“Thukamnak thar minung kan si” (Rev. Fr. Joseph Ro Nei Thang), January 22, 2021.

“Thukamnak thar minung kan si”

Thuthangtha sim tu Rev. Fr. Joseph Ro Nei Thang

Caantluang zarh (2) nak, tlawngkai ninga ni (Jan 22, 2021)

Siarding: Hebrew 8:6-13; Ps 85:7+9, 10-11, 12-13; Mk 3:13-19.

            Kan umnak cio ihsin RVA Falam Chin Service a rak ngai ringringtu Bawipa Jesuh Khrih ah duhdawt zetmi nu le pa, u le nau pawl, “kan Bawipa Jesuh Khrih ih zaangfahknak veel, Pa Pathian ih duhdawtnak le Thlarau Thianghlim ih pumkhat sinak pawl cu nan zate thawn um hram seh” tiah cibai ka run lo buk hai. Tuihni cu 2021 kum, January thla ni 22, Tlawngkai ni 5 ni asi. Cun tuihni cu Mithianghlim Vincent ih puaini tla asi. Amah cu Deacon pakhat asiih Rome Siangpahrang Diocletian ih sannak Valencia khua ah Khrih hrangih hremnak le thahnak tuartu asi. Tuihni ih kan siar dingmi Bible pawl cu Hebrew 8:6-13 tiang, Ps 85:7+9, 10-11, 12-13; Saam asawn:- “Zaangfahnak le rintlaksinak cu an tong aw zo” tiah asi pei. Cun thuthang ttha ahcun Mk 3:13-19 tiang asi pei. Tuihni ih kan ruah khawm tlang dingmi cu “Thukamnak thar minung kan si” tiah asi pei. Cun tuih hrawng cu Hakha Diocese sungih Pathian ih hnattuan thianghlim a ttuan rero tu kan duhdawt zetmi kan Puithiam pawlin retreat an tuah lai fang asi. COIVD-19 pulnat siava ruangah hmun khat tein kan tuah theilo ih mahih zungne a laih in kan tuah rero lai fang asiih a cuangce in thlacam sak cio uhsi, sum le pai thawn tla bawmnak run pe cio uhsi tiah ka run lo sawm duh. 

            Tuihni kan siarmi Hebrew cakuat 8:7 ah “A hmaisa thukamnak ah famkim lo nak um hlah sehla a neta sawn ih thukamnak cu a ttul lo ding” tiah in zirh. Curuangah thukamnak hlun le thukamnak thar kha hmaisabik ah zoh cio uhsi. Thukamnak hlun cu Pathian in Moses hnenah a pekmi asiih Israel miphun hrangah ansi. Thukamnak thar cu Bawipa Jesuh in adungthluntu pawl hnenah a pekih Israel thar asimi zumtu hmuahhmuah hrangah a pek asi. Thukamnak hlun ahcun lehrul kirnak hi sual asi lo nain thukamnak thar ahcun tangdornak le sualngaidamnak thawn hram a ttohmi duhdawtnak asi ruangah lehrulkirnak cu sual ah a cang asi. Thukamnak hlun cu Jesuh Khrih in a cemter asi tiah (Rome 10:4) ah in simih Bawipa Jesuh Khrih in thukamnak thar cu a tuah asi tiah (Hebrew 8:6) ah in sim asi. Thukamnak hlun in minung cu a famkimterlo ih thukamnak thar in minung cu a famkimter asi tiah (Hebrew 7:19) tiah in sim. Thukamnak hlun in nunnak in pek theilo asi tiah (2Corin 3:7) ah in simih (Gal 3:11, 6:8) ahcun thukamnak tharin minung cu nunnak a pek asi tiah in zirh. (Gal 3:10) ah thukamnak hlun in minung kha siatcamnak ah a thlengter ih (Gal 3:13) ahcun thukamnak thar in siatcamnak ihsin a runsuak asi tiah in zirh bet. Thukamnak hlun ah Moses ih hmai cu Pathian ih sunlawinak thawn a khatih puante thawn an khuh tthehih a lang theilo, asinain thukamnak thar ahcun kan sunlawinak cu a lang ding asi (2Kor 3:13) ah in sim. Thukamnak hlun cu a thlam asi tiah Kolose 2:17 ah in simih thukamnak thar ahcun a ngaingai, a taktak asi tiah (Hebrew 10) ah in sim asi. Thukamnak hlun ahcun thukham cu lungpheng parah nganmi asiih thukamnak thar ahcun kanmah thinlung sungah ngan asi tiah (Jeremiah 30:33) ah in sim fiang asi. Thukamnak hlun cu (law) timi thukham asilole daan san asiih thukamnak thar cu (grace) timi zaangfahnak veel san asi. Thukamnak hlun lai ah Pathian le Israel miphun pawl kar lakah an tuahmi thukamnak cu tufa thisen thawn nemhnget asiih thukamnak thar ah Pathian le zumtu kar lakih kan tuahmi thukamnak cu Bawipa Jesuh Khrih ih thisen thawn nemhnget asi. Thukamnak hlun ih puithiam pawl cu Levi hrinsor ihsin an siih thukamnak tharih puithiam pawl cu Melkhizedek vekin Pathian ih hrilmi ansi. Thukamnak hlun ih thawinak pawl cu rai thisen luan in pekmi thawinak ansiih thukamnak thar ih thawinak pawl cu thisen luanglo in sangreu le sabihti thawn thawinak hi asi. 

            Bawi Khrih ah duhdawt zetmi nu le pa, u le nau pawl, Moses hnen ihsin Israel miphun pawl hnenah Pathian ih pekmi daan pawl, thukham le thukamnak pawl hi Bawi Jesuh in siat dingah a ra lo asi; asinain famkimter sawn dingah a ra asi. Prophet Jeremiah ih simmi vekin an thinlung sungah ka thukham ka ngan ding ati vekin Bawipa Jesuh khalin John 13:34 ah “nan hnenah thukham thar ka lo pek asi: keimah in ka lo duh vekin nannih tla pakhat le pakhat duhdawt aw uhlaw” tiah thu in pek asi. Duhdawtnak kan nei ahcun Pathian ih thupek kha automatic in a thluntu kan si ding asi. Pathian kan thei kan timi hi a thupekmi thlunnak thawn kan langter a ttul asi. A thukham asilole a thupekmi kan thlun lo ahcun ziangtinso Pathian kan duhdawt kan ti ngam? Cuvek pawl cu thuphan pernak men asi tiah Dungthluntu John nih in zirh asi. Pathian cu hmu thei asilo, a hmu theimi Pathian hmuihmel veih serhsiami milai pawl duhdawt dingah thu in pek asi. Hmu theimi kan unau pawl kan duhdawt theilo ahcun ziangtinso hmu theilomi Pathian cu kan duhdawt thei pei? Unau timi cu minung hmuahhmuah asi ta mai. 

            Duhawtnak thukham cu Bawipa Jesuh nih in pek asi. Thukamnak hlun lai ah kan ral pawl kan do, kan huatnak ah sualnak a umlo nain kan Bawipa Jesuh Khrih in “Nan ral pawl duhdawh uh, nanmah a lo huatu pawl le siat a lo camtu pawl hrangah thla cam sak uh” tiah in zirh ruangah kan ral pawl kan hua asi ahcun sualnak a um zo asi tinak asi. Cutin Bawipa Jesuh Khrih nih in zirh vekin amah in tla amah a thahtu pawl hi a ngaidam ih thla tla a cam sak hai. Kanmah in duhdawtu pawl lawng kan duhdawt sal ve asi ahcun khawvel lawki mi kan bang asi in ti bet lai asi. Duhdawtnak kan nei ahcun kan duhdawtmi ih tthatlonak hi kan tuahlo ih a duhmi pawl lawng kha kan tuah asi. Pathian kan duhdawt taktak ahcun Pathian ih duhmi lawng hi kan tuah ding asi. Cun Pathian nih in zirhmi vekin amah kan duhdawt bangin midang pawl tla kanmah le kanmah kan duhdawt aw vekin duhdawt ding kan si asi. Cun Paul in tla Rome 12:20-21 ah “Na ral a ril a rawng asile rawl pe aw; a ti a hal asile in ding tidai pe aw; cutiih na tuah asile a lu-thlung ah meiling na ret asi ding. Tthatlonak in lo neh hlah seh; tthatlonak kha tthatnak in neh sawn uh” tiah in zirh asi. “Cutiih na tuah asile a lu-thlung ah meiling na ret asi ding” timi cu tthatnak tuahtu parah tthatlonak thawn lehrulkir hi ziangtlukinso mualphoza asiih a thaw hmanah a suak ttheh ding tinak asi. Cumi cu duhdawtnak ih rah asiih ‘ral cu ral vekin can nawnlonak’ hi asi. Thukamnak thar minung kan si asi tinak asi. Himi pawl cu thukamnak hlun ah an ti theilomi pawl ansi. 

            Kan ral pawl kan duhdawt theinak dingah, an sualnak kan ngaidam theinak dingah, thla kan cam sak, thluasuah kan pe theinak dingah mizaangfah theitu Pathian in kanmah thukamnak thar milai pawl tla thluasuah in pe hram seh. Amen.