Midang Thansonak ah Lungawi Uh Si (sim tu Rev. Fr. Peter Zin), January 9, 2021.

“Midang Ṭhansonak ah Lungawi Uh Si”

Thuthangtha sim tu Rev. Fr. Peter Zin

 January 9, 2021, Zarhte ni

Siarding: 1 Johan 5:14-21; Saam 150: 1-6, 9; Johan 3:22-30.

           “Pathian pekmi ti lo cun zohman in zianghman comi an nei thei lo ding…. Amah cu a ṭhangso dingih kei cu ka ṭumsuk ding,” himi hi Tipilnak petu Johan ih sim mi ṭongkam pawl a si.

          Thuthangṭha a ngaitu Bawi Khrih ah duhdawtmi nu le pa, u le nau pawl, nan zate hnen ah Bawipa ih pek mi hnangam daihnak um ringring hram seh. Tuni ah ‘Midang Ṭhansonak ah Lungawi Uh Si’ timi thulu thawn thlarau thazaang kan lak tlang dingin ka lo sawm duh. January 9, 2021 (Zarhte ni) ih kan siar ding mi Bible pawl cu veikhat siarnak ah 1 Johan 5:14-21 tiang, Saam kan siar dingmi cu Saam 150: 1-6, 9. Gospel kan siar dingmi cu Johan 3:22-30 tiang a si. Gospel sung ih kan hmu mi Tihnimnak petu Johan ih ṭongkam hrek khat kha ruat tlang in Johan bang tukin kan Bawipa Jesuh Khrih tette a khan theitu, a mah hrang ah thinlung ṭha te thawn a nung thei tu kan si cio theinak dingin thazaang lak cio uh si.

Johan 3:22-30 

22 Cuih hnuah Jesuh cu a dungthluntu pawl thawn Judea peng ah an feh ih an hnenah malte sung a um ih baptisma tla a pek. 23 Johan khal Aenon timi, Salim ihsin a hlat lonak hmun ah, baptisma a pek ve, ziangahtile cutawkah cun tidai tampi a um. Mi tampi a hnenah an ra ih baptisma a pek hai. 24 Himi cu Johan thawng an thlak hlanih a cangmi thil a si. 

25 Johan dungthluntu ṭhenkhat pawl le Judah mipa pakhat cu thianfaiter awknak thu ah thu an el aw. 26 Curuangah Johan hnenah an feh ih, “Sayapa, Jordan tiva ihsin nisuah lamih nangmah thawn a rak um dah pa kha na ciing lai a si lo maw? A thu na rel ṭheumi kha! Atu ah baptisma a pek rero ve ih mi tampi a hnenah an feh a si,” tiah an ti. 

27 Johan in, “Pathian pekmi ti lo cun zohman in zianghman comi an nei thei lo ding. 28 Keimah rori in, ‘Kei cu Messiah ka si lo; a hlanih a rak thleng sungmi ka si,’ tiah ka simmi theitu cu nanmah nan si. 29 Ṭhitmi mothar cu a ṭhitu tlangvalpa ih ta a si; asinain nupi ṭhitu tlangvalpa ih rualpi, a ding ih aw thawm a ngaitu pa cu, tlangvalpa ih aw a theih tikah cun a lung a awi ngaingai. Cuih lungawinak cu ka ta a si ih ka lungawinak cu a famkim a si. 30 Amah cu a ṭhangso dingih kei cu ka ṭumsuk ding,” tiah a ti.

            Tu ih ka siar mi sungin Johan ih simmi “Pathian pekmi ti lo cun zohman in zianghman comi an nei thei lo ding,” timi le “Amah cu a ṭhangso dingih kei cu ka ṭumsuk ding,” timi pahnih tuni ah kan ruat tlang ta hrih pei. Johan hi Bawi Jesuh a ratnak ding lam a sial saktu, a rem saktu asi vekin Bawi Jesuh thawn kan pehtlaihnak ding ah a mah Johan hnen in kan zir dingmi kan cawng dingmi khal tam pi a rak um. A pakhat nakah “Pathian pekmi ti lo cun zohman in zianghman comi an nei thei lo ding,” timi kan ruat hmai sa pei. Ziangtinkim kan nei mi thilri siseh, kan fimnak le kan thiamnak, thil kan ti theinak pawl siseh Pathain ih pek mi Pathian hnen in kan ngah mi a si tiah kan nih zumtu pawl in kan pom mi a si. Johan in “Pathian pekmi ti lo cun zohman in zianghman comi an nei thei lo ding,” a tivek in a si, kan nei mi le kan thiam nak pawl hi Pathian ih in pek mi a si. 

          Johan ih dungthluntu hrekkhat pawl in “Sayapa, Jordan tiva ihsin nisuah lamih nangmah thawn a rak um dah pa kha na ciing lai a si lo maw? A thu na rel ṭheumi kha! Atu ah baptisma a pek rero ve ih mi tampi a hnenah an feh a si,” tiah an ti. An ṭongkam te hi kan zoh tikah an duh lem lo mi hi a bang zet. Hihi minung tampi ih kan nei ṭheu mi thinlung te a si kan ti le a sual lo ding. Kan mah hnak in midang in a ṭha dueh in thil an tuah thei le asilole minung pawl in kan mah hnak in midang sawn kha an duh sawn an pan peih deuh tikah kan thin a nuam lo fiang deuh in kan sim ding a si le iksiknak kan nei ṭheu. Hi tawk ah Johan ih thinlung te hi cawng a tlak zet a si. Johan in cu mipi pawl a mah hnen hnak in hmun dangah tipilnak lak dingin an feh ti a thei tikah a poi a ti lo nasa ih “Pathian pekmi ti lo cun zohman in zianghman comi an nei thei lo ding,” tiah a ti. Midang in a mah ih tuah vek an tuah ve tikah, Pathain pekmi tiah a lung a kim pi. Leitlun minung men hmuhnak lam in kan zoh ding asi le cu midang hnak in ṭha dueh kan duh ih kan zuam aw rero ṭheu, asinan thlarau lam in kan zoh ding a si le cu zuang aw rero a ṭul lo ih kan mah ih tuah ding ṭuanvo kha ṭha te in tuah ding sawn kha asi.

          A famkim mi Khrihfa nun kan nei theinak dingah cu midang pawl kan hnak in an ṭhangso tikah iksik ding, riahsia ding siloin lungawi pi sawn ding kha kan si. Pathian hna kan ṭuan nak khal ah ka thusim mi hnak in , ka tuah mi hnak in amah ih thusim mi, a mah ih tuah mi in an duh sawn tivek in thin nuam lo in kan um pang a si le cu a poi zet ding. Pathian ram karhzai nak ding si lo in kan mah hmin ṭhat nak ding hrang ah kan ṭuan vek khi a bang ding a si. Zozo in tuah khal siseh Pathian ram karhzai nak ding a si poh ah cun midang ih thil tuah thei nak hi kan hnak in a ṭha sawn tik ah kan lung ding sawn hi asi.  

          Herod cu Bawi Jesuh a suak tikah a mah hnak in a sang sawn ding a phang tuk ih that ding ah a hawl. Asinan Johan cun “Amah cu a ṭhangso dingih kei cu ka ṭumsuk ding,” tiah a ti a si. Khrihfa kan nunnak ah kanmah hmin ṭhatnak hnak in Bawipa hmin ṭhat ter ding hi a thu pi sawn a si. Kan mah hmin ṭhat ter ding hnak in midang pawl an hmin kan ṭha ter thei ding hi a thupi sawn ih a sunglawi sawn a si. Midang pawl kan hnakih an ṭhangso sawn tikah lungawi pi thiamtu si ding in zuam ringring uh si. Bawipa in lo thluasuah hai hram seh.

Fr. Peter Lal Zin Thang (Hakha Diocese)