Nitin Thuthangtha (Rev. Fr. Joseph Ro Nei Thang ih sim mi)

TANGDORNAK

Duhdawt zetmi nu le pa, u le nau pawl, tuihni cu tlawngkai nilini September ni 12 ni asiih Bawinu Mary ih thianghlim hmin puaini asi. Mary hmin neitu hmuahhmuah ih puaini asi ruangah “Happy feastday” tiah tla cibai ka run lo buk hai. 

Tuihni ih ka lo hlawm duhmi cu Catholic Calender sungih ta si dingih Kolose 3:12-17 tiang ta asi. Asinan a cuih sungih a ummi caang 12 kha kan siar tlang pei. “Nannih cu Pathian ih minung nan si; a lo duhdawt hai ih amah hrangah a lo hrilmi nan si. Curuangah zawnruahnak, zaangfah thinpemnak, tangdornak, thinnemnak le thinsaunak pawl cu hnipuan bangtukin hruk uh” tiah asi. A cuih sung ihsin “tangdornak” timi kha ka lo hlawm duh hai, u le nau pawl. Curuang ah tangdornak cu nipuan vekin nitin in kan hruk ttulmi Christian parami asi.

Kan Bawipa Jesuh Khrih cu tangdor ten Pathian ih thu a ngai ih minung tisasemnak a lak asi. Tangdor ten Bethlehem khua kiang caw-inn ah tangdor zetmi a nu Mary in a hring asi. Tangdor zetin a serhsiammi a nu le a pa ih thu pawl a ngai asi. Tangdor zetin a pa Joseph ih zirhmi lettama fimnak zir ih a pa a thi hnu ah a cuih fimnak thawn pum a cawm dah asi. Tangdornak thu thangttha asim  ih mitangdor pawlin a thu zirhmi a ngai asi. Mt 11:29 “Kei cu nunnem le tangdornak thinlung neimi ka si. Ka hnen ihsin zirh uhla colhdamnak nan ngah ding asi” tiah tangdornak in zir ter asi, amah Bawipa hnenin. Vancung uknak ih a tumbik mi cu mitang ih a dortu hi nauhak vekin thinlung  a neitu asi ding tiah Mt 18:4 ah Bawipa nih in sim asi.

Bawipa cu tangdornak thawn Pathian ih thu a ngai ih thinglamtah parah thihnak tiang a tuar asi. Curuangah Pathian in amah cu a khaisang ih mi hmuahhmuah in khukbil tahratin Jesuh cu Bawi asi tiah Pa sunlawinak an pek asi (Filipi 2:10-11) kan hmu.

Tangdornak nei dingah ca thianghlim nih in zirhmi Bible bung le cang tampi an um lai asi. Tangdornak kan nei ahcun ziangmi tthathnemnak so kan co ding?

1/Tangdornak kan nei ahcun mah le mah sualnak kan hmu ih Pathian ih hmai ah kan tlak lo nak a lang ih sual in sirter asi. Pathian lungawitertu ah kan cang ding asi. Isaiah 66:2 “Thinlung a neemmi, sualsir awknak thinlung a neimi, ka thu thlun ih I ttihzahtu pawl parah ka lung a awi ding.” tiah kan hmu thei. Ps 51:17 “Tangdor in sualsirmi le lungkuaimi cu Bawipa in a hnong lo asi."

2/ Pathian a lungawi ahcun in duhdawt ding asi.

Thufim 3:34 “Mitangdor pawl parah a duhdawtnak cu a lang ter” …

Bawinu Mary in tangdornak a nei ruangah Pathian in a duhdawtnak cu a langter ih Runtupa hringtu ah cang theinak special a khuan a ngah asi.

3/ Bawipa in lamzindik a hmuh ding asi. 

Ps 25:9 “Mitangdor pawl cu lamzin dik ah a hruai ih amahih duhnak tla a zirh hai asi.”

Samson in Delilah a duh tuk ruangah a thinlung sungih ummi thu thup hman ah a phuang asi. A cakbikmi a thazaang cu a sam ah a um asi tiah a phuang asi.

Tangdornak thinlung kan nei taktak ahcun Pathian nih a lamzin ah in hruai ih a duhmi pawl tla in zirh asi. Pathian in minung hmuahhmuah cu bangrep ten a duhdawt. Mitangdor pawl lawngin a thu zirmi kha an thlun ih a duhdawtnak cu an nunnak ah a cuangce in a lang hai asi.

4/ Pathian ih khaisannak an co ding asi.

Mt 23:12 “Zokhal amah le amah mitang ih a dormi cu mitum ah khaisan asi ding.”

Pathian in mitangdor pawl cu a cawisang ringring asi. Bawi Jesuh cu Bawi hmuahhmuah lakih Bawibik ah a cawisang asi. Bawinu Mary tla mitandortu asi ruangah Siangpahrang bawinu ah a cawisang asi.

5/ Pathian ih thluasuah phunthum an nun sungah an co ding asi.

Thufim 22:4 “Tangdor ten Bawipa ttihzah awla lennak, upatnak le nun saunak na ngah ding.” tiah Pathian ih thlusuah phunthum kan co dingmi in sim. 

Zozo khal milian si ding kan duh, zozokhal upatnak ngah kan duh cio ding, zozo khal dam zetin nun saunak co kan duh cio ding. Cu a siah cun tangdorten um uhsi. 

Nitin kan nunnak ah “Nannih cu Pathian ih minung nan si” ti kha vun mang ringring uhsi. Cun “a lo duhdawt hai ih amah hrangah a lo hrilmi nan si” ti thei ringring uhsi. Curuangah zawnruahnak nei uhsi, zaangfah thinpemnak kan nei pei, tangdornak kha hnipuan vekin kan hruk pei, thinnemnak le thinsaunak pawl kha nei ringring uhsi. A ngaitu nan zate parah Bawipa nih thluasuah lo toih hram seh…