Christmas Laksawng le Mi Nunnem (sim tu Rev. Fr. Lucas Sum), December 9

Christmas Laksawng le Mi Nunnem

Thutthangtha sim tu Rev. Fr. Lucas Tha Ling Sum

December 9, 2020

          Zumtu u le nau, Nan zeten Merry Christmas tiah RVA ihsin thlaza ka lo cam sak!

          Tuittum ah Christmas laksawng le mi nunnem timi thu tawi ten ruat khawm tlang hrih uh si. Hmaisa ah Baibal cathianghlim kan siar ta hrih pei.

Mathai 11: 28-30 “Thilrit a phur mi le zonzaih a tuar mi pawl, ka hnen ah ra uh, colh damnak ka lo pe ding. Ka kawn hi pur hnik uh, Kei cu nunnem le tangdornak thinlung nei mi ka si. ka hnen ihsin zir uh la colhdamnak nan ngah ding. Ziangah tile kei ih kawn phurh cu a nuam ih ka thil khal a zang a si, tiah a ti. 

         Zumtu u le nau, tuih kan siar mi baibal ca tlang te hi a tawi zet. Asinan, kan hrangah a tha tuk; man a nei tuk, hmual a nei tuk. Himi sung ihsin Bawi Jesuh ih tongkam pahnih in tawiten kan ruat tlang pei. A pakhat nak ah, Bawi Jesuh ih ttongkam tampi lak ihsin “ka hnenah ra uh; colh damnak ka lo pe ding” a timi te hi kan hrangih a tthabik mi le a thlumbik mi Bawi Jesuh ih in duhdawtnak ttongkam a si. Leitlun ah hin thinglung bang le thinlung rethei lo, zo hman, kan um lo. Thinlung rethei mi lawnglawng kan si. Tahtthimnak ah, leitlun ih hmin thang American tamadah ttuan tu pawl hi an nuam tuk ding, tiah, mitampi in kan ruat men ding. Asinan cat lo bang lo in an nuam thei ve lo. Tufang ih American President Donald Trumh le Tamada lawng Joe Baiden ziang titluk in an thinlung a bang pei? Cuvek thotho in tuilai natsia COVID 19 ruangah leitlun mi kan zaten thinlung rethei zet in kan um cio. COVID 19 natnak ka ngah pang pei maw? Sii theh an tuah thei hrih lo maw si? An va rei ve, kan ti. Kan thinlung a bang tuk.

         Cun thlarau lam ih kan zoh khal asilen zo hman thianghlim le famkim ngaingai kan um lo. Curuangah kan thinlung a bang tuk. kan re a thei tuk. Ahleice in mawhnak le sualnak tumpi kan nei sinsin a si ah cun ka sualnak hi Pathian in i ngai thiam cawk pei maw? Thlawsuah co tlak teh ka si nawn pei maw? Rundamnak teh ka ngah thei pei maw? Tiin riahsia le thinhar zet in kan um ttheu. Asinan, Bawi Jesuh in in duhdawt tuk it ruangah “ka hnen ah ra uh, colhdamnak ka lo pe ding a si”, in ti. Zumtu u le nau, hmun dang le thil dangah colhdamnak hawl loin a mah Bawi Jesuh hnen rori ah, feh in, pan uh si. A maih in kamnak bangin “colhdamnak” in pe tengteng ding, a si.

         Cun a pahnih nak ih Jesuh ttongfang kan ruah khawm dingmi cu, Bawi Jesuh ih in simmi “Kei cu mi nunnem le tangdornak nei mi ka si, ih, kan hnen ihsin zir uh la colhdamnak ka lo pe ding a si,” inti mi hi a si. Bawi Jesuh in thinbang le phurrit  ih a um mi kan hnenah ra uh ‘colhdamnak” a lo pe ding a si, tiah fiangten in sim. Asinan, ziangmi in sim bet a si tilen, ka nun pakhat te cu i cawnguh in ti. Cumi cu ziang si pei? “Mi nunnem le mi tangdor ka si,” in ti. Tuih kan tikcu le caan kan zoh a silen Adventu caan sungah kan um. Messiah in runtupa kan hngah rero laifang a si. Cumi runtupa Messiah cun ziang in pe ding a si tilen “colhdamnak,” a si. Cuih colhdamnak cu zo pawl in, an co pei. Mi nunnem le mi tangdor pawl in an co ding a si.

        Zumtu u le nau, tuittum ih kan cathianghlim a tawi zawngin kan sim a silen, naute Jesuh ih laksawng, Christmas ih laksawng ‘colhdamnak’ co thei dingin mi nunmen le mi tangdor kan si, a ttul tinak a si.

        Jesuh I in kam mi laksawng colhdamnak co thei dingin siseh, nunnem le tangdornak thinlung nei thei tu si dingin siseh, a rei hlan ih a ra suak dingmi naute Jesuh nan zaten, thlawsuah lo pe hram seh. Amen.