Pathian ih zirhmi thlunnak (sim tu Rev. Fr. Joseph Ro Nei Thang), December 11, 2020.

Pathian ih zirhmi thlunnak

Thuthangtha sim tu Rev. Fr. Joseph Ro Nei Thang

December 11, 2020.

Siarding: Isaiah 48:17-19; Mt 11:16-19

          Leiltun khuazakip ihsin Christmas puai a hngakhlaptu Bawi Khrih ah duhdawt zetmi nu le pa, u le nau pawl, kan hngak rero mi Naute Jesuh Emmanuel Bawipa hmin in cibai ka run lo buk hai. Tuihni cu 2020, December thla ni 11, Adventu Kar hnihnak, Tlawngkai ni 5 ni asi. Cun December thla ni 11 cu St Damasus ih puaini tla asiih Damasus hmin latu hmuahhmuah, nan zatein Happy feast day tiah tla cibai ka lo buk hai. Tuihni ih siar dingah in khiahmi Pathian ih ttongkam pawl cu Isaiah 48:17-19 tiang le Mt 11:16-19 tiang pawl tla ansi pei. Tuihni ih kan ruah khawm tlang dingmi cu “Pathian ih zirhmi thlunnak” tiah asi pei.

          U le nau pawl, tuihni kan siarmi Bible a voikhatnak hi kan siar tlang cio hrih pei. Isaiah 48:17-19 ah Israel ih Pathian thianghlim, a lo Runtu Bawipa in “Keimah cu Bawipa nan Pathian ka si. Nan tthatnak dingah a lo zirhtu le nan fehnak ding lamzin ah a lo hruaitu ka si. Ka thupekmi pawl nan ngai asi ahcun nan parah thluasuah malsawm cu ziangtik hmanih a kaang dahlomi tiva bangin a luang ding. Nan hnenah nehnak cu tifinriat kapih tilet a thlen cingcing bangin a thleng ding. Nan tefasin pawl cu tipikap ih vunnel zat ansi dingih leitlun ahhin a hloral mi nan si lo ding” tiah ati.

          Pathian ih thupekmi a ngailotu Adam le Evi te hi Pathian in a ngaithiam lo ih an umnak Eden ihsin a dawi suak hai asi. Pathian duhlonak a tuahtu pawl cu Pathian in tiliknak thawn a siatsuah ttheh hai ih Pathian ih thu a oitu Noah te innsungsang lawng an tang asi. Pathian ih thu a ngailotu Sodom le Gomorrah te hi Pathian in a zahpi hailo ih meisa thawn a siatsuah ttheh asi. Pathian ih thupekmi a thlunlotu Lot ih nupi tla citthuam ah a cang dah asi. Pathian ih thupekmi a thlunlotu Israel miphun pawl hi nelrawn ramcar lakah an thi ttheh asi. Pathian ih thupekmi a thlunlotu puithiam Eli tla a puithiam ihsin in a hnongih amah ai ah Samuel a hril sawn asi. Pathian thupek a thlunlotu siangpahrang Saul tla a lal sinak ihsin a tthum hai asi. Pathian ih thupek a thlunlotu siangpahrang Solomon tla Pathian a uknak ram cu tthen hnih ah a canter asi. Pathian ih thupekmi ziang a siarlotu siangpahrang Ahad thih sia thawn a nunnak a cemter asi. Pathian ih thupekmi a ngailotu Israel miphun pawl tla an uktu siangpahrang le pawl thawn Babylon ram ih saltannak ah an thleng asi. Pathian ih thusim a ngailotu Babylon siangpahrang Nebuchadnezzar tla kum sarih sung cawcang vekin a cangih hrampi ei in le daihnem lakah a tlangleng dah asi. Pathian a ttihzahlotu Nebuchadnezzar ih fapa Belshazzar tla Pathian in a nunnak a cemter ih a ummi ram tla Medes le Persia pawl a pek thluh hai asi.

          U le nau pawl, tuih caan cu Adventu caan asi vekin Bawipa a rungttumnak cu sunglawi zetin hmuak ding kan si asi. Curuangah timtuah kan ttul ngaingai asi. Advent caan cu timtuah caan tiah tla kawh thei asi. Tim kan tuah tikah a lenglam timtuahnak a um vekin a sunglam timtuahnak tla a um asi. Biakinn kan ceih, kan umnak inn pawl kan ceih, puai tuahnak hrang ttilva le inn zuat sumhnam pawl kan rangril cia, carol zanvahnak pawl kan tuah, Kohhran dang ansi le cu an Biakinnpi ihsin Christmas thuthang phuannak an nei ttheu: cumi pawl cu a lenglam timtuahnak ansi. A lenglam timtuahnak cu zopoh ih tuah theimi asi. Christian tengteng a ttul lo asi. A sunglam timtuahnak cu thlarau lam timtuahnak asiih Christmas Novena kan tuah, thla kan cam, supnak kan nei, tangdornak, duhdawtnak, zaangfah zawnruahnak, peksannak pawl kan nei tivek pawl tla ansi. A lenglam timtuah cu a ttul zet ve ko nain a sunglam timtuah cu a thupi sawn lawllaw asi. 

          Himi timtuah caan ahhin Pathian nih in zirhmi le in simmi pawl tla ttha tein kan thinlung sungah khumin kan nuncan ziaza ah telh cih in thlun uhsi. Isaiah 2:3 ah “Bawipa ih tlang ah hung feh uhsi. A lamzin kan zawh theinak dingah le a duhmi pawl in zirh theinak dingah Jacob ih Pathian Biakinn ah feh uhsi. Ziangahtile Bawipa ih thuzirhmi cu Jerusalem ihsin a ra; Zion ihsin Bawipa ih daan pawl in zirh asi” tiah asi. Biakinn lam ah khawm in Pathian in a duhdan in zirh dingih in zirhmi kha thlun theinak dingah thazaang kan nei thei ding asi. 

          Bawipa ih thupek kan thlun, a thuzirhmi pawl kan ngai ih kan thinlung sungah Bawinu Maria vekin kan khum asi ahcun thluasuah kan co ding asi tiah tuihni kan siarmi Bible a voikhatnak ah “Nan tthatnak dingah a lo zirhtu le nan fehnak ding lamzin ah a lo hruaitu ka si. Ka thupekmi pawl nan ngai asi ahcun nan parah thluasuah malsawm cu ziangtik hmanih a kaang dahlomi tiva bangin a luang ding. Nan hnenah nehnak cu tifinriat kapih tilet a thlen cingcing bangin a thleng ding. Nan tefasin pawl cu tipikap ih vunnel zat ansi dingih leitlun ahhin a hloral mi nan si lo ding” tiah asi. Cumi cu tuihni kan siarmi Saam hla in tla in tthohkhan asi. “Bawipa ih thupek mi a thlunnak ah lung a awitu pawl cu tiva kapih a khomi thingkung, a tikcu ih a rahmi le a hnah tla a vuai dahlomi thingkung vek asi. A tuahnak tinkip ah a hlawh a tling ding asi” tiah Ps 1:2-3 ah in zirh asi. Cuhlei ah Pathian nih in zirhmi thu pawl kan ngai, kan thlun asi ahcun ziangtin thluasuah kan co ding timi le kan thlun lo ahcun ziangtin siatcamnak kan ngah ding timi pawl cu Daanpeksalnak 28 ah fiang zetin in sim asi. 

          Bawipa ih thuzirhmi cu kan thlun dingmi asi, ziangahtile Ps 119:105 ah “Pathian ih ttongkam cu ka ke hrangah mei-inn asiih ka lamzin hrangah tleunak asi” tiah in ti. Lamzin in hmuhtu asi ti duhnak asi. Bawipa ih thuzirhmi ah daithlang men ding kan si lo asi, ziangtile Ps 119:102 ah “Na thuzirhmi pawl cu ka daithlang lo, ziangahtile I zirhtu cu nangmah na si ruangah asi” tiah in zirh. Cun Bawipa ih thuzirh cu a thlum zet fawn. Ps 119:103 ah “Bawipa ih thupekmi pawl cu an thlum zet; khuaitizu hnak in an thlum sawn asi” tiah thazaang in pek bet lai asi. Bawipa ih ttongkam pawl hmunkhat tein khummi/record mi cu Bible cathianghlim ah a cang asi. Pathian ih duhmi a tuahtu pawl le a thlunsuaktu pawl cu Jesuh Khrih ih u le pa, u le nau pawl ah kan cang ding asi. Pathian ih duhmi kan tuah ahcun Pathian uknak kan co ding asi. Bawipa, Bawipa ti men in a ngahlo asi tiah Bawipa Jesuh nih in zirh fiang. 

          Ttognkam cu minung ah a cangih kanmah hnenah tla a um asi. Cumi cu kan hngakhlap zetmi Christmas ih a thupibikmi a rak si asi. Missa raithawinak ah Bible asimi Pathian ih ttongkam cu kan siarih Biakttheng parah cun minung ah a cang ih cumi cu kannih nih kan sannak thawngin amah cu kan hnenah a um asi. Leitlun cemnet tiangin in umpi ding asi.

Kan hngakhlap zetmi Naute Jesuh in thluasuah lo pe hram seh. Amen.