Thu theih fianglo sim cu Buainak an ti (Rev. Fr. Lucas Tha Ling) Sumih sim mi thuthangtha

Thutheih Fianglo Sim cu Buainak an Ti

Thuthangtha sim tu Rev. Fr. Lucas Tha Ling Sum

January 20, 2021

Siarding: Marka 3: 1-6:

          Zum tu u le nau, Pathian in lo umpi hram seh.

          Tuittum ah Thutheih Fianglo Sim cu Buainak a Si an Ti Bangin, timi thulu ah hmang in Pathian thuh ruat khawm tlang hrih uhsi. Hmaisa ah Baibal kan ngai ta hrih pei.

          Marka 3: 1-6: “Cule Jesuh cu Sinakok ah a va feh salih cutawkah kut zengpa pakhat a rak um. Jesuh kha sualpuh a duh tu pawl tla an rak um ih curuangah Sabath ni ah a damter ding maw, damter lo ding, tiah ttha tein an zoh. Jesuh in cu pa cu hmai lam ah hin ra suak hnik, tiah a ti. Cule mipi cu kan Daan in Sabbath ni ah ziang tuah ding so in on? Mi bmawm ding maw harsatnak mi pek ding so? Mi nunnak runsuah ding maw siatsuah ding so, tiah a sut. 

            Asinan kam khat hman an ttong lo. Jesuh cun a thinheng in a zoh vivo hai ih an thinlung a ruh zia le an palh zia a hmuh tikah a riah a sia zet. Cule mipa cu “Na baan hawi aw,” a ti. A baan cu a hawi ih a dam ngaingai. Cutikah Farasi mi pawl cu sinakok ihsin an suak ih Herod ih milai pawl thawn Jesuh thah theinak dingah thu an ruat khawm.”

Zumtu u le nau, tui kan siar mi Baibal kha a tlangpi ih kan zoh asilen thil phun 2 kan hmuh. 

1. A pakhat nak cu Bawi Jesuh in Sabbath niih kut zengpa a dam ter nak thu a si. 
2. Cun a pahnih nak ah Bawi Jesuh ih Sabbath ni ih kut zengpa a dam ter ruangah Farasi pawl an thin hengih Bawi Jesuh thah a tumnak thu a si.

Ziangruangah Farasi pawl hi damnak a ngah tu kutzengpa lungawi pi lo in an um? Cun Bawi Jesuh ih kutzeng pa a dam ter tikah, ziangruangah, Bawi Jesuh hnenah lungawinak thu simlo in le thangtthat sawn loin a thah lamlam a tum sawn a si pei? A ruangah hi tampi a um ding. Asinan, a thupi zet mi pakhat in tittum ah kan zoh hrih pei. 

            Leitlun kan nunnak ih, thil pawi mawh zet mi pa pakhat cu mi-ih hmai ah, mi, ziang siar lemlo ih, ka thiam, ka tawk a si, timi thinlung nei ih kan ttong le kan cangvaih pang ttheu hi a si. Cu tivek ih kan um caan ah khin, a ngaingai ih kan sim asilen mi ih hnih san men mi ah kan cang pang ttheu. Ttongdangih kan sim asilen a hman lo mi thu pakhatkhat khi, a hman tiih kan ruah sual mi khi a si. Himi ih ttih nung ngaingai mi pakhat a si. 

           Zumtu u le nau, Farasi pawl hi mitampi in upat zet ih saya tiih kawh mi an si. Cun an mah le an mah khal mifim mithiam tiih a ruat aw tu an si. Asinan, Bawi Jesuh ih hmai ah cun, an fimnak le an thiamnak cu ziang hman a si lo. A dik, a hman an timi tampi khi Bawi Jesuh ih hrangah cun a dik famkim lo mi tampi a um. Thu theih fianglo sim cu buainak a si, an ti bangin Farasi pawl in thu theih fiang ngaingai lo ih thu an zirh ih ruangah mitampi parah buainak tampi a suak. 

           Tahtthimnak ah mitu ih kan theih bangin Sabbath ni cu ulh ding a si ih kutzeng mi khal dam ter ding a si lo. Sual a si, daan pah bal a si, an ti. Curuangah Bawi Jesuh ih kutzeng pa Sabbath ni ih a dam ter tikah damnak a ngah tu kut zengpa lungawi pi sawn lo in le Bawi Jesuh thangtthat sawn loin, an thin a heng ciamco ih Bawi Jesuh lamlam a thah an tum. A dik lo mi khi, a dik tiah a zum sual. A dik mi a si khi, a dik lo tiih an zum sual a si. Hi mihi ttih nung za ngaingai a si.

           Zumtu u le nau, vei hnih vei khat cu Farasi vek kan cang pang ttheu. Ralring cio uh si. Tthimnak ah mi tampi in vanram kai nak dingah Kohhran a ttul lo, cun a silolen tuahnak a ttul lo a si, tiah an ti ttheu. Kan zumsual pang maw? A ttul mi khi, a ttul lo a si, tiah kan zumsual pang maw? Kohhran a ttul ih ruangah Jesuh in Kohhran a din; tuah nak a ttul ih ruangah hna ttha ttuan uh la vanram nan kai ding a si, tiah Matthai bung 25 cang 31 in 46 sungah fiangten in sim.

           Zumtu u le nau, a dik lo mi thil cu, a dik tiah zum sual pang lolen ralring ciau uh sih. Cun a dik mi thil cu, a dik lo a si tiah, zum sual pang lolen ralring ciau uh sih. 

           Pathian ih Solomon Siangpahrang paih hnen ih a sia a ttha, a dik a dik lo, timi thlen dan thiamnak le theih theinak fimnak a pek vek in thuthangttha ngai tu nan zaten Thiangthlarau Pathian in fimthiamnak laksawng lo pe hram she. Amen.