Christmas Thluasuah Kumkhua Hmun Seh (sim tu Rev. Fr. Peter Zin), December 26, 2020.

 Christmas Thluasuah Kumkhua Hmun Seh

Thuthangtha sim tu Rev. Fr. Peter Zin

December 26, 2020

Siarding: Tirhthlah 6:8-10; Matthai 10: 17-22.

          Bawi Khrih ah duhdawtmi nu le pa, u le nau pawl, Christmas thluasuah: duhdawtnak, hnangam daihnak, le lungawinak pawl cu nan mah hnen ah um ringring hram seh. Happy Christmas tiah a hmai sabik ah cibai ka lo buk hai a si. Mani December ni 25 ni ah Bawipa suahni Christmas puai pi cu lungawi zet in kan tuah zo ih, himi Christmas ni ih a thizing a si mi tuni December 26 ni ah hin Jesuh Khrih zumnak ruangih a hmai sa bik thahnak a tuartu St. Stephen ih puai ni kha kum tin ten kan tuah ṭheu asi. St. Stephen cu Dungthluntu pawl hna ṭuan bawm tu ding ah an hril mi Deacon pasarih lak ah a tel ve mi pakhat asi. St. Stephen ih puai ni a si vek in kan siar dingmi Bible pawl khal cu a mah ih a thihnak thu le a mah ih a hmuhtonmi thawn a kaih aw zet mi catlang pawl kan siar asi. Bible veikhat siarnak cu Tirhthlah 6:8-10; 7:54-59 tiang a si ih Stephen ih Bawi Jesuh a zum ih tetti a khan nak ruangah thah a tuarnak thu a si. Kan siar dingmi Gospel cu Matthai 10: 17-22 tiang asi ih Bawi Jesuh in a dungthluntu pawl hnen ah amah ih dungthluntu an si ruangah harsatnak a phunphun an tong ding thu a simnak a si.

          Kan siarmi Gospel sungah Bawi Jesuh in a dungthluntu pawl cu a mah ruangah midang pawl ih hremnak, dodal nak an tong ding thu a sim vek in Pathian in a thluasuah zetmi le cahnak huham thawn a khatmi St. Stephen khal cu Bawi Jesuh ih thuthangṭha a sim ih khuaruahharza le hmuhsaknak mak tampi a tuah ruang ah mi ih dodal nak a tong ve asi.  Bawi Jesuh in Keimah ih ruangah uktu le siangpahrang pawl hmaiah an lo thlenpi ding a ti vek in Stephen khal cu Bawi Jesuh tette a khan ruangah zungah an thlen pi a si. Bawi Jesuh in thuṭhennak hmunih thlenpi nan si tikah ziangso ka sim ding ti le ziangtinso ka sim ding, tiin nan donhar hlah uh. A tikcu a kim tikah nan sim dingmi cu theihter nan si leh ding. Ziangahtile a ṭongtu ding cu nanmah si lo in nan sung ihsin a ṭongtu nan Pa ih Thlarau ṭongkam a si ding a ti vek ciah in Stephen ih nunnak khal ah a kim tikha kan hmu thei. Stephen cu Thlarau in fimnak a pek ih a ṭong tikah zohman in an el thei lo. A dodal tu pawl cu Stephen ih thusimmi an el thei lo, an neh thei lo ih an thin a heng leh lam. Cu pawl cun upa pawl le Daanthiam kha thinheng ko in an forh bet, cutikah an kai ih Khonsil upa hmaiah an suahpi ih a phunphun in thuphan an puh. Stephen cu Thlarau Thianghlim in ṭong ding sim ding lawng fimnak a pek si loin, khonsil pumkhawmnak sungih a telmi hmuahhmuah in a mah kha an zoh tikah a mithmai cu vancungmi ih mithmai bangtukin an hmu ti a si.

          Bawi Jesuh in keimah ruangah mikip in an lo hua ding. Sikhalsehla a netnak ni tiang a ṭang theitu cu runsuak an si ding ati vek in Stephen cu Jesuh ih thuthangṭha a simruangah mipi in an hua ih an dodal ciamco. A sinan ṭihlo, phanglo le dung sip men lo in a netnak tiang a ṭang theitu a si. Stephen cu khonsil an thlenpi tik khal ah thuthangṭha a sim lai. Abraham ih sin thok ih Moses thu hla pawl, profet pawl ih simmi pawl le an pupa pawl in profet pawl an hrem ih an that mi pawl khal a sim. Cun nan mah khal nan lung a ruh tuk nan pupa pawl vek thotho nan si. Thlarau Thianghlim nan dodal ringring. Culawng siloin Pathian in khuahlan lai piih sin a ra ding tiin a sim cia mi a Siahhlawn khal cu nan zuarih nan that tivek pawl anmah le anmah an tuahmi an thei aw lo mi pawl a sim ciamco tikah an thin a heng sinsin. 

          Culaiah Stephen in, “Zoh hnik uh! Van a ong aw ih Pathian vorhlamah Milai Fapa a ding ka hmu!” a titik ah cu a thei khal an peih lo an hna an phit ih an aw neih patawp in thin heng in an au ti asi. Cun Stephen cu an zawn ih khua lengah an feh pi ih cu tawk ah lungto in an deng that. Lungto in an deng rero lai ah Stephen cun “Bawipa Jesuh, ka thlarau run la hram aw!” tiah thla a cam. Cun a thi hlanah lungto in a deng tu pawl hrangah khal thla a cam. “Bawipa, an sualnak hi ciing ringring hram hlah aw!” ati. An sualnak Bawipa in a ngai thiamnak ding in thla a cam sak. Bawi Jesuh thianglamtah par ah an thah lai ah a mah a that rero tu pawl hrangah thla a cam mi vek khi a si. 

          Hi Stephen ih thu kan ruat salnak in thazaang kan lak sal dingah ka duh mi cu, a tu Christmas puai kan tuah, runtupa a suak ih kan nuam kan lungawi zet. Himi kan nuamnak kan lungawinak hi Christmas tikcu caan hrang lawngah si hlah seh. Christmas puai kan tuah ṭheh veten kan nuamnak pawl cem ta hlah seh. Himi kan nuamnak kan lungawinak hi Christmas puai kan tuah ṭheh ih hmai lam kan feh nak ah harsatnak le ṭihnungza kan ton tik ah kan thazaang ah cang ter hram u si. Cun Bawi Jesuh cu daihnak Siangpahrang Bawipa a si. Himi daihnak Siangpahrang Bawipa kha kan thinlung sungah suak ter in kan nun sungah daihnak a nei tu si thei ding in thluasuah dil in zuam u si. St. Stephen cu thah nak a tuar tiang in Bawipa hnen ih a ngah mi thinlung daihnak a nei vek in kan nih khal harnak kan ton tikah kan thinlung sungah Bawipa ih daihnak a um ringring thei dingin Pathian hnen ah thluasuah dil usi.

          Christmas caan ih kan hmu mi thluasuah, duhdawtnak, hnangam diahnak le lungawinak pawl cu kan nun sung hmuahhmuah ah kan thinlung ah um ringring hram seh.

Fr. Peter Lal Zin Thang (Hakha Diocese)