Tipil petu Johan ih Ropitnak (sim tu Rev. Fr. Dominic Hnin)

Tipil petu Johan ih Ropitnak

Thuthangtha sim tu Rev. Fr. Dominic Hnin

Hngah caan Zarh hnihnak, tlawngkai nili ni (Dec. 10, 2020)

Siarding: Is 41:13- 20; Ps. 145:1, 9-13; Mt. 11:11-15.

• Tuisun kan siarmi Thuthangttha ih "kiangkap" zoh hmaisa sehla a ttha ding. Bawipa Jesuh cu khuakhat hnu khawkhat a feh ih thuthangttha a phuang. Cui thu cu Johan in thawnginn sung ihsin a rak theih tikah a dungthluntu pawl cu Jesuh ih hnenah a hei thlah ii, "a ralai ding mi Messiah na si maw?" ti-ah a va suhter. Cui dungthluntu pawl an kir in Bawipa in mipi hnen ih thu a simnakah Johan ih thu a rel. Amah lawngte Johan ah cawl lo-in hmai ah a feh bet. "Nunau ih hrinmi lakah mi tumbik a si." Hmanseh, "vancungram ih a fatebik hman a tia hrih lo" a ti.

• Johan ih thu a rel duh ruangih a ttongmi si lo-in mipi in an hmuitinmi an hlohter thluh zik ruangah ralrinnak a pek a si sawn. Mipi cun vancungram - Bawipa Jesuh - an hawl lai ah vancungram cu amah Bawipa Jesuh ah a hmun timi theithiam lo in vancungram zin a rak sialtu Johan ah an thinlung a taap ta. Curuangah Bawipa in himi thu a relnak a si.

•  

• Mipi cu nelrawn ram ah Johan zoh dingah le a thusimmi ngai dingah an rak feh. Curuangah Bawipa in mipi pawl cu thu a sut hmaisa, "nelrawn ah ziang zoh ding ah nan feh?" a ti. Bawipa in an fehnaksan a theilo a silo, a thei. Asinan tu-ah an mit hmai ah Johan hnak ih tumsawn a um. Johan ih rak sim rero mi pawl famkim tertu ding a um. Cumi cu mipi in thei hai seh ti a duh.

• Kawl ttong ih "အရိပ္ျပလုိ႔အေကာင္ျမင္" timi "a thlam an lo hmuh a si le, a mi ngai hmuh ding" kha a sim, a thluathlam an lo sim a si le a simduhmi thei aw" ti a si ko. 

• Kan Bawipa ih thu simmi a ra ngaitu pawl lakah Johan ih dung a rak thluntu tampi an tel. Bawipa in vancungram thu a sim tikah mi tampi cun cui vancungram thu kha an thinlung ah lut lo in Johan ih sunlawizia le ropit zia kha an ruat sawn. Mipi pawl ih thinlung cu Johan ah a taang ih amah Bawipa a rat ngaingai tikah an rak thei nawn lo.

•  

• Kan mai dinhmun vawn zohaw duak sehla, kamah bulpak cio khal kan thil tummi ih a sung muril hlen suak hlanah, a phawhawng ah kan buai mai thei. Tu fang ih kan dinhmun thawn vawnzoh sehla mi tampi in Christmas caan ti ah kan nuam aw ciamco ih amah Bawipa Jesuh, naute Jesuh hmuak ngah lo-in, nuamnak in kan caan kan her liam ter ttheu.

•  2011 kum, December thla ah Malaysia ka rak tlawng. Kan theih vekin Malaysia ram cu Muslim pawl tamnak ram a si vekin Kuala Lumpur khawlipi ah Christian an tam tuk lo. Asinan, an dawr pawl kan feh tikah Christmas caan ih  kan hman ttheumi pawl thawn an ceimawi nasa. Ziang ruangah? Annih ih hrang ahcun naute Jesuh ti vek an thei lo, an theihmi cu paisa naghnak a si. Mipi thinlung hip in an dawr thil an zuar thei didng a thupi. Cumi duhah a si bik.

• Bawipa ih thu simmi a ra ngaitu pawl khal cuvek deuh an rak si. Messiah an hmuah laiah a zinsialtu lehlam ah an lung a rak hlo ii Messiah an rak thei nawn lo. Curuangah Bawipa in Johan ih ropit zia sim phah in Johan hnak ii tum sawn hinah a um ti a sim.

• Bawipa in John the Baptist cu "nunau hrinmi lakah mi tumbik a si" a rak ti. John cu mi upa, mi hlawhtling, mi ropi sidingah a tlak hrimhrim. Ziangah tile

  • (1) (Lk 1:5-17) John cu a suah hlan ihsin hrilcia a rak si;

  • (2) (Lk 1:76, 80) Pathian ih Prophet ti ih kawh a si ih taksa le thlarau lam khalah a tthangso vivo;

  • (3) (Mt 3:5-6. Jn 1:35) a dung thluntu khal a nei;

  • (4) (Mt. 14:3-12) thudik thuhman duh ah a ttongmi a thihpi ngam;

  • (5) John cu Messiah hrangih lamzin a rak sialnak ah hmin a ngah zet. A hmin a thang vivo ih mipi cun amah kha Messiah a si hmang ti tiangin an rak ruat. Asinan tangdornak thawn "kei cu Messiah ka si lo, a lamzin sialtu men ka si (Jn 1:23, 36)" arak ti aw ngam; 

  • (6) amai hlawknak ruat lo-in, "zoh uh! Pathian ih tufa khi" ti ah a khih hmuh ngam. Hitivek ih a felnak, a tangdornak le dingnak ruangah John cu mi ropi hrimhrim a si.

• John cu Bawipa ih ratnak hrangah lamzin sialtu a rak sinak ruangah mi cungcuang, mitum a rak si, a hleice in "lamsialtu" a sinak ah rinum zet in hna a rak ttuan ih Bawipa a rat tik khalah "anih cu a tthangso ding ih kei cu ka ttumsuk ding (Jn 3:30)" ti tiang in a rak ti thei.

• Messiah a rat hlan ah Elijah a ra hmaisa ding ti ih mipi ih an rak hngahhlap rero lai-ah Bawipa in Elijah cu a ra zo ti ah John cu ttongkhum in a rak ti. Prophet hmuahhmuah lakih maksakbik Elijah dinhmun luahtu a sinak ah John cu a ropi nasa. Cutitluk ih mi ropi hman cu Bawipa in vancungram ih a fatebik hman a tia hrih lo a ti. 

•  

• Kan Bawipa Jesuh in, "khuahlan ihsin Johan san tiang prophet pawl le Moses daan pawlin hi vancung uknak thu hi an sim (Mt 11:13)" a ti. Himi catluan le ttongfang ahhin Bible hlun cu a huap thluh ii, kan rundamnak thuanthu khal a rel cih. John ih san a thlen hlan sungcu prophet pawl ih simsungnak san a si ih, John ih san a thlen hicun cui rak simsung cianak pawl famkimternak san a thleng. Ziangah tile amah Bawipa in cui simsungmi pawl cu a famkimter ding ruangah a si.

• Bawipa in prophet pawl ii simsungnak pawl a fimkimter ding kan ti mi cu amah Bawipa thawn vancung uknak cu leitlun ah a rawn thlenter ding ruangah a si. Cumi ruangah Johan ih tumnak, ropitnak le mi cuangce asinak pawl cu vancungram ih a fatebik hman a tia hrih lonak a si.

• Johan cun Messiah ih rat ding thu a rak phuang in lamzin a rak sial rero ko. A rat tik khalah "Pathian tufa khi zoh uh" ti ah a rak khih hmuh ko. Cun Jordan tiva ah amah Bawipa cu Tipilnak a rak pek ih Bawipa ih sunlawinak cu a rak hmu ve ko. Asinan, Bawipa ih sunlawinak bik a simi Calvary tlang parih a thihnak, thihnak ihsin a thawhsalnak pawl cu a rak hmu man lo. Cumi ciahah, Johan ih vansiatnak, vanmi fatebik hnak ih a fate deuhnak a si. Vancung uknak cu a va ropi emem ve.

•  

• Nang khal cutluk ii ropitnak vancungram thlen na duh a si le, lamzin ah na lumleng lo, khul fung lo le vaivuan lo-in; Johan ah taapta loin, na tumtahmi Messiah cu hmuak ngah tum aw.