A Hloral Dah Lo Dingmi Sawn (sim tu Rev. Fr. Peter Zin) November 27, 2020

A Hloral Dah Lo Dingmi

Thuthangtha sim tu Rev. Fr. Peter Zin

November 27, 2020.

Luka 19:29-33

²⁹ Jesuh in hi tahṭhimnak hi a sim: “Theipi kung siseh, thingkung dang thu khal siseh, ruathnik uh. ³⁰Hnah note a cerh tikah khuaṭhal caan a nai zo ti nan thei. ³¹ Cubangtuk in hi thil pawl a kim vivo tikah Pathian Uknak cu a thleng zik thlang a si, ti thei uh. ³² Atu ih a nungmi pawl an thi ṭheh hlanah hi thil hmuahhmuah cu a thleng kim ṭheh ding ti kha ciing ṭha uh. ³³ Van le lei cu a hloral leh ding nain ka thu cu a hloral dah lo ding,” tiah a ti.

(Bawipa ih Thuthangṭha a si)

          Bawi Khriah ah duhdawtmi nu le pa, u le nau pawl, nan zate hnenah hnangam daihnak um ringring hram seh. A tu ka siar mi hi Luka 19:29-33 tiang a si ih, November 27, 2020 (Tlawngkai Ninga) ni ih kan siar ding mi Gospel a si. Himi kan siar mi Gospel thawn pehpar in leitlun kan nun sungah a hloral dah lo dingmi thil kha a thupi bik ah ret in a kawl thei, a hril thei tu kan si thei ringring nak ding ah thazaang lak tlang uh si tiah ka lo sawm duh.

          Leitlun kan nunnak ah kannih minung pawl hi a tlangpi in kan duh mi (kan sik-win-sa mi) asilole kan tuah peih mi (wa-ta-na) kan nei mi pawl ah hi thu kan thei thei dueh, a tuah kan peih deuh ih a tuah khal a ol deuh in kan thei ih a tuah khal kan tuah ngaingai ṭheu a si. Cun khat lam ah, a thupi lo in kan ruat mi, kan sik-win-sa lo mi, kan tuah peih lo mi thil pawl ah cu kan theihnak khal a mal, tuah duhnak khal a mal ih a tuah khal kan tuah thei ṭheu lo. Thuṭhimnak ah, ca lam in fim thiamnak zir a duh tu hrang ah cu tlawngkai le ca zir hi a nuam a ti ih a zir ngah lo ding a phang lai ah ca zir a peih lo tu hrang ah cu tlawngkai le ca zir hi a har a ti tuk ih tlawng a kai ngah lo le a lung a awi sawn leh lam men. Aa-ka-sa lam in kan zoh ding a si le, a bik in bawlung lam kan zoh pei ih, a sik-win-sa tu pawl cun ziang tik ah zo te an lek ding, a lek tu lak ah zo pawl an tel ding, asilole ziangmi bawlung a tin ah zozo si an tel tivek in an hmin le an ram hmin pawl khal ṭha zet in an thei ṭheh. Mihrek khat tla cu a cang hrih lo mi hman an ruahnak in an rak sim cia thiam. Ram uk nak lam, naing-ngan-yi lam khal ah a sik-win-sa tu pawl cun ram thuanthu siseh, upadi pawl siseh, cun ram uk nak thawn pehpar in thu tampi an thei ve. Sumhawlnak lam, si-pua-yi lam a sik-win-sa tu pawl khal le ziang tin kan tuah ding, ziang tin paisa tam pi kan ngah thei ding tivek in si-pua-yi thawn pehpar in thu a phunphun an thei ve. Khat lam ah kan zoh a si le, aa-ka-sa siseh, naing-ngan-yi siseh, sii-pua-yi siseh ziang hman thei lem lo khal an rak um ve lala.

          Himi pawl hi kan zoh a si le ziangruangah mi hrek khat in an thei zet ih a dang mi hrek khat pawl in an thei ve lo ti sile a tlangpi in cu kawl ṭong in ‘sik-win-sa-hmuh’ silole ‘wa-ta-na’ thei duhnak, tuah duhnak tivek nei le nei lo kan dang aw nak hi a si bik ding tin ka ruat. Cun nikhua thawn pehpar in mihrek khat cu thai sun, tipsun lam ah ziang tin a um ding, ruah a sur pei maw, ni a sa pei maw, thilsia a hrang pei maw tivek in an sim cia thei. Cumikha cu malte a sinh-sang deuh hi, cumi hnakin niam deuh in kan zoh a ding a sile tuni kan siar mi Gospel sungah Bawi Jesuh in sim mi “Theipi kung siseh, thingkung dang thu khal siseh, ruathnik uh. Hnah note a cerh tikah khuaṭhal caan a nai zo ti nan thei,” a ti. Tu san, kanmah san ah, a bik in nauta deuh pawl harngah cu calendar nithla zoh in ṭhal a thleng thlang, fur a tleng thlang, thlatang a thleng thlang tiin kan thei. Asinan hlanlai kan pi le pu pawl kan zoh tikah calendar khal an nei lo ih a zoh khal an thiam lo. Asinan thingkung um daan pawl le kiang kap thilum daan, nikhua um daan pawl zoh in ziangtik cu kan thleng ti hi an thei thei ve. Himi an thei thei nak khal cu an mah hrangah a thupi ti an thei ih an sik-win-sa ruangah an thei thei kan ti le a sual lo ding. Ziangruangah tile a tu kan san ah ziang tik tla ah ziang mi kung a um, ziang par pawl an par ti vek a thei tu an um vek in a thei lo tu khal tam pi an um ve. A sik-win-sa tu pawl in an thei ih a sik-win-sa lo tu pawl in an thei lo.

          Bawi Jesuh in, “Cubangtuk in hi thil pawl a kim vivo tikah Pathian Uknak cu a thleng zik thlang a si, ti thei uh,” a ti. ‘Hi thil pawl a kim vivo tikah’ a ti mi cu ziang a si pei? Tuni kan siar mi Gospel ih a tlun deuh kan zoh a si le kan hmu thei a si. A mah thlun tu si ruang ih harnak le hremnak a um nak ding thu, cun leitlun ah ral buai nak pawl a umnak ding thu,  leitlun hmunkip ah ṭih nungza le thil ṭha lo a phunphun a thleng nak ding thu tivek pawl kha a sim cia a si. Thing hnah note a cerh tikah khuaṭhal caan a nai zo ti nan thei vekin himi pawl a kim vivo tikah Pathian Uknak cu a thleng zik thlang a si ti thei uh a ti nak a si. Pathian Uknak a thleng zik thlang a si ti thei uh a ti tik khal ah ziangtikah leilungpi asilole san a cem ding ti a ni le thla thei ding kha sim duhmi si lo in ralring te in kan um cia ringring ding in a sim duh mi sawn asi.

          Bawi Jesuh in ‘Van le lei cu a hloral leh ding nain ka thu cu a hloral dah lo ding’ a ti. Bawipa ziangtikah a rat sal ding ti cu a ni le a thla in zo hman in kan thei thei lo, asinan a ṭongkam cu a hloral dah lo ding ih ni khatkhat ah cu a kim tengteng ding a si. Ka thu cu a hloral dah lo ding a ti mi khal ah a rat salnak ding thu lawng si loin a sim dah mi thu hmuahhmuah a tel ṭheh asi. Bawi Jesuh ih in sim mi pawl ah leitlun kan nun sungah ziangtin kan nung ding, a rat sal caan kha ziangtin kan hngak ding tivek pawl famkim te in in sim ṭheh a zo a si. Leitlun thilri le thuhla pawl khal ah a sik-win-sa tu pawl in an thei deuh vek in Bawipa ih a hloral dah lo ding mi a thusim mi pawl khal ah a sik-win-sa tu pawl in an thei deuh ve asi. Minung kan si nak ah leitlun ah kan thei ṭulmi, kan thiam ṭulmi tampi a um ve ko ding, asinan hi mi pawl hi an hloral ṭheh lai ding. Cuhnakin a thupi sawmmi, a hloral dah lo dingmi kan Bawipa ih in zirhmi thu pawl sawn ah kan thinlung a ret theitu, cumi pawl sawn kha a thupi bikah ret in a thei thiam thei tu kan si cio thei nak dingin Pathian hnen ah thluasuah dil in zuam cio uh si.

Fr. Peter Lal Zin Thang (Hakha Diocese)