Kuttlaih le sirhsan, rinsan dingtha kan neih le kan ral a tha ih kan tihphan mi kha kan nor ngam. Lei tisa lamih kan raltthatnak hi kan dangaw cio ding nan thlarau lamih kan ralthatnak  ding cu kan bang aw thluh. Cucu Jesuh ih Tongkamnung a si. Siangpahrang hmai, Bawi upa hmai le mifim mithiam hmai ih tong ding hi lei tisa lam cun a har zet. Kei hnak in an thiam, kei hnak in an thei tiah kan thinlung ah hmaisongnak le tihphannak a um theu. Sihmansehla Pathian thuthangtha aupi nak ah cun zovek Bawihmai le mifim hmai khalah siseh miburpi hmai le mi pakhat hmaikhalah siseh, ding ih aupi ding in Jesuh in in fial. Thu  in pek. Tihphang loin hmainor u si. Raltha in ding ko u si.                         

          Kan mai fimnak le thiamnak rinsan cun zokhal au ngamtu ding kan um lo. Lei le van sersiam tu le uktu, neitu Pathian thu hi, sim thei dingin kan theihnak, kan hmuhnak le kan minung sinak in kan tlin lo lawlaw. Pathian thu hi zirthluh, thiamkim le theithluh zo hman kan um lo. Tlinglo tlaklo cingih sim rero thotho dingin Bawipa in thu in pek. Kan tong dingmi khal a  mah ih zirhbet vivo dingin thu in kam. Amah ih pek sin lai dingmi tongkam le fimnak rinsan in raltha usi. Kaihnak, Hremnak, thawngthlaknak le harnak phunzakip pawl cu kan kimvel ah um rero ko haiseh, ralthatnak cu kan sungin a raih Bawipa ih in pekmi a tongkam asi. Thuthentu hmai le Bawi upa hmai Pathianthian thu sim dingcu va umhrih, pawlpi hmai le kan maitthirual le zapi hmaiih Pathianthu sim ding hmanhi har titu, ka tih titu mi kan tam zet lai. Jesuh le a rundamnak thuhla hi phuangthei lo dingin le simngam lo dingin Setan in in kaihrem pang maw? Thawng in thlak pang maw. Kan kaa in hup pang maw? Pathian thunung hi kaihhrem le thawngthlak mai a theih lo. Thiangthlarau ih fialnak cun mipi hmai le mi pakhat hmai a ah siseh, Bawi upa hmai le mi zaaran hmaiah seh zalen zet in a tlangau mai.  “Tongkam thiamnak le fimnak nasa zetin ka lo pe ding” timi Bawipa ih thukam hi kan Raltthatnak sii ah hmangin thuthangtha ah paraltha si thlang u si. 

2. Kan hnangamnak cu Bawipa ih Tongkam a si.

          Minung cu midang kan tluk lo nak kan thaksamnak kan ruah canah kan tha a nau theu. Rinsan ding unau sungkhat neih lo khalah tha a nau thei zet. Cui hleiah nu le pa, u nau sungkhat le rualpi pawl ih phiarnak, hnonnak, thahnak ton ding cu riahsia za le thin thanau nak taktak a si. kan neihmi unau sungkhat le kan neihmi thazaang le thatnak phunkim pawlhi kan hnen in an hlo vivo ding, an hla vivo thei. Kanmah te lawng in tan cuahco lai ding. Duhdawttu le ttanpi tu teh ka neinawn maw, ka nunman teh a thahnem nawn maw ti ih beidong thinnaunak caan a thleng thei. Ziangvek beidongnak khal theng ko seh, kan hnangamnak ding thuhla hngetkhoh zet le fiangzet in a um. Cucu Bawipa ih tongkam a si.  “Nan lu par ih samphang pakhat hman a tlong lo ding” timi hi kaihnet in thazang la u si. 

          Huatu, hnongtu, tlansan tu tampi um ko hmanseh, in komduh tu, in umpi ringring tu Jesuh Krih kan nei. Bawipa in kan sam phangkhat te tiangin in kil him. Samphang phangziat ka nei ti siarthei tu le theiaw tuteh zotal kan um maw? Kan mah le mah kan theihawk hnakih in thei sawntu, kan mah le mah kan kilven awk hnakih in kilhim theitu le in kil ringring tu Bawipa Jesuh kan nei. Kan lu in kan ke, kan sung le kan leng, kan pumsa le kan thlarau Bawipa ih kut thiangah a um. Hngangam a va um ve. Donhar ding le thin thanau ding kan si hrimhrim lo. Kumkhua a hmunmi a duhdawtdak in nitin kan nun in kilhim ringring. Kan hnangam nak taktak hi kan neihmi thilri ah a hmun lo. Kan thatnak,  hminthan nak ah a um lo, kan nu le pa le unau rualpi hnenkhal ah a tthum aw lo. Kan hnangamnak taktak cu Jesuh pek mi lawng a si ih, kan thlarau le kan sunglam in a ra sawn. Hnangamnak hi hmuh theih le a lenglamah kan hawl rero pang kei. Thlarau nun le sunglam zumhnak in a ra sawn mi a si. Cucu Bawipa ih tongkam a si. Jesuh ih thukam “Nan lu par ih samphang pakhat hman a tlong lo ding” ti kaakhat tekhal hi sankhuk daih hnangamnak a tlak tuk ko sokhaw. 

          Pathian thuthangtha hrangih ralthatnak ah rinsan dingdang hawl rero lo in, Bawi paih thukam “Tongkam thiamnak le fimnak nasa zetin ka lo pe ding” in timi hi sankhuk in rinsan u si. Nitin kan nunnak ih hnangam daihnak khalah hmutheih thilri le kiangkap minung hnenah hawl rero loin, Bawipai tongkam “Nan lu par ih samphang pakhat hman a tlong lo ding” in timi hin kan nun sung, in hnem ringring hram seh. Pathian thunung a sunlawihtu; thuthangtha phuangtu le ngaitu kan zate parah Bawipa ih pekmi Ralthatnak le Hnangamnak  cu kumkhua in hmun camcin hram seh, Amen.