December Thla Lung Eer Thla (sim tu Rev. Fr. Polycarp Thawngte), December 13, 2020.

December Thla Lung Eer Thla

Thuthangtha sim tu Rev. Fr. Polycarp Thawngte (Advantu Zarh (3) nak Zarhpini     

Siarding: Is 61:1-2a, 10-11; IThe 5:16-24; Jn 1:6-8, 19-28

          December thla lole Advantu-caan cu Christmas boruak ti sehla a sual lo ding.  Kum dang vek sisehla cu hmun tinkim ah Carol-singing thawn innlak toih rero ding a si nan tuikum cu dai ttheptthi teih kan um cio zum a um. Keimah bulpak ahcun ka lungkimzet mi lole, ka nun sungih ka lung i khoihbikmi Christmas a si sawn in ka ruat.  Ziangahtile kumdang ah cun midang hrangah nuamnak thuthangtha phurtu le aupitu ti’n kan rak cangvai theu (ahleice in mino pawl). Tuikum ah cun lenglam lungawinak langter hnakin sunglamih lungawinak hmu dingah Christmas ru’re hnuaihni umlo in mah le innsung, sungkua ciar-ah daiziar ih kan hman ding caan a ra thleng aw. Ka hrangah cun Covid lakih lungawinak thotho! Advantu ih muril taktak khal cu sunglam timtuah awknak sawn a si.  Curuangah kan thutlangpi ah “December thla, Lung eer thla” ti ka duhnak san a si.

          Ka lungkim tak bik pakhat ka ron lo hlawm duh bik mi cu kan dung Dec. 8 zaan in thokin Catholic Artist kan neihsun pakhat a simi Freddy Lynn ih hoha in Yangon City Clause ti’n Christmas laksawng pek a duhmi hmuahhmuah ih laksawng pawl cu mifarah, mizonzaih, le mitlasam pawl hnenah pek vivo asi. Carol-singing kan vah mi hi hitivek ding si thei sehla tihi ka tlangvallai/ brother lai ihsin ka rak ruah theumi a si-ih Parish Siangbawi ka si hnu khalah ka zirh phah nan tu tiang cu duhvek ka tlin theilo. Aruang pakhat cu hruaitu hrekkhat pawl rori in kan ruat thiamlo, kan theithiam tum lo mi hi a si phah.  Parish ah ziangkhal le ziangdang laksawng kan pek thei silo keimah ka lo vah pi kei, innsang thlasuah peknak ka lo hman sak ding ti’n mino pawl ka sim. Kan vah thok zaanah mikhual Deacon-1 in in thlun ih, “Hivek Carol-singing vahdaan ka thei dahlo, a nuamlo em mai,” a ti-ih in tlun san dah ta. Tuikum talah tha te’n kan ruat sal pei uh. Christmas hi fund hawlnak caan tha ih rak hmang tla kan um dah men ding. 

          Carol-singing innlak vah hi kan fund hawlnak sun a si ah cun mi bang lo bik kan si ding. Christmas cu peknak a si. 2016 kum ih himi hla ka tuah lai-ah Studio neitu pa in “Sayapa, na hla cu kan rak nunpi rero mi a si” in ti dahmi ka rel theu. Yangon City Clause vekih laksawng peknak picang zetih kan tuah theilo hmanah kanmai ti thei tawk te’n kan dinhmun thawn mil aw in mitlasam tuk pawl hnen tal ah zem thei ve ding zuam uh si tiah sawm awk ka duh.  Ahleice in mino pawl, “Sancta Clause” Christmas putar khi laksawng dongtu ding silo’n laksawng petu sawn a si tihi tuikum tal in kan nunah lang ter thei kan tum pei uh. Pathian zaangfahnak in hmaikum ah cu kumdang vekin Christmas kan tuah thei leh sal ko ding. Tuikum cu lungeernak, ruahawksalnak, cekfelawknak caantha ti’n ruat tlang uh si.

          Tuini kan Thuthangtha sungah Johan Baptist in a tlang aupi mi hi a nunpi taktak ti kan hmu fiang thei a si. Tuhrawng kan siarmi Bible hlun cu Isaih lawnglawng hi a si-ih Johan in “kei cu Profet Isaiah in Bawipa ih fehnak lamzin kha ding ter uh ti-ih ramthingih a au-mi aw kha ka si” a ti. Himi a rel lawng tawk lo in “Messiah na si lo ih Elijah le Profet khal na si fawn silo ahcun ziangah so baptism na pek?” an ti tikah, “Kei cun tidai in baptism ka lo pe nan, nan lakih a ummi nan theih hrih lomi pa cun ka dungah a ra lai; a kedam hri phoihtu hmanah ka tlak lo a ti.” Cuih hnakih thinniamnak ka tong thei nawn lem kem? Kannih nun ih cang thei mi sawn cu Thuanthu pakhat kan von rel ta ke. Vei-1 ah hmuithiam mi sakap thei zet tei rualvah an um ti si. Vate (biaing) a burbur ih zam pawl kha kap dingin an bawh. An ra suak ngaingai ih hmui thiam sawn deuhtu a rualpa cun van ta cu a hon kap ti si. A thelh   ih vate pawl cu an zam tluan. Asinan, ka thelh si hmang khal ti paih lo in a rualpa hnenah cun, “Hei, zoh hnik! Vate thi rori a zam thei cu a mak lawlaw” a ti bet lai ti si. 

         Minung kan sinak in kanmai sinak ciah hman hi kan cohlan/Amen ding a har caan a tam phah theu ko ding. Tui kan relmi sung khalih awk aw phah a ngai paih lemlo khal kan um thei.  Ziangti lam khal va si sehla (Is 61:1) hriakculh a si zo mi nang le kei parah Bawipai Thlarau Thianghlim thlengin Farah pawl hnen thuthangtha sim ding le thinlung kuaimi dam ter dingah siseh, ral kaih mi pawl le thawngtla pawl hnen luatnak thu thantu dingah thlah kan si zo. Tuicaan hi kan caan sunglawi sawn a si. Bawinu Marih thawn tuini ih a hlasak mi Saamhla “Ka nunnak/ thlarau in Bawipai a thangthat” timi (Lk 1: 46-54) sak tlang thei tum ve uh si.

          I The 5:16 sung khalah St. Paul in “Lungawi ringring uh; ¹⁷ Cat loin thlacam uh. ¹⁸Ziangvek dinhmun khalah lungawi thu sim uh. Cucu Khrih Jesuh ah Pathian ih a lo duhsakmi a si. ¹⁹Thlarau Thianghlim kha hmit hlah uh” tiah in cah.

          Ziangvek dinhmun ah um hman nungla kan thinlung eer that/ rem that in Bawipai a vei-1nk aratnak Christmas laksawng: Lungawinak, hnangamnak, thinniamnak, thinsaunak thawn ruahsan nak nei in Bawipai vei-2nk a ratnak, kan caan netnak a hngak theitu kan si nak dingin ziangkim ti theitu Pathian in thluasuah in pe hram seh.  Pa le, Fapa le, Thiangthlarau hmin in. Amen.