Nitin thuthangtha (Rev. Fr. Dominic Thawm Hlei Hnin ih sim mi)

Sermon for Sept. 10, 2019;

Tuesday of XXIII week of Ordinary Time, Year I (Sept. 10, 2019)

Siarding: Colosian 2:6-15; Ps. 145; Lk. 6:12-19

Kan Bawipa Jesuh cu zanvar thla a cam hnu, a thaizing ah minung hleihnih a hril ih cumi pawl cu Tirhthlah tiah hmin a pek ih sinak khal a pek.

Thlacamnak timi cu Pathian thawi pawlkom awknak, Pathian thawi biak awknak a si. Cui tlun ah Bawipa Jesu cu thlang par ah a kai ih thla a cam ti in kan hmu. Judah pawl ih nunphung le thuruah daan ah "tlang" ti cu a sang deuhnakhmun a si ruangah Pathian thawn a nai aw deuh ti in an rak ruat. Curuangah "tlangpar ah thla a cam" ti cun Pathian thawn an naih aw sin ti mi a langter.

Bawipa ih umtudaan kan zoh tikah thil thupi a tuah zik tin te'n thla a cam ta theu. Pathian tel loin hna pipa a tuan lo tinak a si. Hna kan tuan tik ah, thil thupi kan tuah zik tikah, Pathian thawn pawlkomawk hmaisa, Pathian suhrawn hmasa a tul zia le a thupit zia a langter. 

Ziang ruangah Bawipa in mi hleihnih a hril?

Bawipa Jesuh cu hna a tuan tikah tumtahnak a nei theu, duhsan neilo le khuakhannak neilo men in hna a tuan lo. Tuitum ih minung hleihnih a hril ih "tirhthlah" timi sinak a peknak khal ah tumtahnak fumfe le felfai a nei ve. Amah Bawipa Jesu cu hi Leilung tlunah kumkhua a um lo ding ti a theihawk ruangah amai neh le hnu ih a hna rawn tuan tu dingah a tirhthlah pawl a hrilnaksan a si. Curuangah cui a hrilmi minung hleihnih pawl cu amah thawn hmunkhat ah a umter ih cuticun an umtudaan, an thu ruahdaan an lungput pawl a remsak ih zirnak a nei ter. Cui zirnak cu timtuahnak a rak si. Ziangmi hrangah tim an tuah ti a si le amah an Bawipa a um nawnlo hnu khal ih rinsantlak si dingah le amah Bawipa ih rak tuanmi hna kha pelhsolhnak um lo in pehzom vivo thei ding a duh ruangah a si.

Thuthangtha ngantu Luke in mi "Hleihnih" hi ziang tivek thu umdaan in a hmang ti zoh uh si. Act. 1 (Tirhthlah 1) kan zoh a si le himi minung hleihnih hi cu a kim a tul ti in kan hmu. Judas ih aiawhtu hrilsal a sinak thawngin minung "Hleihnih" cu famkimtersal a si ih cuticun a kam ciami Thlarau Thianghlim cu ngah in Thuthangtha khal cu leitlun hmuntin ah an phuang theinak ding ah a si. Tirhthlah 26:6-7 khalah Paul cun Israel miphun hleihnih hnen ih kam ciami thawhsalnak thu a rel ih cumicu tu-ah Bawipa Jesu ah a famkim a si.

Thuthangtha ngantu Luke ih hmuhdaan ahcun Tirhthlah hleihnih cu Jesu ih Vancungram a phuannak le Kohhran ih Pathian tongkam a phuannak ih pehawknak hri, sih hngetmi hri in a hmu. Ti duhsan cu Jesu ih hnatuan a rawn pehzom tu ding pawl an si. Curuangah Tirhthlah timi hi Khrih thawn pehparmi Pathian thuthangtha phuang dingih hrilmi le thlahmi an si. Jesu ih dungthluntu menmen an si lo, Jesu zumtu menmen an si lo. A hleice in Jesu ih thawhsalnak thuhla theihpitu ti ah (Tirhthlah 1:21-22; Acts 1:21-22) kan hmu thei. Ralrin ding mi a um ih cumicu Jesu ih hnatuannak a theihpitu, a thawhsalnak theihpitu hi Tirhthlah hleihnih lawng an si lo, a dungthluntu tampi an tel ve, nunau pawl khal an tel. "Dunthluntu" ti le "Tirhthlah" timi a hman tawm (Lk. 22:11, 14) caan tla tampi kan hmu thei. Sikhalsehla a thu fehdaan, a thu ngaitu mipi le a simrelmi thu pawl zoh in cui "Dungthluntu" le "Tirhthlah" timi ih duhsan theih thei a si. Tu ih a hmannak ahcun "Tirhthlah" pawl hi Jesu ih hnatuan a rawn tuan pehzoh tu ding ti a lang fiang.

Jesu ih hnatuan cu ziang vek ti kan zoh a si le "Pathian thuthangtha phuan ding, rudamnak thuthangtha phuan ding (Mk 1:38)" hi a si. Pathian ih hnatuan daan kan zoh a si le leitlun minung pawl rundamnak an ngah theinak dingah miphun pakhat a rak hril ih cui miphun cu Jew miphun pawl an si. Jew miphun ih tefa Jacob ih sanah Israel ti in a hmin a thleng ruangah Israel miphun hleihnih ti khal in rel a si theu.

Jesu in thirhthlah hleihnih a hrilnak hi Jesu Khrih ih miphun Khristian pawl thawhkehnak ding hrang ih tim a tuah mi a si. Jesu in "Leilung khawzakip ah va feh uhla mi hmuahhmuah hnenah Thuthangtha va sim uh. Zokhal sisehla a zum ih baptisma a co ahcun rundam a si ding. Asinain a zumlotu cu hnon a si ding. (Mk. 16:15-16; Mt. 28:18-19)" ti-ah a thlah. Tirhthlah pawl le an thlahsin mi pawl hmangih hna a tuannak in Jesu zumtu an karh vivo ih cuticun Tirhthlah pawl ih zirhnak pom in Jesu a zumtu pawl cu Christian ti-ah (Tirhthlah 11:26) Antioch khua mi pawl cun an rak ko thok. Christian timi hmin cu Jesu ih nehhnu ah Dungthluntu pawl ih san ah Antioch khua ah an rak hmang hmaisabik. Cuticun Jesu ih miphun Christian miphun a rawng ding ih Pathian ih miphun Israel ihsin Fapa Pathian ih miphun Christian ah a rawn pehzom. Cui miphun cu rundamnak hrangah Fapa Pathian ih rem a ruahmi miphun a si ih Colose ahcun Jesu ih ruangpi (Colosian 1:15-20) ti khal in a ko.

Jesu in a miphun sersuak dingah minung a hril ih cumi pawl cu Dungthluntu hleihnih ti in siseh, Tirhthlah hleihnih ti in siseh, a tlangpi thu in kan ko. Cui minung hleihnih pawl kan zoh tikah pakhat le pakhat bang awlo celcel an si. Nga kai ih pum cawmawtu an um, Phunhnam tan mi zealot an um vek in phunhnam zuarthlaitu ti ih ruahmi Siah khongtu an um; Judah miphun an um, Galilee ram mi an um, Greek hmin nei (Philip) khal a um ve. Milian an um, mi siatha an um. A phunphun an um. Hiti ih miphun zarawi a hrilnak khal cu duhsan a nei ve. Jesu ih miphun ah phunhnam ruangah, fimthiamnak ruangah, sumsaw ruangah, vunrong ruangah thleidannak um lo ding. Khatlam zawngih kan zoh a si le Jesu ih miphun, zumtu miphun, Israel miphun thar a simi Christian miphun cu zocio a huap thluh tinak a si.

Sinak bang awlo, ruahnak dang nei cio khal hai sehla Jesu ih dung an thlun hnu cun Jesu ah an funkhawmaw ih pumkhat an si.

Jesu ah pumkhat siding ah an duhdaan, an ruahnak, an sinak, an neih an hlawn thil, an nu le pa, u le nau, inn le lo, an hnatuan, ti-in anmai bulpak nun cu tanta in Jesu ah an hngataw thluh.

Tui ni kannih Zumtu ti-aw-tu pawl Jesu ih a thlahmi a Tirhthlah pawl ih zirhdaan le zumdaan pawl kan thlun ve maw? Culole kanmai duhdaan ha kan thlun deuh? Jesu ah pumkhat siding ah in dawnkhamtu bik cu ziangha a si? Keimah ka bulpak ahteh Jesu thawn pumkhat sidingah ziangtal tlansanmi ka nei maw? Pekmi ka nei maw? Jesu thawn pumkhat si thei zuam cio uhsi.

Rev. Fr. Dominic THAWM HLEI HNIN