Nan Hmuh Mi le Nan Theih Mi Va Sim Uh (sim tu Rev. Fr. Lucas Sum)

Nan Hmuh Mi le Nan Thei Mi Va Sim Uh

Thuthangtha sim tu Rev. Lucas Sum

December 16, 2020.

            Zumtu u le nau, 

Nan zaten Merry Christmas, nan hnenah Christmas thlawsuah thleng hram seh, tiah thla ka lo camsak. 

Tui ttuman “Nan Hmuh Mi le Nan Thei Mi Va Sim Uh” timi thu thawi ten ruat tlang hrih uh si. Hmaisa an Baibal kan siar ta hrih pei.

            Lk 7: 19-23 “Bawipa cu ‘Johan in a ra ding tiah a timi cu na si maw, asilolen a dang kan hngak hrih ding maw?’ tiih sut dingah mi pahnih a thlah. Jesuh hnen an thlen tik an nih in, ‘Johan in a ra ding a timi cu nangmah na si maw, asilole midang kan hngak hrih ding so, tiah sut dingah in thlah a si, tiah an ti.

            Culai fangah cun Jesuh in mi tampi an damlonak le an natnak a phunphun a damter ih khawsia ih polh mi tla a damter, mitcaw tampi tla khua a hmuhter sal. Cu hnu ah Jesuh in Johan dung tlun tu pawl cu, ‘Vakir uhla nan hmuh mi le nan theih mi hi Johan va sim uh; mit caw in khua an hmu thei, ke awl pawl tthan ten an feh thei, pharnat ih a na mi pawl tla an thiang sal; hnaset mi in thawmvang an thei thei, mithi pawl an thosal ih mi farah pawl hnenah Thuthang ttha cu sim a si zo. Keimai thuhla ah thinlung rinhmainak a neilotu cu mi lungawi an si,’ tiah a sawn.

            Zumtu u le nau, kan thei cio vek in Jesuh le tihnimnak pe tu Jahan in rundamnak thuthangttha cu hmun dangdang ah an sim veve. Cutik ah mipi pawl in Jesuh hi zo a si pei, cun tihnimnak petu Johan teh zo a si pei, Messiah runtupa the an si pei maw, tiah awloksawng in an um.

            Tui kan dung Nipi sun ih kan theih zo vek in, Jews pawl an awlok a song ruangah tihnimnak pet u Johan cu, Khrih na si maw, Eliyah teh na si maw, cun Profet teh na si maw?, tiah an sut. Tihnimnak petu Johan in kei cu Khrih ka si lo, Eliyah khal ka si lo, cun Profet khal ka si lo. Kei cu ka dung ih a ra tuding Messiah runtu pa ih lamzin sial tu men lawng ka si. A kedan hrih phawih sak ding hman ah ka tlak lo a si, tiah tangdor zet in a sawn hai.

            Cun tui ttumah Jesuh ih thuthangttha simmi le mangbangza a tuah mi mipi ih an theih tik ah Johan le Johan thluntu pawl an mang a bang. Zo a si pei? Khrih a si pei maw?, an ti. Curuangah Johan in a thlun tu pahnih a thlah ih Jesuh Khrih cu hi in thu a sut ter: “Johan in Messiah a ra ding an timi cu nangmah na si maw, asilole midang kan hngak hrih ding so, tiah va sim uh,” a ti.

            Cu tik ah Jesuh ih Johan tluntu pa 2 cu hi tin a let: ‘Vakir uhla nan hmuh mi le nan theih mi hi Johan va sim uh; mit caw in khua an hmu thei, ke awl pawl tthan ten an feh thei, pharnat ih a na mi pawl tla an thiang sal; hnaset mi in thawmvang an thei thei, mithi pawl an thosal ih mi farah pawl hnenah Thuthang ttha cu sim a si zo. Keimai thuhla ah thinlung rinhmainak a neilotu cu mi lungawi an si,’ tiah a sawn.”

            Zumtu u le nau, mi tui kan thei vek in Johan le a thluntu pawl cu Jesuh ih thu le hla an thei tik ah awloksong zet in an um. Kan zum ding mawi, zum lo ding; a thu kan tlun ding maw, thlun lo ding; kan zum sual pang pei maw, kan tlun sual pang pei maw, tiah thinbang le khua ruah har in an um. Zum tu u le nau, cuvek thotho in kan nih khal Pathian kan hawlnak le kan zumnak ah khuavang sualsawmnak a phunphuan ruangah awloksawng le mangbangnak tampi kan tong ttheu a si. 

• Cuvekzumnak lam ih awloksongnak kan ton caan ah John tluntu pawl Bawi Jesuh hnenah feh ih thu hla an va suh fiang vek in kan nih khal thlamcamnak le tangdornak thawn Bawi Jesuh hnen ah pan cio uh uh.
• Bawi Jesuh ih Johan thluntu pawl hnangamnak thuthangttha a simih lungawi tei Johan hnen ih an kir sal vek in kan nih khal Bawi Jesuh in hnangamnak thlawsuah in pe ding a si. 
• Bawi Jesuh in Johan tluntu pawl hnen ah keimah thawn pehpar aw ih nan hmuh mi le an thei mi pawl Johan va sim sal uh, tiih a cah ta bang tuk in, kan nih khal Bawi Jesuh in a thuthangttha kan thei mi le kan hmuh mi phuang vivo dingin in duh a si.
• Cun Bawi Jesuh in hitin in cah hrih: Keimai thuhla ah thinlung rinhmainak a neilotu cu mi lungawi an si, in ti. 

Thuthangttha ngai tu nan zaten Pathian in thawhsuah lo pe hram seh. Amen.