Tul tu maw, Tul cop ha na si? Nitin Thuthangtha (Rev. Fr. Pius Kei Lian Cung ih sim mi)

Tul tu maw, tul cop ha na si?

            Bawi Khrih ah  duhdawt mi Nu le Pa le U le Nau, September 18, 2019 (Wednesday) hrangih kan siar mi (Lk 7: 31-35) sungin Pathian thuhla ruat tlang dingin ka lo sawm. A hmaisabik ah Thuthangtha siar thei, sim thei, ngai thei ding ih damcahnak le nikhua can ttha in pe tu kan biak kan Pathian a hmin thangthat si ko seh. Amen.

Tul tu maw, tul cop ha na si?

            A pakhat nak ah kan Bawipa Pathian cu hram thok tu asi ring ring. Um loin um dingah sersiam tu a si. Thimnak in tleunak tuah tu, thihnak in nunnak petu Pathian asi. Zianghman um lo in Van le Leilung le a sung le a parih um mi hmuahhmuah in sersiam. Sual thim sung le thihnak ih in khuh nen caanah Fapa Jesuh Khrih thawngin rundamnak le luatnak in pek. Thlarau thianghlim in kan hnen le kan sungah um in nunnak thar in pe fawn. Van thar le Lei thar thlen salnak ding tiangin thu in kam bet. Curuangah kan biak kan Pathian hrimhrim hi tul cop le fial cop Pathian si lo in, tul tu, hramthok tu, thar suah tu a si ring ring.

            Curuangah a fa le zumtu kannih khal hramthok tu, tha pe tu, forhfial tu kan si ve ding hi Bawipa in in zirh asi. Tui sun ih kan siar mi thuthangtha sungah minung bur hnih kan hmu. Bur khat cu mopuai hla le mithi hla sak tu pawl an si. Bur hnihnak cu laam duh lo le tap duh lo pawl an si. Tul tu le tul rero khal ih pok kam lo law law phun hnih an si. Thangphok rero tu le thangharh le bengvar tum lo law law pawl phun hnih kan um si mai. Cu pahnih karlak te ah mibur pakhat cu tul ih pok, hruai tal ih thlun, sawm tal ih tel pawl kan si. Himi mibur pathum sungah kanmah le kanmah zoh aw fel in, khui mi mibur ah ha ka tel ti hi thungai thlak ih kan ruah dingah poi mawh thupi zet in ka hmu. Pathian hnatuan nak ah hruaitu, zirhtu, thangphawktu, hramthoktu si rero hi a ol lo law law. Tikcu caan le thazaang le sumsaw tiangin tamzet pekawk thei a tul. Veihnih khat cu rualpi dang ih rem lo le simsiat hman ton rero a um theu. Asinain thazaang thar kan la cio pei uh. Kan Bawipa cu hramthoktu, tharsuahtu, sawmtu asi vekin tha poih lo ten hmai nor sin ko uhsi. Kan Bawipa in, in zirh mi le in fial mi asi. Amah in lam in hruai sin ding ih thazaang, fimnak, le tuan sin theinak huham cahnak in pe sin vivo ding asi.

          A pahnihnak mibur ih tel kan si khal le a tha ve tho tho. Mi zapi hi hruai tu le thangphawk tu si thluh ding in tla kan talent thil ti thei dan tla kan bang awk lo ding. Kan dang dang aw cio ko ding. A thupi sawn tu cu kei mah hman ih hmaithit ka ti thei lo, in hruainak le sawmnak tal ahcun ka pok ding, ka thlun ding tiin tawzaang zet in kan hlan aw pei uh. Jesuh khal in a dung thlun tu pawl a hnen ah a ko hmaisa, a zirh, cu hnu lawngah tirhthlah ah a hmang sal. Kan thlun phah le zirh phah, khawl phah in thiam le theih sin nak Bawipa in in pe ding. Hruaitu ttha si dingah dungthluntu ttha si hmaisak hi thu pi zet. Kaihhruaimi sinakah kan thiam tawk te kan ti thei tawk te hmang in Bawipa ih sunloihnak ah hmang tlang cio uhsi.

          A pathumnak mibur pawl hi cu sun caw heu le cang palcim fang fang kan si ko. Sawm rero khalih pokkam tum lo, forhfial rero khalih hnaset mitun men. Pathian thu von rel ve tein a peng hoi mai pawl kan rak um theu. A poi tak tak. Ba le kawlhra kan suanih pahnih khat te a soksawhlol a pang hel a um pang theu vek hi kan si. Suan rero khalih nem cuang lo. Von ei zik ah le hmin fawn lo. Hlon lak, hnon lak ding fang fang men, cite le meifar kan si nak cu kan kiangkap in tep ve hai seh, hmu ve hai seh. Thatnak, lungawinak, hnangamnak, remdaihnak, hlawm aw rero ding kan si. Siat caan that caan ah thei aw zet le tuar pi aw ding kan si. Mopuai hla sak nak ih lungawi thei le mithi hla sak nak ih tap thei, riahsia thei kan si ding hi Bawipa in a duh. Mai thu thu te sawh tiih lungruh hlelhlel pawl hi sosulh phawhrot hman theih lo, ziang ih tang kai lo kan rak si pang kei.

San thar minung hrekkhat cun paih le khawm ding, paih lo le khawm lo, mai thu thu fial awk, hnek awk rero a tul lo tiah ol tein kan ti men theu. Tul tu tul cop le tul rero khalih cang cuang lo kan um ti nak asi. Jesuh hi cat bang lo in kan tul, kan dam, kan nat ah siseh, kan thih kan nun ah siseh, kan fimhring le kan itthat lai ah siseh, kan sun, kan zaan, kan ziang kim ah kan tul ring ring. Tul cop, fial cop, hnek cop si nawn lo in, tultu, hruaitu, thangharttu, thazaang petu, hramthoktu si thei ding in kan zate parah Thlarau Thianghlim in a thar in thluasuah malsawm in pe hram seh. Amen.