Minung kaitu (sim tu - Rev. Fr. Dominic Thawm Hlei Hnin), Zarhkel (3) nak, Year B, January 24, 2021.

Minung kaitu

Thuthangtha sim tu - Rev. Fr. Dominic Thawm Hlei Hnin

Caantluang zarhpi voi (3) nak, Year B, January 24, 2021.

Siarding: Jonah 3:1-5, 10; Ps. 24:4-6, 7-9; 1Cor 7:29-31;  Mk 1:14-20

• Tuisun kan siarmi Bible pawl hi kan zoh khawm thluh asile hmaisabik ah Nineveh pawl ih sualsirnak thu kan hmu. 1Cor sung ahcun a siatral theimi hi leilung ah ziang hman seherhnak nei lo le hramhriatnak nei lo ih um thei kan tum a tulnak kan hmu. THuthangttha ah Bawipa in a dungthlun hmaisabik pawl a kawhnak an hmu.

• Thuthangttha kan siarmi ah kan Bawipa cu a hnattuan asimi Thuthangttha simnak hram a thok. John cu kaih a ton zo hnu ah Bawipa cu Galilee lam ah a feh ih cui hmun ah thusim hram a thok.

• A hramthok ihsin cangantu Mark cun Jesuh ih hnattuan ih sullam cu a lemlei in a sim cih. Jew pawl in John cu an kaihnak thawngin Pathian thu an rak cohlanglo ti a langter cih. Curuangah Bawipa cu Galilee ram ihsin thuthangttha simnak hram a thok. Hnamdang mi pawl ih Pathian thu an rak co hlang. Mark ih ngani thuthangttha kan zoh a sile Jesuh ih hnattuannak tamsawn cu Galilee ramah a si ti kan hmu thei.

• Jerusalem cu cangvaihnak hmuahhmuah ih laifang ih ret a rak si ringring nak ihsin a thawn ih Galilee ram ah in fehpi. Galile cu Jew pawl ih khua a silo, hnamdang pawl ih khua a si sawn.

• John the Baptist cu Messiah ratnak ding hrangih rak fehtu a si ih ruangah John ih hnattuan cawlh hlan sung cu Bawipa in rundamnak thuthangttha a rak phuang lo. Hohn ih cawlh hnu lawngah thuthangttha a puang thok ding timi a langter.

• Bawipa in "caan a kim" a ti. Pathian ih thukam pawl an famkim caan a si thlang. Cui thukam paw ih famkimnak cu vancungram a si ruangah Bawipa in "vancung uknak a thleng zik" a ti.

• Caan a kim thlang ko na-in, kan mail amah timtuahnak ziang vek kan nei? Ziang tivek ih tim kan tuah a si le Pathian ih uknak ah kan thleng ngah ve ding? Bawipa cun "nan sual sir uhla thuthangttha zum uh" a ti.

• Pathian ih uknak ahcun mi hmuahhmuah hrang asi ko na-in mai duh dandan ih luhtheih le umtheih cu a si lo. Amah Pathian cu a thianghlim vekin a uknak ram ih umtu ding khal a thianhlim ve a ttul. Sualnak ih hnawihnih mi, a thianghlim lomi hrang ahcun hmunhma a um lo. Curuangah sualnak cu tansan a ttul, sual sir a ttul.

• Sualsirnak cu ziang tlu in hmual a nei timi cu tuisun hmaisabik ih kan siarmi Bible Jonah sung ah kan hmu thei. Nineveh khawpi cu Pathian in nan sual nan sir lo asilen ka lo hrem ding a rak timi a si. Cuithu cu Jonah ih simnak thawngin an rak theih tikah an khawpawh in an sual an sir. Cui sual an sirnak cu buri sin aw le vutcam phulh aw in an langter. An thinlung taktak in an sual an sir timi Pathian ih a hmuh tikah "ka lo hrem ding" a rak timi cu a ttul sal, a hrem nawnlo.

•  

• Sual sirnak kan ti tikah tong sir ih sir men a si cuanglo. Pathian ih thuthangttha theihnak thawngin amah Pathian tu kha thei in zum a ttul.

• Asinan, simtu umlo-in ziang tin an thei ding? Curuangah a simtu ding an um a ttul. Cumi hrangah Bawipa in milai a ko, "ii thlun uh, minung kaitu ka lo cangter ding" a ti.

• Bawipa Jesuh ih dung thlun timi cu Bawipa ih nun le a thunung cu a thluntu pawl ih nun ah hmuh theih dingah a si. Tiduhsan cu Jesuh ih nun ih ciahnehmi nun a ttul.

•  

• Bawipa Jesuh cu Galilee tili ih nga kaitu Simon tei unau a hmuh tikah a mah thlun dingah a ko. Malte a va fehbet tikah James teu unau cu a pa Zebedee thawn a hmuh tikah a ko lala.

• Ziang ruangah hi pawl hi a ko ti a si le amai hnattuan ttuantu dingah a si. Minung kaitu ka lo cangter ding a ti. Cui minung kaitu ti cu amah Bawipa ih hrangah minung hawltu ding an si.

• James tei unau cu a ko nan an pa Zebedee cu a ko cih ve lo. Bawipa in "kawh mi cu an tam nan hrilmi cu an mal" a ti mi kha a si ko.

• Simon tei unau siseh, James tei unau siseh Bawipa ih khawhnak an theih tikah tthuktthun awknak umlo-in an thlun cih mai. Bawipa ih kawhnak aw ah huham a tel. Curuangah Simon tei unau le James tei unau cun hmakhat te ah an pok ih an thlun cih. Khatlam ah kannih le le hnu ih ca a rawn siartu le thuthangttha a rawn theitu pawl ih hrangah zoh tthim ding an khal a si. Bawipa ih hrang ahcun taw tlai lo, nuar neilo le dunglet hoi lo ih kan thlun theinak ding ah a si. Mark ih hrang ahcun Jesuh ih dungthlun ti cu "thih tiang pumpekawk" a si.

•  

• Nga kaitu an si vekin an dinhmn zoh sehla, nga kai ih pum cawm aw ti cu hnattuan ttha pakhat a rak si. Cui hnattuan cu seherhnak nei ciamco lo-in Bawipa ii dung an thlun. Hnattuan ttha hnak in Bawipa cu an hril sawn. An innsungsang, an pa Zabedee khal tanta in an feh.

• Kannih teh, Bawipa ii dung thun dingah kan ziangkim tan in kan pe aw ngam maw? Kan duhdawt zetmi kan unau, kan nulepa pawl hnak in Bawipa cu hril sawn dingin na ngam maw? 

• Kan nun a luah khat thluhtucu zo an si, ziang an si? Kan unau sungkhat le hlawnthil pawl an si maw? Bawipa in "Keimah hnak in nulepa, ulenau pawl a duh sawn tu cu ka dung thlun dingh a tlak lo (Mt 10:37)" a ti.

• Tuisun a voihnihnak ih kan siarmi Bible (1Cor 7:29-31) khalah "kan caan hi a rein awn lo ding ruangah nupi nei pawl in nupi neilo vek in um haiseh, a ttp pawl in ttaplo vek in, a hni pawl in hnilo vek in um haiseh" a ti. Tu ih kan hmuh kan ton mi in kan caan le kan thinlung in khuhneh thluh hlahseh, Bawipa ih ratnak hrang timtuahnak in kan thiinlung le caan la sawnseh tinak a si.

•  

• Kan nun cu Jesuh ih nun ih a ciahneh theinak dingah kan nun kha timtuah a ttul ve. Tidai a khatmi bel ah tihlum kan sungbet asile cui tihlum cu a liam lak men ding. Cui bel sungih a rak um cia mi tidai cu kaang thluh ko-ih dok hmaisa le hlon hmaisa hmu lawngah cui bel ah tihlum kan re thei ding. Cuvek thotho in kan nun a luah khat thluh tu kan unau, kan hlawnthil, kan hnattuan, kan duhzawng le kan paihzawng, kan duhhamnak pawl kan hlon ih kan tan thluh lawngah kan nun ah Jesuh a tlem ding ih cuticun kan nun cu Jesuh ih nun in a ciahneh thei ding a si.

•  

• Jesuh ih hrangah minung kaitu kan si theinak dingah kan thinlung cu Bawipa ih thu le hla in khat hram sehla, kan nun cu Jesuh ih nun in khuhneh aw seh. Cuticun Jonah bangin misual pawl ih thinlung cu Bawipa ih lamah kan her ter thei ding a si.