Mary, in leeng aw (Thuthang tha sim tu - Rev. Fr. Pius Kei Lian Cung), December 21, 2020.

MARY, in leeng aw

Thuthang tha sim tu - Rev. Fr. Pius Kei Lian Cung

December 21, 2020.

Siarding: Lk 1:39-45

          Pa le Fapa le Thiangthlarau hmin in, Amen. Bawipa cu nan hnenah um seh law. Mithiang Luka ih nganmi thuthangtha siarnak.1:39-45 tiang.

          “Mary in Elizabeth a leeng”

          Cuih hnuah Mari cu a tim a tuah ih Judea peng tlangpar khuaah zamrangte in a hung feh. Cutawk a thlen tikah Zakhariah inn ah a lut ih Elizabeth cu cibai a buk. Mari ih tongkam cu Elizabeth in a theih vete in a pum sungih naute cu a caang. Elizabeth cu Thlarau Thianghlim in a khat ih, ring zet in “Nang cu nunau hmuahhmuah lakah a thlawsuak bikmi nunau na si. Nahrin dingmi fa khal hi thlawsuahmi fa a si. Ziangahso ka Bawipa ih nu in keivek tla hi i hung leen duh. Ziangah tile na ttong ka theih vete in ka pum sungih naute hi lungawi aipuang in a khir a si. Bawipa in na hnenih a sim mi thu hi na parah a kim taktak ding ti na ruat ih na lungawi dan ding hi a va mak ve” tiah a ti. Kan Bawipa ih thuthangtha a si.

          December 21, ni hrangih Cathiang kan siar miah hin Mary le Elizabeth an tonawknak thu kan ngai. Theihtha le, zirtha tampi sungin  Mary hnenin thu pa(3), Elizabeth hnenin thu pa(3) ruatkhawm tlang u si. “Mary, in leeng aw” tiin thulu ka hril.

*Mary hnen ihsin kan zir dingmi thu pa(3)*                                           

          1.  Mary cu Bawntu tha a si. Elizabeth cu tarkun hnuah nau a von ih thlaruk a kim tlang timi thu Mary nih a theih veten Elizabeth tuamhlawm ding le bawm dingin zamrang ten a pok. Mary in ziangtluk inso in seherh. Harnak kan ton canah in bawntu dingin kanhnenah a um ringring. Kanaan mopuai khalah an harnak kha a zoh men hrimhrim lo. Bawm lohli rori a duh. Elizabeth ih kawhnak a hngak lo, monu mopa ih bawmnak dil ding khal a hngak lo.  Kan mai kawhhlan in amah sawn in in khelh. Bawmtu tha Mary kan neihhi lungawi u si, hnangam u si. Mary zohthim in a fale kan nih khal in, mi dangih tulsamnak hmu lohli thiamtu le bawm zamrang theitu si dingin thazaang la cio u si. 

          2.  Mary cu Thuthangtha neitu, phuangtu a si. Vancungmi Gabriel hnenih sin thuthannak a conak le nau a paimi cu Cungnungbik Pathianfa a si thu hi a mah pakhat hrang lawngah a re men lo. Zachariah innsang ah a thlenpi a si. Evangelist hmasa bik a si. Tlangpar le khawdangah zamrang in pok. A awkam khal thuthangtha a si ih a minungkhal thuthangtha a si. Mary ih aw a theih veten Elizabeth a lung a awi ih, a pum sungih Johan khal lungawi in a khir rero ve. Thuthangtha ih a murilbik a simi Jesuh cu, a nu Mary thawn thisa khat, nunnak pakhat, thaw pakhat hlawmaw rero mi an si. Mary ih umpinak le a awkam thlum cun Zakhariah tei innsang ah lungawinak, hnangam nak le thazaang thar, thuthangtha a thlenpi a si. Mary ih fale kan nih teh midang hrangah thuthangtha kan si ve lo ding maw. Kan aw kam le kan minung hi midang hrangah lungawinak, hnangamnak le thangzaang si thei hram seh. 

          3.  Mary cu zumnak le lungawinak ah a thanglian vivo. Zumnak le lungawinak hi than vivo a thiam ih fer vivo le cem cuahco a thiam ve. Minung ruahnak ih thil cangtheilo zet, fala him sicingih naupai ding thu hi Pathian rinsan nak tumpi thawn Mary cun a zum ngam. Cuti ih amai parih thilmaksak a cohlan thei ruangah pitar Elizabeth ih nau a von thu khal a zumih a cohlang thei mai. Zumngam tu hrangah cun, zumnak karh bet rero nak thuhla, le mangbangza phunkim  tampi, theihbet, hmuh bet, co bet rero so khaw a si. Elizabeth hnen in lomnak, thangthatnak tampi Mary cun a co ngah ih, a mah rori khal in Pathian a thangthat. A lungawinak cu pakhat tlunah pakhat a karh, a thang lian. Mary vek in zumnak ah siseh, lungawinak ah siseh, a karhzai sin dingmi, a thanglian bet rero dingmi kan si. 

*Elizabeth hnen ihsin kan zir dingmi thu pa(3)*                                

           1.  Elizabeth cu Thiangthlarau in a khat. Elizabeth cu Thiangthlarau thawi a khah ruangah Mary ruangpumpar ih Thiangthlarauih hna tuannak fiangten a hmu, Mary sungih naute khal Thiangthlarau ih fa a si zia a hmu hngah ih thangthat lo in a um thei lo. “Nang cu nunau hmuahhmuah lakah a thlawsuak bikmi nunau na si. Nahrin dingmi fa khal hi thlawsuahmi fa a si”  tiin aw thangzet in a au. Zumtu unau hrekkhat cun Thlarau ka co an ti nain Mary ih comi Thiangthlarau kha hmu thiam loin Mary thangsiatnak, nautatnak tampi an tuah, an sim. An neihmi thlarau cu Elizabeth ih comi Thiangthlarau thawn a dang aw viarviar. Mary ih a fale kan nih pawl cu, Elizabeth thawn hmunkhat in “Nang cu nunau hmuahhmuah lakah a thlawsuak bikmi nunau na si. Nahrin dingmi fa khal hi thlawsuahmi fa a si” tiah thang zet in au sin ko u si. Mary hnen le Jesuh hnenah, lomnak, thangthatnak kan pek can hi Thiangthlarau thawi kan khah can te a si.

          2. Elizabeth cu tangdor nun a nei. Elizabeth cun amah hnakih tamzet kum note sawnmi Mary cu “ka Bawipa ih nu” tiah a koih, amah le mah cu “keivek temen” a ti aw thei. Mt 11:11, ah ‘Nunau ih hrinmi lakah baptisma petu Johan tlukih a tum mi zohman an um lo’ tiah Jesuh in a ti. Cu tlukih mi thupibik, mi tumbik Johan neitu, a nu Elizabeth cun Mary hmaiah cun “keivek men” hi a ti aw thei. Elizabeth dungtlun in Mary hnenah “ka Bawipa ih nu” ti ve u si. Santlai lo, misual na fale kan si ti ko u si. Mary hmaiah uar aw ngam ding le khai sangaw ngam ding mi zumtu zohman kan um lo. Tangdor thinniamnak thawn Mary hnen pan sawn u sih. 

          3.  Elizabeth cu zumnak le lungawinak ah a thanglian vivo. Tarkun hnuih nau a vonthei zia   a ruah rero tikah Bawipa ih thawm huham le zangfahnak rori a si ti a theifiang tuk. Lk 1:25 ah, ‘Bawipa in i bawmih misenpi hmaiah ka ningzahnak cu i laksak zo a si’ tiah a ti. Pathianih mangbangza tumpi cu  a mai nunah a hmuih, cuhnakih tumsawn Pathianih mangbangza cu Mary le a fa Jesuh hnenah a hmu sinsin. A zumnak a karh, a thang sinsin. Mai nunnak ih Pathian kutcak tampi hmuh thiam hi, kiangkap ah tam sinsin ih Pathian sunlawinak hmuh bet vivonak a si. Nau a von ruangih a lungawinak parah Mary, a Bawipa ih nu ih tuamhlawm le awkam a congah nak cun a lungawinak cu a sang ter sinsin. Zumnak ih thangso pawl cu lungawinak khalah an thanglian bet rero si ko. Leitlun lennak, hminthannak, ih  mi tthangso si hnakin, zumnak ih a thangso mi sihi duh sawn u si. Zumnak thawngih  lungawinak hi sunlawih in uar u si. 

          Kan Bawipa ih nu, Mary, Kanmah hrangah thla in cam sak aw,, Johan ih nu Elizabeth, Kanmah hrangah thla in cam sak aw, Pa le Fapa le Thiang thla rau hmin in, Amen.