“Kan thlarau in rundamnak a ngah tiangin zumfektu kan si” (sim tu - Rev. Fr. Joseph Ro Nei Thang)

“Kan thlarau in rundamnak a ngah tiangin zumfektu kan si” 

Thuthangtha sim tu Rev. Fr. Joseph Ro Nei Thang

January 29, 2021

Homily for Friday (Week 3)

Leitlun hmunzakip ihsin RVA Falam Chin service a rak ngai ringringtu Bawi Khrih ah duhdawt zetmi nu le pa, u le nau pawl, “kan Bawipa Jesuh Khrih ih zaangfahnak veel, Pa Pathian ih duhdawtnak le Thlarau Thianghlim ih pumkhat sinak pawl cu nan zate thawn um hram seh” tiah cibai ka run lo buk hai. Tuihni cu 2021, January thla ni 29, Tlawngkai ni 5 ni asi. Tuihni ih kan siar dingmi Bible pawl cu Hebrew 10:32-39 tiang, Ps 37:3-4, 5-6, 23-24, 39-40; Saam asawn:- Miding pawlih rundamnak cu Bawipa hnenin a ra” tiah asi. Thuthang ttha ahcun Mk 4:26-34 tiang asi pei. Tuihni ih kan ruah khawm tlang dingmi cu “Kan thlarau in rundamnak a ngah tiangin zumfektu kan si” tiah asi pei.

Tuihni kan siarmi Bible a voikhatnak Hebrew 10:32-39 hi siar sal uhsi. “Pathian ih tleunak cu nan hnenah a thlen pek ahkhan tuarnak le harsatnak a phunphun nan tong nain cuih harsatnak in a lo neh hai lo. Voikhat khat ah misenpi hmuhah hmuhsuamnak le hremnak nan tongih voi dangah cuti vekih hmuhsuamnak le hremnak a tongtu pawl nan tuarpi ve asi. Harsatnak a tongmi thawngtla pawl parah lainatnak nan nei; nan neihmi thilri hmuahhmuah an lo lon ttheh tikah nan sunnak cu lungawiin nan tuar thei, ziangahtile hi thilti hnakin a ttha deuhmi le kumkhua in a hmun dingmi kan nei hrih asi ti nan thei. Curuangah nan thinnau hlah uh, ziangahtile ral tthatnak nan nei ahcun laksawng tumpi nan ngah ding asi. Pathian ih duhnak nan tuah theinak dingah le a tiamkammi nan co theinak dingah thinfual in um uh. Ziangahtile Cathianghlim in “Caan tawite hnu ah a ra dingmi Amah cu a thleng ding, a rei lo ding. A dingmi ka miphun in an zum dingih an nung ding; Asinain dungsiptu an um ahcun an parah ka lung a awilo ding” ati. Kannih cu dungsipin a hloral tami kan silo. Kan thlarau in rundamnak a ngah tiangin zumfektu kan si” tiah asi. 

Bawi Khrih ah duhdawt zetmi u le nau pawl, kan thlarau in rundamnak a ngah theinak dingah ziangso kan tuah a ttul? A fiang zetmi cu Bawi pathum Pathian pakhat le Catholic Kohhran ih zirhmi hmuahhmuah kan zum a ttul asi. Cumi pawl kan zum lawngah Baptism sacrament kan ngah thei asi. Baptism ngahlo in rundamnak cu kan ngah theilo asi tiah Bawipa Jesuh in Nicodemus hnenah a sim fiang. Cun Baptism kan ngah hnu ah Amah Bawipa ih thi le sa kan in ttul, kan ei ttul hi asi. Zokhal Bawipa ih thi a in lo, a sa tla a ei lo ahcun nunnak a ngah theilo asi tiah Bawipa Jesuh rori in John 6:53 ah in zirh fiang. Cun Bawipa ih thi le sa hi a tlak zetin kan ei, kan in theinak dingah sualnak ihsin kan him a ttul asi. Fihnungza sualnak dinhmun thawn Bawipa ih thi le sa kan sang theilo lala asi tiah 1Korin 11:27-28 ah in zirh asi. Cun Bawipa ih thi le sa a sangtu pawlin nitin kan nunnak ah zaangfahnak hnattuan thianghlim kha ttuan ringring kan ttul lai asi. Zaangfahnak hnattuan kan ttuannak thawngin kumkhua nunnak kan co thei asi, cumi zaangfahnak hnattuan tello in vancung ram kan ngah thei hrimhrimlo asi tiah Mt 25:31-46 ah in zirh fiang asi. Cumi zaangfahnak hnattuan kan ttuannak cu netabik kan phyi dingmi thusuhnak asi. Bawipa ih thi le sa kan sangih thlarau thazaang thar thawn zaangfahnak hnattuan kan ttuan rero lai ah midang ih hmuhsuamnak, thleihdannak, sual puhnak, a caancaan ah hremnak pawl kan tong ding asi. Tuihni kan siarmi Bible ah harsatnak, hremnak le kan thilri in lon saknak pawl kan ton tikah “nan thinnau hlah uh, ziangahtile ral tthatnak nan nei ahcun laksawng tumpi nan ngah ding asi; cun in lon sakmi thilri hnakin a ttha sawn mi nan co ding asi tiah in forh. Khatin hremnak le harsatnak kan ton tikah beidong vansang in le thin tha nau zetin dungsip men ding kan si lo asi. Harsatnak le hremnak kan tuarmi cu caan tawite sung lawng asi ding tiah thu in kam bet lai asi. Curuangah Kannih cu dungsipin a hloral tami kan silo. Kan thlarau in rundamnak a ngah tiangin zumfektu kan si sawn asi” tiah Hebrew 10:39 ah in thazaang in pek asi. Ral ttha zetin harsatnak, hremnak, beidong vansanglamnak pawl kan tuar suak theinak dingah Thlarau Thianghlim ih pekmi laksawng raltthatnak kan nei asilo maw? Chrisma thapek kan ngah lai ah cumi ral tthatnak laksawng tla kan co dahmi a rak si zo asi ti kha vun mang sal uhsi, thanau hlah uhsi, dungtun men, dungsip men in thlarau ral donak cu a shung pek hlah uhsi. Kan ral Satan cu a heng zetmi kiosa vekin a huk celcel ding asi. Job ih thu kha vung mang sal uhsi. Satan in Job parah a neihmi thil pawl a hloter, amah rori in natsia a tuar, a nupi rori in Bawipa kha siatcam dingah a forh, a rualpi pawlin tla Pathian lamah ttang lo dingin an sawmnak thu pawl hi Job hrangah a harsa zetmi hniksaknak pawl ansi. Asinain cumi pawl Job in a neh tikah thluasuah tampi a co sal asi. Egypt ramih sal tlatu, Jacob ih fapa Joseph cu hniksaknak, harsatnak, thawngtlaknak, hremnak a phunphun a tuar hnu ah Pathian in a cawisangih Egypt ramih siangpahrang Pharaoh sangtu ah a cang asi. Bawipa Jesuh Khrih khalin harsatnak thawn minung tisa semnak a lakih minung dinhmun thawn harsatnak le hniksakhnak phunzakip a tuar. Kan rundamnak hrangah zonzai rethei le hremnak a phunphun le thahnak tla a tuarih misual pakhat lakah siar cih si dingin vuinak a tuar. Cutin cu a sangbikmi sunlawinak cu a co asi. Amah Bawipa Jesuh  in “Pathian ih duhmi tuah ruangah hremnak a tuartu pawl cu mithluasuak ansi; ziangahtile vancung uknak cu anmahih ta asi” tiah Mt 5:10 ah in zirh asi. Cun amah thluntu pawl tla Bawipa Jesuh in “Zokhal keimah I thlun duhtu cu amah ih duhnak tansan in amah ih thinglamtah phurin I thlun hai seh” tiah Mt 16:24 ah in zirh asi. Bawipa Jesuh in mangbangza harsatnak le thih tuahnak pawl cu thungainak thawn a tuar thei asi tiah Hebrew 5:8 ah kan hmu thei asi. Christian taktak kan can theinak dingah nitin kan nunnak ah thinglamtah cu kan phur ringring dingmi kan hmatpungttin asi. 1Peter 2:21 “Harsatnak tuar dingah Pathian ih kawhmi nan si, ziangahtile Khrih amah rori in nan hrangah a tuar zo ih a keneh nan thlun thei ve nak dingah zoh tthim dingin a lo tanta mi asi” tiah in forh asi. Paul in tla Kolose cakuat 1:24 ah Jesuh Khrih in harsatnak a hrekkhat cu a ruangpum tthen asimi a Kohhran hrangah a tanta asi. Curuangah harsatnak a tong tin tein Khrih ih tanta mi kha a famkimter asi tiah a ti asi. 

U le nau pawl, hi leitlun mithli tlaknak ramih kan um lai ah kan thlarau in rundamnak a ngah tiang zumfektu rak si ringring hram uhsi. Harsat vansang lam tampi a um dingih a netnak tiang a tuar theitu cu rundamnak a ngah ding ding Bawipa Jesuh rori in Mt 24:13 ah in tiamkam dah ta asi lo maw! Harsatnak le hniksaknak pawl a pahsuah theitu kan si theinak dingah ruahsannak, thinsaunak le thlacamnak pawl catlo in nei ringring uhsi tiah Rome 12:12 ah in forh asi.

Harsatnak sungah van thluasuah hmu thiamtu rak si hram uhsi. Tuar theinak thazaang thluasuah cu ziangtinkimtitheitu Pa le Fapa le Thiang Thlarau in in run pe hram seh.