Leitlun ih lemcang thiam bik Jesuh(sim tu Rev. Fr. Lucas Tha Ling Sum), February 3, 2021.

Leitlun ih lemcang thiam bik Jesuh

Thuthangtha sim tu Rev. Fr. Lucas Tha Ling Sum

February 3, 2021.

Siarding: Marka 6: 1-6:

          Zumtu u le nau, nan hnenah Pathian ih remdaihnak um hram seh! 

Tuittum ah “Leitlun ih lemcang thiambik Jesuh” timi thu tawiten ruat khawm tlang dingin ka lo sawm. 

Hmaisa ah Baibal catlang kan ngai ta hrih pei.

          Marka 6: 1-6: “Jesuh cu cutawk ihsin a feh ih a khua ah a dungtluntu pawl thawn an kir. Sabath ni ah an Sinakok sungah thu a zirh. Cu nah mi tampi an umih a thu zirh mi an theih tikah an mang a bang ngaingai. Hi hmuahhmuah hi khui in so a lak? Hi bangtuk fimnak hi khui in so a lak? Hi bangtuk fimnak hi khui in so a ngah? Ziangtin so mangbangza hi a tuah thei? Mari fapa, lettama pa, Jeim le Josef le Jadas le Simon thei u kha a si lo sawm? A farnu pawl tla, hi nah an um lai a si lo maw? An ti. Cuticun Jesuh cu zianghman ah an rel lo.

          Jesuh in an hnenah Profet cu a maih suahnak khua le a maih innsang siar lo hmun dangah cun upat a si, tiah a ti. Cutawk ah cun mina malte parah a kut a suangih a damter. Cumi siar lo mangbangza ziang hman a tuah lo. Zumnak an neih lo ruangah Jesuh cu a mang a bang ngaingai. Cule Jesuh cu kiangkap khuaah a fehih thu a zirh vivo”. 

          Zumtu u le nau, tuittum ih kan Baibal ca in Bawi Jesuh cu a suahnak khua ah thu a zirh rero nan mi tampi in a thu zirh mi a zum thei lo, a ti. A nu Mari, cun a pa cu lettama, cun a u nau pawl tla kan thei mi an si, an ti ih, “Jesuh cu zianghman ah an rel lo” a ti. Bawi Jesuh hi ziangruangah mitampi in a thu simmi an zum thei lo a si, timi kan ruah a silen a phi tampi a um thei. A thupibik mi a phi pakhat cu Bawi Jesuh hi Pathian ih Fapa a si timi, an zum thei lo ruangah a si. Cutin a silen ziangruangah Bawi Jesuh hi Pathian ih Fapa a si, timi an zum thei lo a si, timi ruah bet a ttul. 

          Leitlun ah hin kawl ttongih kan sim asilen tajuksawng thiam minta mintami hmin thang zetzet tampi an um. Tthimnak ah kan thei lar deuh mi pawl malten von rel seh la, Jackie Chan tivek cun Kyaw Hein tivek pawl. Ih, hi tivek ih hmin thang pawl cu kum tinten Academy laksawng pek an si ttheu. Mi hrekkhat tajutzawng thiam pawl tla cu academy laksawng pahnih pathum tla a ngah an um. Asinan, leitlun ah hin tayuksawng thiam bik zo a si pei? Veikhat hman academy laksawng a ngah dah lonan leitlun ih tayuksawng thiambik mi cu Bawi Jesuh a si. ziang ruangah? 

          Zumtu u le nau, Bawi Jesuh hi tayuksawng a thiam tuk ih ruangah Pathian ih fapa ka si, a ti rero nan, mi tampi in an zum lo; a thu sim mi khal an cohlang thei lo, cun mangbangza a tuah mi pawl khal ziang hman ah an rel lo. An mah vek mi menmen pakhat ah an ruat. Curuangah thinglamta par ih thah nak a tuar a si. Asinan, Bawi Jesuh a vong thih taktak ih khua thim an tlun ciamco le biakinn ih zaar mi puanzaar tlek ih tthen hnih ih an tthen awk pawl an hmuh tikah, aw, Pathian fapa kan thah sual a si lo sawm, an ti ih mipi pawl cu ninghang le riahsia in an ttang cuum ih inn ah an tlung a si, tiah Baibal in in sim.

          Bawi Jesuh hi leitlun ih tayuksawng thiam bik a si ruangah ralring ten um ciau uh ih. Ziang vek pungsan in kan hnen ah a ra ding timi kan thei lo. Mathai bung 25 sungih kan hmuh bangin Bawi Jesuh cu kan hnen ah mikhual vek in, lolen mi rilrawng vek in, a si lolen thawng tla vek in, lolen hnipuan nei lo mi farah zet vek in, cun a silolen mi naa vek in, a phunphun in a ra thei. Ralring tei kan um lo asiah cun Bawi Jesuh cu Pathian in fapa a si, ti thei lo ih, thinglamtah ih a that tu pawl thawn kan bang aw pang ding. Curuangah nitin ih kan nunnak ah a phunphun ih kan hnen ih a ra ttheu tu Jesuh cohlang thei dingin ralring ten um ringring uh si.

          Zumtu u le nau, Pathian in nan zaten thlawsuah lo pe in lo umpi camciin hram seh. Amen.