Zumnak Thawn Hngak Uh Si (sim tu Rev. Fr. Peter Zin), December 19, 2020.

“Zumnak Thawn Hngak Uh Si”

Thuthangtha sim tu Rev. Fr. Peter Zin

December 19, 2020.

          “Minung in a cang theinawn lo tiih kan ruat mi pawl hi Pathian hrang ah cu a cang thei ringring lai a si.”

          Bawi Khri ah duhdawtmi nu le pa, u le nau pawl, nan dam cio maw? Nan umnak cio ah Pathian in lo kilkhawi in hnangam daihnak lo pek hai hram seh tiah a hmai sabikah thlacam saknak thawn ka lo cibai hai asi. Tuni December 19, 2020 (Zarhte ni) ah kan siar ding mi Bible Cathinghlim pawl thawn pehpar in ruahsannak nei lo in, baidong in a um mi kan um a si le minung pawl in a cang thein awn lo tiih kan ruat hnu hman ah a cang ter sal theitu, ziangtinkim a tuah theitu Pathian kan nei ti kha kan mang sal ding in ka lo sawm, ka lo forh duh hai a si. Tuni ih Bible a veikhatnak ih kan siar ding mi cu Thuṭhentu 13:2-7, 24-25 tiang a si ih Bawipa ih vancungmi in kan nauhak lai ih sin kan uar zet mi Samson a suahnak ding thu a simnak le Samson a suaknak thu a si. Gospel kan siar dingmi cu Luka 1: 5 – 25 tiang a si ih vancungmi Gabriel in tihnimnak pe tu Johan ih a suahnak ding a simnak thu a si.

          A pahnih in kan zoh asile hi naute pahnih Samson le Johan a hringtu an nu pawl hi an pahnih in nau an nei thei nawn lo nucing an si tiah mipi in an thei mi a si. An mah hrangah cu nau an nei leh ding tiin ruahsannak zianghman a um lo vek a si. Asinan minung in a cangthei nawn lo tiih ruah mi khal cu Pathian hrangah a cang thei ti kha Bible kan siar mi sung ah kan hmu thei asi. Bawipa ih vancungmi in Samson ih nu hnen ah, “Nang cu nucing na si ih faate na nei lo; sikhalsehla atu thok ihsin nau na keng dingih fapa na hring ding,” ati. Nau a nei ding ruangah vancungmi in ei le in ralring dingin le nau a neih tikah a sam met lo ding in khal a cah ta. Cun a neih ding mi a fapa cu ‘Filistin kut sung ihsin Israel mi runsuak dingah a thoktu a si ding, a ti. Vancungmi ih a simmi vek in a tik cu a thleng tikah naute Samson cu nucing tiih mi in an theimi nunau sung ihsin a suak a si.

          Johan suahnak thu khal ah a nu Eizabeth cu nucing a si ih, culawng siloin Johan ih nu le pa, Elizabeth le Zekhariah cu an nupa in Johan an nei hlan ah an tar zet zo a si. Minung hmuh nak ah naute vun nei ding cu ruahsannak um lo lawlaw khi a si. Asinan Pathain in a duh ih a ṭul, a ṭha, siseh a ti ah cun a cang mei si men. Elizabeth in fa a vun tik ah a lung a awi tuk ih, “Netabik ah Bawipa in i bawm ih misenpi hmaiah ka ningzahnak cu i lak sak zo a si,” tiah Pathian a thangṭhat. Samson cu Israel mi pawl Filistin pawl ih kut sung ihsin runsuak dingah a thoktu asi ding ti asi vek in Johan khal cu Thlarau Thianghlim thawn a khat dingih, Israel mi tampi tla Bawipa an Pathain hnenah kirtersal tu a si ding ti a si.

           Kan Pathian cu ziangtinkim tuah theitu, ziangtinkim a thiamtu, a cangthei lo tiih minung ih ruah mi a cangter theitu a si. Pathian cu ziangtinkim a tuah thei kan ti tikah kan hngilh lo ding ah a thupi zet mi pakhat cu a mah ih a tuah mi hi a ṭhabik a si timi te hi kan ruahnak le kan thinlung sung teah kan ret ringring thei ding hi a thupi zet a si. Ziangtikim a tuah thei ruangah kan duhnak vek in a tuah ringring ding ti cu kan ti thei lo a si. Kan ruahnak le kan duhnak vek in a tuah mi khal tampi a um ko ding. Sihmansehla kan duhnak le kan ruahnak vek in a tuah lo tikah Bawipa ih in tuah sak mi hi a ṭhabik ti zumnak nei in Bawipa in ziang a duh a si pei timi thin sau le rinsannak thawn kan hngak thiam ding hi a thupi zet a si.

          Pathian nih cu a ṭhabik in thil a tuah ringring ih zumnak kan nei lo a sile cu Zachariah vek in thin bang in kan um thei pang a si. Vancungmi Gabriel in Zachariah hnen ah a nupi Elizabeth in nau a von nak ding thu a sim tik ah a zum thei lo. Cutikah ziang a cang, cumi ih sin thok in Johan hmin a pek tiang in ṭong thei lo in a um ta. Vancungmi ih sim mi kha hei zum ta sehla nau te kan nei thlang ding tiah hnangam te le lungawi zet in a um thei awm tak a si. Cu vek thotho in nitin kan nunnak ah Pathian a zum a rinsan deuh tu pawl cu Pathian in a ṭha bik in lam in hruai ding ti zumnak thawn thazaang lak in an um ih harsarnak an ton caan khal ah ruahsannak thawn an nung thei ringring. Zumnak a nei mal deuh tu in cu harsatnak an ton tikah Pathian in a ṭhabik in lam in hruai sal ding ti ruahsannak an nei lo ruangah an thinlung a bangnak hi a har deuh ce ih beidong in an um a si.

          Minung cu leitlun kan nun sungah harsatnak in a luat ringring theitu zo hman kan um lo ding. Cuasiruangah harsatnak kan ton caan ah ruahsannak nei lo vek in thin pit in maw kan um ding? Asilole Pathian nih ziang a duh si pei, ziang tin lam in hruai pei, ziang tin a tuah leh pei timi zumnak nei in le sik-win-sa zet in a hngak thei tu sawn kan si thei pei maw? Zumnak a nei tu hrangah cu kan phur mi harsatnak a bang aw cio hman sehla Pathian hnenah zumnak kan nei ruangah kan phur mi a hrek khat cu a zaang deuh cia zo a si. Duhdawtmi nu le pa, u le nau pawl, Pathian cu minung ih a cang thei lo tiih kan ruah caan khal ah a cang ter thei tu a si timi zumnak nei in  nitin kan nunnak ah ruahsannak thawn a nung ringring theitu kan si theinak ding in Pathian hnen thluasuah dil in zuam cio uh si.

Fr. Peter Lal Zin Thang (Hakha Diocese)