"Keng Hlah" (sim tu Rev. Fr. Dominic Thawm Hlei Hnin), February 4, 2021.

"Keng Hlah"

Thuthangtha sim tu Rev. Fr. Dominic Thawm Hlei Hnin

Caantluang zarh linak, tlawngkai nili ni (February 4, 2021)

Siarding: Heb 12:18-19, 21-24; Ps. 48:2-4, 9-11; Mk 6:7-13

• Kan Bawipa Jesuh cu amai tthanliannak khua le ram, Nazareth mipi pawl in an rak co hlang lo tikah hmun dang ah feh in thuthangttha phuan a tum. Cumi ah a hmai ih rak feh dingin a dungthluntu pawl cu a kop kop, pahnih pahnih in a thlah hmai sa nak thu tuisun kan siarmi thuthangttha ah kan hmu.

• Cathianghlim ngantu Mark ih cangandaan kan zoh tikah amah Bawipa rori in minung pawl a ko (Mk 1:16-20) ih, cui a kawh mi pawl lak ihsin a dungthluntu ding pawl a hril (Mk 3:13-19). Cui a hrilmi pawl cu a hruai, a zirh vekin, an mithmuh ah khuavang a dawi, mina a damter, hnattha tampi a ttuan. Bawipa ih hnattuan daan le cangvaihdaan a theihpitu pawl cu tu-ah khuavang pawl dawisuak theinak huham a pe ih hmai ah a rak thlah.

• Amah Bawipa Jesuh ih hnattuan kha, tu ahcun a dungthluntu pawl ih ttuan dingah a fial ih a thlah. Bawipa ih hnattuan sawng tu ding an si.

• Cutiih a hmai ah rak feh dingi a thlah caan ah thiri an ken ding le kenlo ding tiangin a sim. An hruk dingmi hnipuan, an ken dingmi thilri, an caam nak ding hmunram le hnon an si caan ih an tuah dingmi pawl tiangin a khih hmuh cia thluh.

• Bawipa in a hmai ih rak feh cia ii lamzin rak sial cia ding in tirh a thlahnak thu cu thuthangtttha ngantu midang khal in an rak ngan ve. Mt. 10:10 le Lk 10:4 ahcun Bawipa in a thlahmi pawl cu ziang khal ken a awn lo, kianghrol le kedam khal ken a awih lo. Asinan Mk. 6:7-9 ahcun kianghrol le kedam ken theih in kan hmu. Cui hleiah cangantu Mark cun Samaritan khua le ramdang khua ih luh khal a kham lo.

• Hitivek ih an dan awk nak cu ziang dang ciamco siloin Palestine ram sung le ramleng thu ruangah, a hmun le ram ih zir in cangvaihdaan a bang aw lo ruangah a si. Mark ih ngandaan ahcun Bawipa cu Jew miphun silo, hnamdangmi pawl hnen in thuthangttha sim hram a thok.

•  

• Bawipa in "keng hlah uh" a timi pawl kan zoh hnik pei.

• "Rawl keng hlah uh" a ti. Milai kan nunnak ah rawl hi a thupi zet. Kan nunnak bik a si kan ti thei. Kan len le farah khal cu ei le in in kan zoh aw ttheu. "Ei ding an nei nawnlo" ticun farah pit tawp a si thlang. Cun, mai Innpi kan suahsan cun kan him nawn lo, kan bu a hlum nawn lo. Khui ah ka ei ka in ding ti ruah a ttul, thlen-inn hawl a ttul. Lamzin khalah kan ttamsawl thei. Bawipa in "rawl keng hlah uh" a ti tikah cui ttihnungza le harsatnak pawl a theilo asilo.

• Kan ei kan in ding hrangih khua in khan saktu Bawipa a si thu, minung thawngnga rawl a donak (Mk 6:34-44) le minung thawngli rawl adonak (Mk 8:1-9) ah fiang te in kan hmu.

• Van ih a zuangmi vate hman rawl hngei lo-in a cawmtu Pathian kan nei ti thei in Pathian parih kan rinsannak re le tthum dingah a duh.

•  

• "Sumpai keng hlah uh" a ti. Tu lai ah, lam hla lamnai ti umlo, khual kan tlawn tikah kan ttulsamnak pawl hrangah "poibawh" ti in sumpai kan keng ttheu. Cui poibawh cu "Bawipa" siseh. Kan ttulsam caan ih taw tlai dahlo Pathian kan nei timi thei ringring uhsi.

• "Zal, vaidip, pai hlah uh" a ti. Kan ttulsammi thilri pawl kan retnak dip a si. Thil phun kim kan la ih kan san thei. Himi zal cu "Duhhamnak" zal a si. Curuangah "Duhhamnak thinlung cu tanta aw" tinak a si. Nangmai hnattuan si lo-in Bawipa ih thuthangttha phuang dingih thlahmi na sinak kha theih hngilh aw hlah. Pathian ih hna na ttuan mi kha nangmai bulpak hrangih pursum leilawnnak ah hmang pang aw hlah.

•  

• "Hnipuan a hlei keng hlah" a ti. Kan ningzahnak le kan siatnak pawl in huptu cu hni le puan an si. Pathian thu le hla hi zahpi ding a um lo; a hleifuan tiangih thuamawk ciamco khal a ttul lo. Dingfelnak le thuthangttha cu kan ralthuam a si. Bawipa cu in hup phengtu a si.

•  

• "Nan thleninn thawn hlah uh" ti ah Bawipa in a ti. Mikhual dinhmun ih a va thlengtu ih hrang le innteek hrangah a si.

• Milai cu nunnuam kan duh cio. Khua khat kan va thlen tikah hmaisabik ih kan hawl le kan hmuhmi thleninn hnak ih hmunhma ttha deuh le tlanlen nuam deuh thleninn, mithmai ttha deuh inn tek cu neta ah kan hmusal men thei. Cuvekih "rem can deuhnak hmun" ih kan thawn a sile "maihrang cangai khorh" ah kan cang ding. Cutikah kan rianmi Pathian cu midang ih rak hmuhnak ah, "nun nuamnak hawltu Pathian" ah kan cangter ding. Thleidannak neilo Pathian, farah harsa pawl ih beunak Pathian cu belmang culh ah kan cang ding.

• Cun, khat lamah, thleninn kan thawnnak ruangah kan thleninn hmaisa pa cu "nautat le hmuh suam, ziang ih siarlo" ah kan cang thei. Cuticun kan tumtahmi le kan thlen suahmi cu a dang dang ah an cang ding.

•  

• "Khua le ram ih tluninn an rak pe lo, an rak cohlanglo a si le nan ke parih a kop mi leivut khal thingthla thluh uh" ti ah a cah. Ziangah tile thutahangttha an phurhmi thawngin sualsir dingih kawhnak le sawmnak cu khuami pawl ih an rak cohlanglo le an rak el ruangah an parih a thleng lai dingmi Pathian ih thin hengnak ih tetti a si.

•  

• Ziang tivek dinhmun, khuitawk khua le ram thleng khal sehla, Pathian par lawngih hngataw ding in Bawipa cun in duhsak a si.

•  

• Bawipa in, "feh aw" ti ih a lo thlah hnuhnu cun, "dung her lo in, seherhnak um loin, le bulpak hrang ruahsannak um loin" Pathian parah hngat aw in feh aw. Cuti-ih na feh a si le na phurhmi thuthangttha ruangah mi tampi in thlarau damnak an ngah ding.