“Thinkhat Lungkhat Ten” (Thuthang tha sim tu - Rev. Fr. Lucas Tha Ling Sum), December 23, 2020.

“Thinkhat Lungkhat Ten”

Thuthang tha sim tu - Rev. Fr. Lucas Tha Ling Sum

December 23, 2020.

          Zumtu u le nau, nan zaten “Merry Christmas!” Messiqah, Runtu pa in hleice in Christmas caan ah thlawsuah tampin lo pe hram she. Christmas puai cu a rei hlan ah kan tuah thlang ding. Ttuitum ah Naute Jesuh ih raknak san pakhat a si ve mi “Thinkhat Lungkhat Ten” um thei dingin timi thu thawi ruat tlang uh si. Baibal ca kan siar ta pei. 

          LK 1: 57-58: “Elizabeth cu nau a neihnak ding nithla a kim ih fapa a nei. Elizabeith parih mangbangza Bawipai tthatnak cu a sungkhat le innhnen pawl hmuahhmuah in an thei ih an zaten an lungawipi.”

          Thuthangttha ngai tu u le nau, Evi le Adam in Pathian ih thu ngai loih Eden hmuan dum sungih sualnak an tuah ruangah sankhat hnu sankhat cemni um loin milai hnenah tthat lonak tampi a thleng. Tahtthimnak pa 3 in zoh uh si.

Pakhatnak

          Evi le Adam cu Eden hmuan dumsungih nuamzet ih an tlanlen laiah. natnak lolen damlonak timi a um dah kel lo.  Ka pumnaa, ka lu naa, cun natsia tlangrai tivek zianghman an tong dah kel lo. Asinan Evi le Adam ih Pathian thu an ngai lo ni ihsin thok in milai ruangpumpi hnenah natna a phunphun a thleng ciamco. Thutthimnak ah kan theih dah lo mi COVID-19 nat nak. 

Pahnihnak

          Eden hmuan nuam sungah cun tarnak timi khal a um dah kel lo. Ka kum a tam tuk, ka tar tuk thlang, zianghman ah ka ttha hnem nawn lo tivek a um dah kel lo. Nonal zet le damcah ringring ih um a si. Asinan Evi le Adam ih Pathian thu an ngai lo ni ihsin thok in milai ruangpi cu tar thiam dah kel lo a sinan, tar thiam ruangpumpi ah a cang ta riai.

          Cun pathumnak ah, Evi le Adam Eden hmuan dumsungih nuamzet ih an tlanlen lai ah thihnak timi a um dah kel lo. Asinan Evi le Adam ih Pathian thu an ngai lo ni ihsin thok in milai ruang pumpi cu thi thei lo ruang pumpi ihsin thithei ruangpumpi ah a cang a si. A thawi zawngih kan sim asilen Evi le Adam ih sualnak ruangah milai in natnak, tarnak, le thihnak kan tong a si. 

          Evi le Adam ih sualnak in milai ruangpumpi lawng siloin milai thinlung ruahnak khal a siat suah ttheh. Milai thinlung sungah tangdornak, mi upatnak, midang parih lungawinak tivek pawl a um nawn lo. Milai thinlung cu puar thaunak, mi nau tatnak. mi zuam tainak, iksiknak tivek thinlung ruahnak sia in a khat ttheh ttheu.

          Zumtu u le nau, tuittum ih kan ca thianghlim siar mi ih in zirh duh mi cu kan zatei “thinkhat lungkhat nei ding,” timi a si. Kan Baibal in hitin in sim: “Elizabeth cu nau a neihnak ding nithla a kim ih fapa a nei. Elizabeith parih mangbangza Bawipai tthatnak cu a sungkhat le innhnen pawl hmuahhmuah in an thei ih an zaten an lungawipi.” Elizabeth hi a kum a tam zo. Fate nei thei ding din hmun a sin awn lo. Mi in fa a nei thei nawn lo ding ih an zum mi si. Asinan, Pathian ih zangfahnak in fapa a ron neih tik ah, a sungkhat pawl le a innhnen pawl hmuahhmuah in an lung awi pi, a si. Himi te hi kan cawn hrimhrim ding mi a si. Kan zatei thinkhat lungkhat kan neih dinghi Bawi Jesuh ih a duh mi bik a si. Johan 17:21 sungah hi tin thla a cam: “An zaten pakhat an si thei nak dingah thla ka cam a si.”

          Mitui kan sim zo vek in Evi le Adam ih sualnak ruangah mitampi cu kan lungput a ttha lo. Mi ik siknak thinlung kan nei pang theu. Mi pakhatkhat a aungmin a silen, lungawi pi sawn lo in, kan ik sik pang theu. Ngaingai ih kan sim a si ah cun, let tthat can ih monu le mopa ih an thiam kam awk mi khi a ttha tuk; “nei caan ah siseh, nei lo caan ah siseh, dam caan ah siseh, damlo caan khal ah siseh kumkhua in ka lo umpi ringring ding a si, an ti mi khi a ttha tuk. Tui ttumih kan ca thianghlim ih in zirh mi cu himi te hi a si. tthawngdang ih kan sim asilen duhdawtnak nei ding timi a si.

          Thuthangttha ngai tu nan zaten, mi lungawi hnen ah lungawi pi thiam tu, mi riah sia pawl hnenah riahsiat pi thiam tu sithei dingin Christmas caan ah Nau te Jesuh ih thlawsuah lo pe hram she. Amen.