Nau te hi an nauta lo (sim tu Rev. Fr. Pius Cung), December 28, 2020.

Monday, December 28, 2020

Dec 28/ 2020/ Mt 2:13-18, Thuthangtha ngaitu u lenau pawl “Merry Christmas” tiah cibai ka lo buk hai. Naute Jesuh ih pekmi rundamnak le Christmas ih lungawinak cu nan zate parah hmun camcin hramseh tiah thlaza ka lo cam sak. Dec 28 ni cu, mithianghlim Naute pawl (Holy Innocents) puaini a si. Jesuh a suah canih thahnak a tuartu naute pawl sunloihni, upatnakni a si. Kan thulu dingah “Naute hi an nauta lo” ti ka hril. Bible cathiang kan ngai tlang pei. Mt 2:13-18, Nisuah lam mifim pawl an feh hnuah Baawipa ih vancungmi pakhat cu Josef ih mangah a lang ih, “Hi naute hi Herod in thah dingah a hawl ding. Curuangah tho awla naute le a nu thawn Izipt ramah tlan uh. Kir sal ding i ka lo sim hlan lo cutawkah nan um pei,” tiah a ti. A ti bangtuk in Josef cu a tho ih naute le a nu thawn a zanzan in Izipt ramah an tlan. Herod ih thih tiang cutawkah an um. Hi bangtuk ih a si nak cu Bawipa in profet kaa in “Ka Fapa cu Izipt ram ihsin ka ko suak,” tiah a rak timi kha kimternak dingah a si. Nisuah lam mifim pawl in in bum ngah ti kha Herod in a theih tikah a thin a heng ngaingai. Cule mifim pawl ih simmi arsi suah caan thawn a vun tuat ih Bethlehem le a kiangkap khua ih a ummi mipa nauhak kum hnih le a hnuailam hmuahhmuah that theh dingin thu a pek. Cuticun profet Jeremiah ih a rak sim cia mi kha a kim. A rak sim ciami cu: “Rammah khawsung in aw a thang, tahnak le aihramnak aw a si. Rachel in a faate pawl a tah; An thih theh ruangah a tap ih, leem khal a theih nawn lo,” ti a si. Bawipa ih thuthangtha a si. Thahnak a tuartu naute pawl hnenin siseh, Josef le Herod hnenin siseh, thu pahnih ciar lain thlarau fimnak zir u si.

*Thahnak tuartu Naute pawl hnenin zir dingmi pa(2) 1nak; Sunloih tlak, upat tlak an si. An awkam in Pathianthu an sim thei lo nain an nunnak liamin Jesuh hrangih hnatuantu pawl an si. An thisen auaw cu vancung Pathian hnen tiang a tlengih, zumtu pawlih kan thinlungmuril sungtiang a thang, a khawk ban a si. Sualnak tuahthei hrih lomi an si ruangah duh annung ih, thisen luang tiangih nunnak an pek ruangah upat an tlak. An puai kan tuahnak thawngin sunloihnak le upatnak pe cio u si.

2 nak; Kan cawn dingmi an si. Jesuh, thahnak ihsin a luattheinak dingah naute pawl hin an nunnak an liam. Herod ih thinlungah ah hi a thimi naute pawl lakah Jesuh a tel tin a ruat. Jesuh ka that ngah tiah a zumaw zet. Himi naute pawl thihnak umlo sehla Herod cun Jesuh a ton hlan lo a hawl ding. Jesuh hrangih thisen luang hmaisabik, Martyr ih thi hmaisa bik an si. Thlarau lamah cun kannih hnakin an ral a tha sawn ih an upa sawn. Kan hrangih thla incamsak tu, le in bawm rero an si. An nun cawngin Jesuh hrangah nunnak thap ngamtu kan si ve lo ding maw. Minung thinlung sungih Jesuh siangpahrang a nun ringring theinak dingah siseh kan leilungpi ah Jesuh ih hmin sunglawi a than sinsin nak ding ah kan neih, kan nun ui loin thaap ngam, pe ngam u si.

*Josef hnenin zir dingmi pa(2) 1nak; Josef cu Pathian aw a ngai. “Naute le a nu thawn Izipt ramah tlan uh” tiih Pathian aw a theihmi a thlun. Naute le a nu, an pahnih in a lak, a hruai. Mary nih mipa tello ih nau a pawi laiah Josef cun Mary cu thahdingmi dinhmun in, nunnak ah a rak humhim. Jesuh that dingih Herod ih a hawl can khalah Josef cun Jesuh luatding in a humhim, a kilkhawi. A veihnih in Pathian ih fialmi a ngai. Zumtu kan nih khal Naute le a nu hmunkhat ih la ding, cohlang dingin Pathian in in fial. Jesuh lawng la loin a nu Mary thawn la u si, co u si. Pathian fialmi a si.

2 nak; Josef cu a khul a rang. A zanzan in Izipt ramah an tlan ti a si. Khawvan ta a hngak lo. Nuamnai a ti men lo. Lamzin ih hardan ding le naute le a nu ih bang danding pawl Pathian hnenah a sut rero lo. Biaknak hnatuan ah tawzang ding le thuthangtha ah awkamzang ding kan si. Thukthun aw rero ding kan si lo. Thlarau lam hnatuannak ah, a cangthei pei maw, a har tuk ding, ka ruat ta ding, neta le ti pawl hi Satan duhzawng a si. Thukthunawk le nuarneih hi zumnak malzia a langter. Vancungmi hnenih thuthannak an ton laiah, Mary in siseh, Joseph in siseh, ka ruataw ta dingih, neta rasal awla, aw le awlo ka lo sim leh ding an ti lo. Pathian khawkhan lairelnak rinsan in, Josef vek in pokkam mai u si, Bawipa ih in telpi cun zan khalhi sunvek in a tleu. Ralthatnak le hnangamnak tombawr i co rero a si. A va hlawk ve.

Herod hnenin zir dingmi pa(2) Herod cu Jesuh huatu a si ih, Jesuh tongngah lotu khal a si. A hnenih sin kan zir dingmi hi amah vekih nun ding si loin, a mah lo vekih nun ding a si sawn. Jesuh ton duhtu kan nih cun a mah vek si lo dingin ralring u si. Jesuh ton a duh nain a tonngah lo nak thu pa2 in kan zoh pei. 1nak; A mah rori in Jesuh a hawl lo, mi dang hawlcia a ring. Mt 2:8 “Va feh u la naute cu thaten va hawl uh, nan hmuh a si le kei khal i sim uh” tiah mifim pathum hnenah a cah. Jesuh hi ‘nan hmuh a si le kei khal i sim uh’ tivek mai ih ton a ngah lo. Nan hmuh loah cun a poi lo tinak si. Maw Siangpahrang Herod, Jesuh ton na duh ngai a siah cun na laksawng thatha keng awla, mifim pathum thlun ve mai aw he, ziangah saw va hawl uh ti ih na fial menthiam. “Mipa nauhak kum hnih le a hnuailam hmuahhmuah that theh dingin thu a pek” ti mitute ah kan siar. Nauhak pawl thah ding khal a tohkhampar in thu a pe men ih a mah rori, Jesuh hawl dingah a pok cuang lo. Mah te hawl tum loih, mi dang hawlcia ring men, Herod, Jesuh tong tlak a si lo. A thih tiang khalah a tong ngah lo. Keimah rori ih ka hawl a tul, ka ton a tul tiin pok u si, Jesuh thawn hmai ton, pah aw rori in, kan tong aw ding a si.

2 nak; Naute ih nu zo a si ti a thei lo. minung pakhat thah maw, mi tampi thah so sual a tum deuh. Mi pakhat thah khal sual tumpi a si ko nain mi nung tampi thah cu a tum sinsin pan teh. Herod ih a thah duh mi cu Jesuh pakhat a si ko lo maw, ziangruangah so Jesuh silo naute tampi a thah? Naute ih nu zo a si ti a thei lo ruangah pan teh. Siizungah mipanaute tampi hmunkhat ah rekhawm hai sehla Jesuh khuimi bik a si tihi hril a har zet ding. Mary ih fa cu hihi a si ti thei seh la cu Jesuh hril lohli a ol te ding. Anu Mary theihfiang lo hi a fa Jesuh khal theihpalh, theihthelh a ol te. Herod in Jesuh nu a theih lo ruangah naute tampi a that. Tulai zumtu tampi in Jesuh nu cu Mary a si tihi a hna lawngin an theiih, an thin lung cun an pom duh lo. Nu tel loih fapa lawng hril tu pawl, nautemipa tampi lakah Jesuh an hrilngah ngelcel pei maw. Herod vekih naute dangdang Jesuh a si hmang, tiih hril sual pang dinghi tih a nung tuk. Tukhal pawl le Mifim pa(3) pawl le Joseph thawn kom awin, naute Jesuh le a Nu Mary hi hmutlang, tong tlang u si. Bible ih zirhmi a si. Jesuh suahcan ih thahnak a tuartu Martyr Mithiang Naute pawl, kan maih hrangah thla in cam uh, Amen. Pa le Fapa le Thiangthlarau hmin in, Amen.