Puithiam lo cun (sim tu - Rev. Fr. Dominic Thawm HLei Hnin), January 14, 2021.

Puithiam lo cun

Thuthangtha sim tu Rev. Fr. Dominic Hnin

Caantluang zarh khatnak, tlawngkai nili ni (Jan 14, 2021)

Siarding: Heb 3:7-14; Ps. 95:6-11; Mk 1:40-45

• Tuisun kan siarmi thuthangttha ah Bawipa Jesuh cu Galilee ramah khawkhat hnu khawkhat tlawng in thuthangttha a sim phah vivo laiah Phaarnat neitu pakhat cu a hnenah ra in damnak a ra dil tikah Bawipa khal in a rak damternak thu kan hmu. Himi thu theifiang dingah Phaarnat ih um daan le a vuirah zoh uhsi.
• Lev 13 le 14 sungah phaarnat thu tampi kan hmu. Lev 13:1-3 ahcun 'Mi pakhat in a vun parah hma a nei asile cuihma cu Puithiam hnenah a hei hmuh dingih Puithiam in phaarnat a si a ti ahcun "mi thiangfailo" ti ah a than ding ih mipi pawl nawn lo-in a dang te'n a um ding.' a ti.
• Number 5:2 ahcun "phaarnat a tuaartu le a thianglo mi hmuahhmuah cu dawi suak thluh uh" a ti. Phaarnat cu pakhat le pakhat suan awk a theih ruangah phaarnat neitu cu khawleng ah, a dang te ih umter a si ttheu. Cuticun midang a pawl thei lo ih natnak khal a suan nawn lo.
• An hnen ih a ratu an um pang hmanah, "ka thianglo, ka thianglo" ti ah au in an rak kham ttheu. Himi an natnak ruangah thleidan an rak si. Cuticun milai covo an nei nawn lo.
•  
• Tuisun kan siarmi Bible sungin, nat neitu pa ii dinhmun in zoh sehla, annih cu mi thiang failo, natnei a si tikah Bawipa Jesuh ih hnenah ra thei dinhmun a silo. Amah Bawipa Jesuh tu hman a hnen ah va feh sehla, "ka thianglo, ka thianglo" ti ah au phah in tlan ding lam hman a si sawn. Himi miphaar pawl thawi a naih aw theitu cu puithiam lawng a si. Cuhmanah himi nu himi pa in "phaarnat a nei, neilo" timi nemhnget ding ah a si.
• Asinan Bawipa Jesuh cu "Pathian ih hriak culh a si" ti a zum ruangah le "ii damter thei" ti a zum ruangah a va pannak a si.
• Cukhalah, "na duh ahcun ii thiangter thei" a ti. Hngalhngawng ttong tla khi a bang. Asinan, "Bawipa ih lamah ziangvek thinlung a um, mi zangfahnak thinlung a um" timi langter a duh ruangah cangantu in hitivek in ttongfang a hmannak a si sawn. Hnonmi pa ih a neihmi rinsannak cun Bawipa Jesuh ih zangfahnak a tong ngah ih thianhlimak a co ngah. Hmanseh, cui thiamhlimnak cu puithiam ih nemhnget a rak ttul.
•  
• Lev 14:1-9 sungah Phaarnat ihsin a dam tu cu Puithiam in a rak zoh pei ih "a dam" ti ih a rak nemhnget a si ahcun Moses daan ih tuahding a timi thawinak pawl a tuah pei ih mithiang a si thlang ding a ti.
• Nat neitu hnen ih Bawipa ih ttongmi khal hi ruah ding tampi a um, "zo khal va sim hlah, puithiam hnenah va feh aw la va hmuh aw aw" a ti. Puithiam siarlo, midang in an theih ding a si hrih lo, puithiam hnen lawngah sim a thiang hrih lai. Ziangah tile puithiam ih ttongkam thawn lawngin annih cu mipi hmaiah a phaarnat ihsin thiamhlimnak a ngah thei ding.
• Puithiam ih zohnak ruangah a phaarnat ihsin a thiang tinak a silo, Bawipa ih ttongkam khat ruangah a dam a si sawn. Asinan, amah Bawipa Jesuh rori in puithiam ih hnattuannak cu a upat.
•  
• Numbers 12:1-15 sungah Moses, Miriam le Aaron pawl ih thu kan hmu. Moses in Kush nunau a tthit ruangah Miriam le Aaron in Moses cu an thangsiat. 'Pathian cu Moses hnen lawng in maw thu a sim, kan hnen khalin a si ve" an ti. A theih vek kan thei ve, a thiam vek kan thiam ve an ti. Cutikah Pathian in a ko hai ih a kawk hai. Pathian in Miriam cu phaarnat thawn a hrem, Aaron cu Moses thawngin ngaidam a dil man ruangah a him. Cumi thil a hmuh tikah Moses in Miriam ih hrang ah Pathian hnenah ngaidam a dilsak tikah Miriam khal cu a dam sal ti kan thei.
•  
• Pathian ih ttong kamkhat ruangih a cangmi natnak cu Pathian ih ttong kamkhat ruangah a dam sal. Cuvek thotho in tuini kan siarmi Bible khalah Bawipa Jesuh ih ttong kamkhat "lo thianter ka duh, thiang thlang aw'' timi ruangah phaarnat cu milai hnen ihsin a hlo.
• Phaarnat a neih ruangih a rak hlo thluh zomi a covo cu tu-ah pharnat a neih nawlo nak in ngah sal ding a si. Hnonmi milai ihsin mikel ah a cang sal. Miilak ih tlang thei lomi dinhmun ihsin miilak ah a thlang thei sal ding. Bawipa ih hnen ihsicun a ttulzat a ngah thluh zo. Asinan, sam mi a um lai. Cucu "Puithiam ii nemhngetnak" a si. Bawipa in "puithiam hnenah va feh aw la, Moses daan ih tuahttul a ti mi pawl va tuah ta aw" a ti.
•  
• Biaknak sakhua kan ti tikah "a tung le a phei" a um. A tung cu nangmah le Pathian karlak ih pehtlaih awknak asi-ih a phei cu nangmah le midang karlak ih pehtlaih awknak a si. Nangmah le Pathian karlak ih remdaihnak cu Bawipa ih ngai damnak, ''thiang thlang aw" a lo tinak thawn tuah fel a si zo nan nangmah le midang karlak ih remdaihnak hrangah Bawipa in "Puithiam hnenah va feh aw la va hmuh aw" a ti.
•  
• Cun 2Chronicles 26:19-21 sung khalah Ozias singpahrang cun puithiam Azarias cu ziang ih a siarlo ruangah Pathian in phaarnat thawn a hrem ti kan hmu.
• Voi tampi cu puithiam hi a minung sinak zoh in relsiat le nautat a si ttheu. Khavek cu ka thei ve, ka thiam ve, ka zir ve kan ti ttheu. Hmanseh, puithiam cu a thiam le thiam lo thu a si lo ih amah thawngin Pathian in hna a ttuan ruangah a si sawn.
•  
• Natnak timi cu nangmah lawng a tuartu na si men thei nan, na natnak ruangah midang khal a va hnaihnok ve. Curuangah nangmah le Pathian karlak lawngah tawk loin nangmah le midang larlak khalah 'hnaihnoknak le hmualneihnak' a um ruangah Pathian ih kutcak langnak cu puithiam ih nemhngetnak thawn a komaw a si le a hmualneihnak a famkim.
• Bawipa cun "zo khal va sim hlah!" a ti. Hipa phaarnat ihsin a dam ti cu puithiam lawng ih rak theih ding a si. Cuihnu ah a ttulmi thawinak tuahin mipi in thei leh hai seh.
• Asinan, Bawipa ih thupek cu thlun lo-in le a lungawinak suup thei lo-in a aupi tikah Bawipa ih hnattuan hnaihnoktu ah a cang.
• Bawipa in 'tuah aw' a timi tuah lawng hi "a thu thlun" a silo, ''tuah hlah' a timi tuahlo ih um khal hi a thu thlun thotho a si. Voi tampi cu thil 'tuah' a ttul theu ih voi tampi lehthung cu 'tuahlo' ih um a ttul theu. Ka tuah thei, ka thiam ti ih kan tuah thluh mi hi thil ttha an si thluh cuanglo.
• Na tuah dingmi le a tuah dingmi tla theithiam le tthen thiam tum aw. Cu lole Bawipa ih hnattuan hnaihnoktu na si pang ding.
• Bawipa ih thupek cu thlun aw la, cuticun a hnattuan khal a tluang vivo ding.