Sankhuk daih thawinak (Rev. Fr. Dominic Hnin), January 21, 2021.

Sankhuk daih thawinak

Thuthangtha sim tu Rev. Fr. Dominic Hnin

Caantluang zarh (2) nak, tlawngkai nili ni (Jan 21, 2021)

Siarding: Heb 7:25-8:6; Ps. 40:6-9, 16; Mk 3:7-12

• Tuihlan ahcun Thuthangttha kan siarmi sungta ihsin thlarau thazaang kan hlawm aw ttheu nan, tuisun cu hmaisabik ih kan siarmi, Hebrew cakuat, sungta ruat tlang uhsi. Tuisun kan siarmi ah "sankhuk daih thawinak' thu kan hmu.
• Thawinak cu puithiam lawng ih tuahmi a si ruangah puithiam thu rel hmaisa lo in thawinak thu rel cu kan thei fiang lo ding. Curuangah, himi thawinak thu theithiam dingah puithiam sinak rel hmai sa uh si. Hebrew cakuat bung sarih (Heb 7) kan zoh asile puithiam phun thum kan hmu. Cucu Melkhizadek ih puithiam sinak, Levi miphun ih puithiam sinak le Jasuh Khrih ih puithiam sinak pawl an si.
• Melchizedek cu a suahnak thu le a thihnak thu hi kan Bible ah hmuh ding a um lo. Abraham san lai ah Abraham cu thluasuah rak petu a si ih ahnenah Abraham in tthenhra tthenkhat a rak pe. Melchizedek ih puithiam sinak cu kumkhua a hmunmi puithiam sinak in a rel.
• Levi miphun ih puithiam sinak cu Ro sar ih ttuan a rak si ruangah Levi miphun lawng in an rak co. Mipumsiarnak 18 sungah Levi puithiam pawl ih dan le dun pawl kan hmu. Cun Levi pawl ih puithiam sinak cu a cem thei ih cucu an thih caan ah a cem a si. Cu ruangah Levi miphun sinak ruangih neihmi puithiam sinak cun kumkua hrang daih thawinak a tuah thei lo.
• Kan Bawipa Jesu ih puithiam sinak cu Melchizedek bangtukin kumkhua a hmunmi a si. Jesuh cu Levi miphun a silo ruangah Levi puithiam sinak a rek nei lo. Kan Bible khalin Levi puithiam sinak vekin a ti lo ih Melchizedek vekin kumkhua a  hmunmi puithiam a ti.
•  
• Jesuh ih puithiam sinak cu kumkhua in kumkhua tiang a hmun ti ih kan Bible ih a relnak cu Jesuh ih thawinak cu kumkhua a hmun ding timi a rel duh ruangah zin a rak sial cia a si.
• Kan Bawipa Jesuh ih puithiam sinak cu kannih milai pawl ih kan ttul bikmi a rak si. Ziangah tile kan hrangah a thianghlim ih hnawihnihnak a nei lo mi thawinak kan ttul ruangah a si.
• Puithiam cun misual pawl hrangah sual ngaithiamnak hrang thawinak a tuah ttheu vek iin amah khal milai a si ih sual neimi a si ruangah amai hrang khalah thawinak a rak tuah theu. Asinan, kan Bawipa Jesuh cu amai sualnak hrangah sual ngaidamnak hrangah thawinak a tuah a ttul lo, ziangah tile amah cu Pathian a si ih sualnak a nei lo.
• Daan cun milai pawl lawng kha puthiam sangsinak a pe thei. Sikhal sehla Pathian ih tukamnak cu "Ps 110:4 ah '' Bawipa in a thukam cu siatcam in a tuah zo ih Puithiam Melchizedek bangin kumkhua in Puithiam na si ding'' ti ih a rak ti ruangah Pathian ih Fapa cu Melchizedek bangin a kumkhua ih puithiam sang ah a cang.''
• Puithiam in nitin sual ngaidamnak rai thawi a ttul timi cu Bible sungah kan hmu lo. Sual sir ni timi Day of Atonement ni ahcun puithiam sang in amai sualnak hrangah rai a thawi hnu ah mipi hrangah sualngaidamnak rai a thawi ti ah (Lev. 16:11-19) kan hmu.
• Kan Bawipa Jesuh cu Calvary tlang parah kan hrangah kumkhua daih sual ngaidamnak rai a thawi.
• Kan Bible in "vancung Pathian tohkham sunglawi vorhlam rori ah a to theitu Puithiam kan nei" (Heb 8:1)" a ti.
• Puithiam pawl ih hnattuan lakih a sunglawibik le a thupibik cu "sual ngaidamnak rai theinak" hi a si. Kan Bawipa Jesuh ih tuahmi "sual ngaidamnak rai thawinak" cu hi leilung par ihsin a thok zo, a hlece in Calvary tlang par ihsin a thok zo nan, vancung khalah cui puithiam hnattuan cu a ttuan peh vivo. Ziangah tile Bawipa Jesuh ih thihnak, sual ngaidamnak hrangih thawinak ruangih a thihnak cu vancung sangka ong ih a luhnak a rak si ruangah a si. Curuangah kan Puithiam cu vancung ah Pathian ih vorhlam ah a to ti ah kan Bible cun in ti. 
• Hebrew pawl hnen ih cakuat tu cun "hi leilung parih thil cang cu a thluathlam men lawng a si ih a taktak cu vancungra lawngah a si" timi ruahnak a nei. Curuangah Moses hnen ah Pathian ih a rak khihhmuhnak cu vawn mang sal in "tlang parih ka lo hmuhmi inruang vek cekci in na tuah pei (Exo 25:40)" a rak ti. Moses ih sak dingmi puanthlam cu vancungih biakttheng vek ih sakter a duh ruangah Pathian in Moses hnen ah "ziang vek in puan thlam na sak ding" ti a rak sim fiangnak a si.
• Himi ttongfang cu hmang sal in "hi leilung ih puithiam sinak cu a thluathlam men a rak si ih puithiam sinak taktak cu vaancungah a si sawn ti ah a rel.
• Bawipa cu leilung parah um ringring sehla cu puithiam a si lo ding a ti. Ziangah ti le daan ii pekmi puithiam, hrinhnam ruangih puithiam an um tikah cu pawl in puithiam hnattuan an ttuan ih Bawipa Jesuh a ttul lo. Asinan Bawipa cu vancung ih akai nak thawngin le Pathian ih vorhlam ah puithiam hnattuan ttuan in, kan hrang ih dilsaktu ih a umnak thawngin kumkhua puithiam a si.
• Bawipa cun van a thlen hnu ah thawinak dang a tuah nawn lo. A rak tuah mi thawinak cu kumkhua daih a si. Ziangah tile amah cu Melchisedek bangin kumkhua puithiam a si.
• Himi ah Bawipa ih kan sual ngaidamnak ding hrangih a tuahmi thawinak cu kumkhua daih a si ruangah "zianghman a ttul nawnlo" titu an um. Bawipa ih thawinak cu kumkhua hrang daih cu a si ko nan cumi ih vuirah ca ngah ve na duh a si le cui "thawinak nun" nei aw. Cui thawinak nun nan neih lo ahcun Bawipa ih san khuk daih thawinak cu na hrangah tthathnemnak a nei lo pang ding, na hrang a si lo pang ding. Na hrang a si lo ahcun "na cem" a si ko.
• Himi ah mi tampi in "cucu Missa raithawinak" teh a ttul nawn maw si? Missa rai thawinak cu Calvary tlang thawinak a si ahcun Bawipa Jesuh cu tu le tu thah rero ah a cang ding" an ti. 
• Missa raithawinak hi Calvary thawinak a si ih cui thawinak cu a hranpa te ih tuahsal tinak a silo, a peh ih tuah vivo mi a si sawn. Bawipa Jesuh in Calvary tlang parih a thih ding thu a theihcia ruangah a thih hlanah a dungthluntu pawl hnenah "rawn tuah uh" ti ih a rak fialmi, Bawipa ih netabik zanriah einak" kha a si. Bawipa ih harsat a tuarnak, a thihnak le a thawhsalnak pawl cu tthentthek theih an si lo ruangah Bawipa zanrah le Clvary tlang ih thawinak cu a duhsan le sullam kha tthenthlak vuarvi a theih lo.
• Bawipa cu Melchizedek vein kumkhua puithiam a si ih in tuahsakmi thawinak khal cu kumkhua daih thawinak a si. Cumi sankhuk daih thawinak ih vuirah eive na duh a si le cui thawinak nun nei aw.