Thil linglet pawl (sim tu Rev. Fr. Joseph Ro Nei Thang), December 4, 2020.

Thil linglet pawl (sim tu Rev. Fr. Joseph Ro Nei Thang), December 4, 2020.

Homily for Friday

Bawi Khrih ah duhdawtmi nu le pa, u le nau pawl, “kan Bawipa Jesuh Khrih ih zaangfahnak veel, Pa Pathian ih duhdawtnak le Thlarau Thianghim ih pumkhat sinak pawl cu nan zate thawn um hram seh” tiah cibai ka run lo hai. Tuihni cu 2020, December thla ni 4 ni, Tlawngkai ningani asi. December thla ni 4 ni asi vekin St John Damascene ih puaini asi. Himi hmin latu hmuahhmuah hnenah “Happy feast deast day” tiah cibai ka run lo buk hai. Tuihni ih kan siar dingmi Pathian ih ttongka pawl cu Isaiah 29:17-24 tiang le Mt 9:27-31 tiang pawl tla ansi pei. Tuihni kan ruah khawm tlang mi pawl tla cu “thil linglet pawl” tiah asi ding.

Tuihni kan siarmi Pathian ih ttongkam a voikhatnak ah “Tupi cu lo ramah a cang dingih loram cu tupi ah a cang sal ding. Cuih ni a thlen tikah hnaset pawlin ca-uk an siarmi kha thang zetin an thei ding. Caan reipi khawthim sungih a um zo mi mitcaw pawlin an mit an meng dingih khua an hmu thei ding. Mifarah pawl le lung nemmi pawlin Israel ih Pathian thianghlim pekmi lungawinak cu an co sal ding. Midang a hmuhsuamih a hremtu pawl le Pathian zianghman a siarlotu pawl cu an cem ding. Misual hmuahhmuah cu siatsuah ttheh ansi ding. Midang a thangsiattu mitthalo pawl hrem a khamtu le mifel pawl an fehnak vekin thuhman coter duhlo ah thuphan a pertu pawl cu Pathian in a siatsuah ttheh hai ding. Mi-aa pawlin thil thei thiamnak an nei dingih a phunzaitu le a tlok ciar ringringtu pawl khal lungawi zetin an zir thei ding asi” tiah Pathian in mi a runnak le a cawisannak thuhla pawl kha Prophet Isaiah 29:17-22, 24 ah kan hmu thei asi.

    Fr Peter Thawng Hmung Thantlang ah tawan a ciah lai ah a parish khua pakhat ah an lo thlawhmi rawl an pattha lo, an sumdawngmi pawl tla an sung, cun a dang an ttuanmi tete pawl tla an hlawnhtling lo. Cumi khua ahcun kanmahih Kawhhran cu inn 2 te lawng ansi. An khua cu Baptist ho deuh ansi. Baptist kawhhran upa pawlin “RC puithiam pawlin kan khua thla in cam sak sehla kan ziangzongza kan hlawhtling ding” tiah an ruatih thlacam sak dingah zaangfah an dil. Cutin cun a cuih khua ah Khrih Siangpahrang puai timi civui puai kha sunglawi zetin an tuah. Vok pawl, caw pawl an thatih puaipi an tuah asi. An pastor pawl tla lungawi zetin an quarter ah siangbawi pawl an tlungter. Sister pawl tlunnak tla inn ttha zetin an tuah sak. Zarhpini ah puaipi an tuahih an zatein kan biaknak ah an va khawm ttheh. Zanlam ah tla khaw sungah Bawipa thi le sa vah pinak siseh, cun Bawinu Mary tla an nubu pawlin an phurih khaw sungah an vakih thla an cam. Lungawi tha nuam zetin le hlunghlai zetin puai an tuah. A cuih kum cu an hnattuan mi hmuahhmuah an hlawhtling zet sal. Thluasuah an co ngaingai asi. Lo tuahtu pawl kha an tlanglo fang pawl an vui ttha nasa asi. Khami lai ahcun kut merh telephone san lai asi. Ram dangih a ummi fapa pakhat in an khua ih a nu kha phone a biakih a nu tla phone a ra tikah “hello….” tiah voi tampi a ti rero nain a phone kaai daan a hmanlo. A linglet pi in ph a kaai ih phone ttuanvo neitu in “ka pi na phone cu a linglet pi in na kaai si” tiah lam hla deuh ihsin a ti. Cutikah kha pitar nu in a ttongmi a hman lo ah a ruat ih hello ihsin “lohe” a ti ciamco. Linglet a rak si ve. Phone neitu in ttha tein a tuah sak sal ih a fapa thawn an bia aw thei asi. Hello ihsin Lohe buainak asi. 

Thil linglet um daan pawl hi nitin in kan rak tong ringring mi pawl ansi. An ttong ah siseh, kan ttuannak le kan um daan pawl siseh, kan zoh daan le kan hmu daan pawl tla siseh, midang pawl thawn pehtlaihnak kan nei tikah siseh thil linglet pawl a um ringring mi pawl an si asi. Thil linglet um daan pawl hi phun hnih a um tiah ka ko duh. Siatnak lamah kan let maw? Tthatnak lam ah so kan let tiah phun hnih in ka hmu asi. Siatnak lam ah kan let pang asile thil tthalo le sualnak le palhnak lawnglawng hi a cemnak yah-lat asi. Tthatnak lamah kan let asi ahcun a cem netnak ah thil ttha lawnglawng hi yah-lat asi ding. 

Zohman Mithianghlim cia in a nu ih pum sung ihsin a suak dahlo, Bawi Jesuh le Nu Mary siarlo ahcun! Kan suah lai ihsin miborhhlawh cia kan rak si asi. Asinain Jesuh Khrih kan zumih Baptism kan ngahnak thawngin kannih tla kan zuam ttentto ahcun mithianghlim ah kan cang thei asi. Cumi cu tthatnak lei ah a tlu mi/ a letmi kan si asi. Kan sual cia na rengreng ih tthatlonak ah kan let asi ahcun kan cem netnak tla misual mitthalo kan si cih ding asi. 

Tuihni ih kan siarmi Bible a voikhatnak ahhin thil linglet hlir hi asi. Thing thawn a khahmi tupi cu loram ah a cang ding. Loram khal tupi ah a cang ding. Hnasetmi pawlin thawmvang an thei dingih thawmvang a thei cia tu pawl tla hnasetmi ah an cang ding asi. Mitcaw pawl tla khua an hmu dingih khua hmutu pawl tla mitcaw ah an cang ding. Mifarah pawl le lung nemmi pawlin Israel ih Pathian thianghlim pekmi lungawinak cu an co sal ding. Midang a hmuhsuam, a hremtu pawl le Pathian zianghman a siarlotu pawl cu an cem ding. Misual hmuahhmuah cu siatsuah ttheh ansi ding. Midang a thangsiattu mitthalo pawl hrem a khamtu le mifel pawl an fehnak vekin thuhman coter duhlo ah thuphan a pertu pawl cu Pathian in a siatsuah ttheh hai ding. Mi-aa pawlin thil thei thiamnak an nei dingih a phunzaitu le a tlok ciar ringringtu pawl khal lungawi zetin an zir thei ding asi” tiah kan hmu thei asi.

Tuihni kan siarmi thuthang ttha sungah tla mitcaw pahnih in Bawipa hnen ihsin damcahnak an ngahih Pathian an thangtthatnak thu kan hmu asi. Mitcaw din hmun ihsin khua hmu theinak dinhmun ih an thlen kha kan hmu thei asi. Kannih teh kan hmu na cingin hmu lo vekin kan nung maw? kan ttong thei ko nain ttong thiam lo vekin kan um maw? Mi ih ttongmi kan thei ko nain sawn duhlo in kan hna kan setter men maw? Thil ttha tuahnak dingah kan kut le ke pawl kan hmang maw? Asilole thil sia tuahnak dingah so kan kut le ke, kan mit le hna, ka hnar le kan hmur pawl kan hmang. Bawipa nih kut le ke, ruang pumpi him dam tein in pek nain ziang siarlo in kan um pang maw? 

Bawipa kan hngah lai ah khulhfung lo tein thil ttha tuah cu zir thlang uhsi. Isaiah 1:16-18 ah “Thiangfai zetin kholh uh; ka mithmuh ih nan tuah rero mi thil sual pawl hi bangsan thlang uh. Asi, thil tthalo tuah cu bang thlang uhla thil ttha tuah cu zir thlang uh. A dikmi hawl uh; hremnak a tuartu pawl bawm uh; nu le pa neilo ngakttah pawl bawm uhla nuhmei pawl cu ttanpi uh. Ra uh, kan ruat hnik pei! Nan sualnak cu sen-eu bangin sen hman sehla vur bangin ka lo thiangfai ter ding; sendup bangin dup hman sehla tuuhmul bangin ka lo vaarter sal ding” tiah Cungnungbik Bawipa keimah in ka sim zo” in ti asi. 

Naute Jesuh suahni timtuahnak hrangah siam tharmi rak si thlang uhsi.

Ziangzongzathiltitheitu Pa le Fapa le Thiang Thlarau in nanmah zate cu thluasuah lo toih hram seh. Amen.