I thlun uh (sim tu Rev. Fr. Pius Cung), January 11, 2021.

“I thlun uh”

Thuthangtha sim tu Rev. Fr. Pius Kei Lian Cung

January 11, 2021.

Siarding: Mk 1:14-20

          Duhdawt mi u le nau pawl, Bawipa ih pekmi damcahnak, hnangamnak le lungawinak nan parah thleng hram seh. Jan 11, ni ih kan siarmi thuthangtha cu Mk 1:14-20 a si ih, Simon le a nau Andrew, cun James le anau Johan pawl Jesuh nih a dungthluntu dingah a ko hai tithu kan siar. “I thlun uhla milai kaitu ah ka lo tuah ding”  tiih kakhat a kawhnak in, ziangkim tanta in Jesuh dung an thlun cih mai ti khal kan hmu. Kan thulu dingah ‘I thlun uh’ ti ka hril. Jesuh ih ‘I thlun uh’ a ti mi tongfang hin thu pa 2 a khihhmuh. Pakhatnak cu, a mai thu in zirhmi thlun ding a si ih, a pahnihnak cu a mai nun vek ih nun ding a si.                                       

1. Jesuh in thuhla tampi in zirh.

          Vancung uknak thuthuk siseh, Pathian duhdawk ding le innhnen duhdawt ding thu siseh, tangdornak le mingaithiamnak thu pawl siseh tampi in zirh. Kan ruahnak, kan lungput, kan awka le nucan ziaza ih nitin  kan tlun dingmi thuhla tampi in zirh. Cu pawl cu kan mai thatnak ding hrang lawnglawng a si. Pathian ih tongkam le Jesuh ih in zirhmi thluhla pawl cu Bible Cathiang hlimah ngankhum in a um. Upatnak thawn tampi kan siar a si le ka thlarau, le kan thinlung ah huhamcahnak thawn hna a tuanih nun remawknak le nun thleng awknak in pe. Mi hrek khat cun Pathian thuhla cu kan theihcia hman kan thluncawk lo, thei bet le zirbet rero a tul lo titu tla kan um thiam. Bawipa ih tongkam cu hmual a nei tuk. “I thlun uh” ti mi tongfang kakhat lawng hman in Simon, Andrew, James le Johan nunzia cu a linglet in a thleng thluh thei. An neih ziangkim an tan ngam mai. Bawipa ih zirhnak tongkam cun ninghan riahsiat canah in hnem, thinpih beidong canah thazang in pe, hmailam umtu khawsaknak hrangah meitleu bangin lam in hruai. Saya ih thusim thluntu thlawngta cu ca an thiam. Nu le Pa ih nunsim ngaitu fa le cu thluasuah an co. Jesuh ih thuzirh thluntu, zumtu cun leithluasuah le kumkhua nunnak vancung tiang kan co ngah ding a si. 

2. Amai nun vek ih nung ding kan si. 

          Jesuh in thu in zirh tikah a tongka lawngin in zirh lo, a nuncan ziazia khal in in zirh. Cucu kan cawn dingmi nunzia a siih a dung kan thlun nak  a san le a sullam khal a si. Minung in harsatnak kan ton a si le, ‘Pathian in ziangruangah sipei hivek harnak ka parah a thlen ter’ tiah mah le mah thu kan sut aw theu. Kan nauhak deuh lai ah, midang ih harsatnak kan hmuh a si len, ‘Pathian sining la maw, ka dam ter tak ding, ka lian ter mai ding nain,’ tiah ka rak ti theu. Ka u pat hnuih ka ruah sal tikah Pathian rak si in mai duhdan ih thil tuah thei si bangning la mi ka bawmmi hnak in, mi ka siatsuahmi hi a let in a tam rori ding ti ka hmu sal. Kan mai harnak siseh, midang harnak ah siseh Pathian in ziangah  a siang, ziangsi a duh san ti hi Jesuh thawn hawl tlang u si.                    

           Pathian fapa, ziangkim ti thei Jesuh krih a mah rori khal rilrawn, tihal, mitthli tlak, mitampi ih hnon le simsiat, sualpuhnak, hremnak le thahnak tiang a tuar. Jesuh cun a mai duhdan hnak in a Pa ih duhdan i nun hi nuam a ti sawn, thupi a ti sawn. Cuti ih a nunnak cun lei le van ih Bawibik ah a khaisang. Jesuh cun leipar ih natnak phunkim a dam ter lai khalah zangfahnak le duhdawt nak thukzet thawn a tuan. Jesuh dungthlun hi harnak hmuahhmuah in kan luatding tinak a si lo ih, harnak hi ziang tivek in kan tuarsuak thei ding, ziang tin kan pah tlangthei ding timi nunnak zirngah hi a si sawn. Harnak lakah Jesuh thawn tuartlang u si, zawnruat aw ten zangfahnak le duhddawtnak thawn pehtlaih aw ringring u si. Thihnak ih khuhneh thei lo mi kumkhua ih nung Jesuh ih nunnak, co tu ding lawnglawng kan si. 

Jesuh ih tongmi “milai kaitu ah ka lo tuah ding” a ti mi khal hin thu pa 2 a sawhkhih. An tongkam, thuzirhnak ih Milai kai dingah le, an nun can ziaza ih milai kai ding ding in Jesuh in a ko, a zirh hai a si. Jesuh nih an pali ih a kaih danvek thotho in, Himi dungthluntu pawl khalin milai in kai ve ding a si.

1. An tongkam in minung an kai.

          Dungthlun tu pawl cu Vancung uknak thuthangtha le Jesuh thuhla le a rundamnak thu cu miphun zakip hnenah an phuang. Jesuh Krih a thawhsal hnu, vancung a kai hlan te ah a dungthluntu pawl hnenah ziangtin a cah ta ti le, “Ka thupekmi hmuahhmuah thlun dingin vazirh uh” a ti thu Mt 28:20 ah finag zet in kan hmu. Dungthlun tu pawl ih zirhmi cu Jesuh ih thupek mi an siih kan ngai, kan thlun a tul. Dungthluntu pawl ngai hi Jesuh ih thu ngai kan si. Pentecost niah Peter ih thusimnak in minung 3000 zumtu, ah an cang. Milai tampi kaih hram a thok. Jesuh ih thupeknak cu Peter in a thlun tikah lawngkhat ko rori in mangbangza nga tampi an kai ngah. Tui sunni tiang khalah Jesuh ih thuzirhnak, Peter ih thusimnak, a dungthluntu 12 pawl ih thucahnak cu Pawlpi hnenih sin kan ngai, kan thei ringring a si. Dungthluntu pawlih thuzirhnak ngaiin an kaihmi zumtu, krifa kan sinak hi lungawi sopar ten cohlang u si. Peter hnenih Jesuh ih pekmi ngabur pi cu, miphun kip le tong phunkim telthluh Catholic Pawlpi kan si. Dungthluntu pawlih thuzirhnak cu leitlun kilkip ah a thang. Pawlpi thu zirhnak thlunin Jesuh dung thlun u si. Peter ih kaihmi Catholic Krifa pawl cu Jesuh ih kawhmi, hrilmi kan si.

2. An mai nundan khalin minung in kai.

          Tuisun siarmi sungih Dungthlun tu pali pawl hi a dang pawl hnak in a cuangce rori. Jesuh ih a kawh hmaisa bik mi an siih, an pali in ngakai  an si thluh. An nunziaza in Jesuh an thlunih, an nunnak in zumtu tampi khal in kai. Peter cu dungthluntu lakih hruaitu lubik a siih Anrew cu Jesuh tong hmaisa biktu a si. James cu  dungthluntu pawl lakah thisen luang, Martyr ih thi hmaisabik tu a si ih Johan ih Jesuh ih a duhdawtmi dungthluntu le tarkun tiang nungmi a si. An nunsung Jesuh hrangah an nungih, Jesuh hmin in thihnak an tuar. Hitluk ih Jesuh thluntu tha a um thei ding maw. Jesuh dung an thlunzia cu zohthim tlak le lawmtlak, uar tlak an si. Hiti tluk tiangih Jesuh an thluntheinak an nunzia cun zumtu tampi ih thinlung le nunnak cu in kai ngah ih Jesuh tlunve dingin thazang le ralthat nak in pe a si. Jesuh hrangih in kaihmi milai pawl in, in kai tu pawl cu sunlawihnak kan pekih an puai khal tuisan tiang kan tuah rero. Peter ih puai cu June 29, Andrew puai cu November 30, James ih puai cu July 25, Johan ih puai cu December 27, ah kan tuah. Hi ti vekih kumtinte an puai kan tuahnak hin an thuzirhmi thluntu kan sinak a lang ter. An mah pawlih kaih mi minung pawl kan si nak le in kai tu an si nak a lang ter. An mah pawl thawn hmunkhat te in, kan nih pawl khal Jesuh in ‘I tlun uh’ tiah in kawh khawm mi kan si tinak a lang ter. 

          Jesuh ih in kawhnak aw, “I thlun uh”  ti mi theiin amai in zirhmi thlun u si. Dungthlun tu pawl vek in thih tiang rinum ten thlun u si. Dungthlun tu pawl ih zirhmi,  pawlpi lamhruainak  ngai u si. Vancung in hi leipar ih a ra tum tu Jesuh in ‘I tlun uh’ in ti. Kan nun sung a mahhi thlun rero ko u sih. Leipar ih si Vancung a kaisal nak khalah “I tlun uh” in ti.  Vuncungram tiang thlun lan vivo ko u si. Bawipa a hmin thangthant si ko seh, Amen.