Thlawsuah in Pe Tu Naute Jesuh (sim tu Rev. Fr. Lucas Sum), December 2, 2020.

Thlawsuah in Pe Tu Naute Jesuh

Thuthangtha sim tu Rev. Fr. Lucas Sum

December 2, 2020

          Zumtu u le nau, hmaisa an nan zaten Sweet December tiah thlaza ka lo cam sak.

          Tui ttumah Bawi Jesuh hnen ih a feh tu pohpoh thlawsuah ngah lo, zo hman an um lo a si, “Thawhsuah in Pe Tu Naute Jesuh” timi thu tawi ten kan ruat tlang hrih uh si. Hmaisa ah Baibal cangtlang kan ngai ta pei.

          Mt 15:  29-37 (Jesuh in mitampi a dam ter)  Jesuh in mi thawngli rawl a dar

          “Jesuh cu cu tawk ihsin a suak ih Galili Tili kapin a feh. Tlang parah a hung kai ih cun ah a to. Mitam ngaingai in a mah cu an pan. Ke awl, micaw, mizeng, ttong thiamlo le a naa mi tampi an rak hruai ih Jesuh ih ke hramah an ret. Jesuh in an zaten a dam ter. Tthong thiam lo mi an ttong thei, mizeng an dam, ke awl pawl ttha ten an feh thei ih mitcaw pawl tla in, khua an hmu sal kha, mipi in an hmuh tikah an khuaruah a har ngaingai ih Israel Pathian an thangtthat.”

          Zumtu u le nau, tu cu, Adventu caan kan lut thlangih a rei hlan ah Christmas caan a ra tleng ding. Ih, Runtu pa, Messiah, a rat tikah ziang vek laksawng in pe ding a si, timi Matthai in a ca thiang hlim sung in in sim a si. Mitu ih kan theih vek in Jesuh hnen ih ka feh a si ah cun ka dam tengteng ding a si, timi zumnak nei ih a feh tu an zaten an dam ttheh. Jesuh in damnak a pek ttheh. Riah sia ih kir sal pakhat hman an um lo. Curuangah mipi pawl khal a lung awi tuk. Kan Baibal in hitin in sim, mipi pawl in midam lo pawl an Jesush ih a dam ter ttheh an hmuh tikah an khuaruah a har ngaingai ih Isarel Pathian cu an thangtthat a si, a ti. 

          Himi fang te ah hin, kan hrangih thil thupi pathum kan hmu: a pakhatnak ah, mi damlo pawl in Jesuh hnen ih “zumnak” an neih mi te a si. Cun a pahnih nak ah Jesuh in mi damlo pawl zangfah lainatnak thawi “damnak” a pek timi a si. Cun a pathumnak cu damlo pawl an damtikah mipi in “Pathian an thangtthat” timi a si. 

           Cun Jesuh in damlo pawl damnak a pek lawnghi tawk a ti hrih lo. A hnen ih a rat tu hmuahhmuah thlawsuah co ter a duh. Matthai in hitin in sim, “Jesuh in a dung thlun tu pawl kha a hnen ah a koih ‘Himi pawl hi ka hnenah ni thum sung an um zo ih, rawl ei ding zianghman an neih lo ruangah ka zaang an fak ngaingai. Rawl do ta lo ih tlun ter cu ka duh lo, lamzin ah an ttamsawl ding, tiah a ti.”

          Asinan, dungtlun tu pawl cun, ee, milai hi zat, rawl daar dingah hi ramtthing ah ziangtin so rawl kan lak ding, an ti. Jesuh in mangbangza a tuah ding a si timi an theih lo ih ruangah an khuaruah a har. An awlok a song. 

          Cutik ah Jesuh in a dungtluntu pawl cu “sang reu ziangzat so nan neih,” tiah a sut.

           Sangreu hlom sarih le nga pa hnih lawng a um, tiah an ti. 

          Jesuh in misenpi cu leilungah a to ter hai ih sangreu hlom sarih le nga malte cu a lak ih Pathian hnenah lungawi thu a sim. Cun a phel ih a dungtluntu pawlin mipi hnenah an zem. An zaten an ei ih an khop zet. Cule an hlah mi kha dungthluntu pawl in an sarih bawm sarih a khat, tiah kan Baibal sungah kan hmu.

          Zumtu u le nau, a tawi zawngih kan sim asilen, tui ttum ih Baibal kan ruah khawm mi sung ihsin a ra suah ding mi Naute Jesuh in kan ruangpumpi damnak hrangah siseh, kan thlarau damnak ding hrangah ah siseh catlo in thlawsuah pek in duh ringring timi a si.

          Thuthangttha ngai tu nan zaten, in rundam tu Naute Jesuh in nan umnak cio ah van thlawsuah le lei thlawsuah tampin lo pe hram seh, Amen.