Tihnungza in duhnungza ah (sim tu Rev. Fr. Pius Kei Lian Cung), February 1, 2021.

Tihnungza in duhnungza ah

Thuthangtha sim tu Rev. Fr. Pius Kei Lian Cung

February 1, 2021.

Siarding:  Mk 5:1-20

          Thuthangtha rak ngai theutu duhdawtmi u le nau pawl Bawikhrih hmin in cibai ka lo buk hai. Bawipai pek mi hnangam daihnak nan hnenah thleng hram seh. Feb ni 1 sunih kan siarmi Thuthangtha Mk 5:1-20 sungin “tihnungza in duhnungza ah” timi thuhla hlawmawk tlang ka duh.

          Jesuh in khawsia ih polh mipa a dam ter nak thu a si. Jesuh ih cahnak huham langfiang deuh dingin khawsia ih cah zia zoh hmai sa u si. Khawsia lak khalah suaksual le huaisen hleice deuh khawsia an um a si hi. Tuitum ih kan siarmi khawsia ih cah dan le sual daan cu rapthlak a si. An tem nak thir cikcin khal a botcat thluh men. Thlankua rop le lung kua ah bu a sam ih suntthing le zantim khal ah a au a kio. Amai taksa khal lunghriam in a at aw, a sun aw ih thihnai le liamhma thawn a khat. Khawsia pakhat ih polh hman tihnung  ti lailak ah, a hmin cu “Burpi” ti a si ih kan tam zet a ti aw bet. Zohman a kaihrem thei tu an um lo ti rori in Bible kan hmu.

          Jesuh ih cahnak huham cu Khawsia burpi hnakin a let in a tum sawn. ‘A kaihrem thei tu zohman an um lo’ ti miah Jesuh a tel lo. A kaihrem theitu minung pakhat hman an um lo, kan um lo. Sihmansehla lungawiza thuthangtha cu cupa kaihremtheitu pakhat a um, cucu Pathian Jesuh kan Bawipa a si. Hrosuang aw emem hngalhngawngzet kuasia burpi cun Jesuh an hmuh veten, a hmaiah khuk bil in “in hrem hramhram aw hlah” tiah zangfah an dil. Vok thawnghnih rual sungah luhkhuan an dil. Khawsia thawnghnih nehnak ah Jesuh in a thahrumpi suah hman tul lo lawlaw. A awkam ka khat men in a dawi tlanthluh mai. Setan tukforhnak, khuavang thilti theinak, khawsia, ramhuai, hnam le thlarau siava an zaten parah, Jesuh ih huham thawngin nehtu kan si. Jesuh ih huham cahnak hi hmufiang in rinsan u sih. Luatnak, nunnak thar, damnak le lungawinak kan co ngah ve ding a si.

          Kan thulu a si mi “Tihnungza in Duhnungza ah” timi cu khawsia polh mi pa, damnak a ngah tupa thuhla si. Khawsia a sungih an um sung cu tihnungza taktak a si.  A cahzia le a mah le a mah hliamhma a pekawk nak le, sunzan ih a aukionak pawl zoh tikah upa nauta ti lo, zapi ih tihtlak, tuksumza rori a si. Sihman sehla Jesuh nih khawsiapawl cu a dawitlan thluh tikah, milai ngai le mikel ah a hungcang ih sungkhat hnen, rualpi hnen le khawpi lakah lungawi hnangam in a tlang thei. Duhnungza a si. Cumi hnakih duhnungza a si taktak nak cu Jesuh thawi um tlang a duh. Cang 18, ah “Na hnenah ka feh ve pei” tiah Jesuh hnenah a dil. Cang 19 ah, A sinain Jesuh in a duh lo. “Na inn ah va tlungsawn awla na sungte pawl hnenah Bawipa ih a lo tuahsak mi le a lo zangfah nak thuhla pawl tla cu vasim aw” tiah a ti. Cang 20 ah, Cuticun cupa cu Dekhapolis ramsung hmuahhmuah ah  a feh ih Jesuh ih a tuah sakmi thuhla cu a sim’ tiin kan siar a si. Jesuh ih thucah thaten a ngai ih a thlun. Jesuh ih hmin sunglawi le a thawmhuham cahnak thuthangtha a karh ter vivo. Evangelist diktak a si. Duh a va nung ve. Kan hrangah a va thupi lawman so. Damnak a hmuh ruangih duhnung a sinak hnak in Jesuh thuhla hmuntin ih a phuansuah vivo mite hin duhnungza a si ter hlei ce. Jesuh ih damnak a pekmi mina tampi lakah pek manhla zet pakhat a si. Kannih cu, tihnungza si ding tiangin cun khawsia in in polh lo nan, duhnungza si ding tiangin le Jesuh ih hmin kan karhzai ter cuang fawn lo. A va poi zik em ve aw. Luatnak, damnak, cahnak kan ngah mi hi, Jesuh ih hmin thangthat in thlarau lamih dudnungza si thei cio hram u si.

          Mipi pawl hnenkhal in thu pakhat zir u sih. Khawsia polhmi pa ih damnak le vokrual pawl thih thluhnak thu pawl mipi in an theih tikah Jesuh cu an ram ih sin tlan dingah a fial tithu cang 17 ah kan hmu. Damnak Bawi, Nehtu Bawi, zangfahthiamtu Bawi, kan hnen in tlan aw, kan ramah um nawn hlah vawn ti thiam cu a va poi maksak ve. Mai khawpi mipakhat a nun ding duh sawn lo in vok thawnghnih maw thupi an ti sawn thiam. Jesuh cun vok thonghnih nunnak hnakin minung pakhat nunnak a thupit sawn. Mt 10:31 ah “suntam (vate) tampi hnakin nan man a khung sawn a si” Jesuh in in ti. Jesuh ih thupi a ti mi hi thupi ah re ve u si. Ram cangkang ah kan thleng kan ti,  hmunkip ah kan thangso rero kan ti, minung hnakih ui le zawhte le inzuat satil duh sawn tu tampi kan hmu vivo. Riahnak inn nei lo le ei ding rawl dil cawp minung an um rero laiah, Uico rawl le zawhte rawl hmuah mankhung zetzet in dawrah an zuar, an lei. Ruah rero ah hin thaw a vang thei lo na sa. Khawsia burpi neh theitu  Jesuh an ramih si an dawi tlan cu khawsia burpi in in kimvel hrih ko seh ti thawn a bang aw ko lo maw.  Mipi pawl ih a ngen dingmi awmang zet cu, “Bawipa kan hnenah in umpi ringring aw, in umpi lo cun khawsia pawl a bur in an ra sal pang ding, in tlansan hramhram hlah ti rero ding lam an si. Kan neihmi tilva maw, hlawnthil maw, hnatuan sang le thanso aungminnak, sipuayee maw, kan zoh, kan seherh tteengtteng tuk a si ah cun Jesuh cun kan nunnak, kan innsangah hmunhma a la thei lo ding. Jesuh kan hnen in dung a sip vivo pang kei. Khawsia polhnak in a dammi pa thawn hmunkhat ten kop awin, kan duh zetmi hi Jesuh ih duhdawtnak, zangfahnak, a thawm huham le sunlawinak phuansuah le tetti khan hi si thei ringring hram seh. Setan cahnak cu a kiang, a hlo dingih Jesuh ih thlarau in kan thinlung, kan thlarau, kan nunah hmunhma  a la ding a si.

          Thuthangtha a ngai tu le a sim tu, kan zate parah, Bawipa Jesuh ih cahnak huham a thar in tleng hram seh. Sualnak ruangah tihnungza le fihnungza va si ko hman u si, Jesuh in thianhlimnak le nuntharnak in pe zo. Duhnungza ah in tuah zo. Bawipa a hmin thangthat si ko seh , Amen.