Zangfahnak (Thuthang tha sim tu - Rev. Fr. Peter Lal Zin), February 6, 2021.

 “Zangfahnak”

Thuthangtha sim tu Rev. Fr. Peter Lal Zin Thang

February 6, 2021

Siarding: Hebru 13:15-17, 20-21; Saam 23, le Marka 6:30-34.

           “Jesuh cu lawng sung ihsin a suah tikah miburpi cu a hmu ih a thinlung cu anmah zangfahnak in a khat, ziangahtile khaaltu nei lo tuurual bangtuk an si. Curuangah thu tampi a zirh hai.” 

          Thuthangṭha a ngaitu duhdawtmi nu le pa, u le nau pawl, kan Bawipa Jesuh Khrih ih zangfahnak, Pa Pathian ih duhdawtnak le Thiang Thlarau ih pawlkomnak cu nan hnenah um hram seh. Tuni February 6, 2021 (Zarhte ni) ih kan siar dingmi Bible thawn pehpar in ‘zangfahnak’ thu kan ruat tlang dingih thlarau thazang kan lak tlang dingin ka lo sawm duh. Tulai hi Covid 19 ruangah harsatnak a phunphun tong in ka um rero lai fangah kan ram Myanmar ah ram uknak thawn pehpar in buainak khal a um rero lai fang a si ih thinhar in kan um cio men ding ti’n ka zum. Kan ram ah daihnak, remnak le kan ram a ṭhat sal thei nak dingin thla kan cam cio vek in cam rero hrih ko u si tiah ka lo sawm ka lo forh duh bet a si. 

          Hi buainak le harsatnak pawl hi ziangruangah a cang kan ti asile a thuhla tampi a um ko ding. Culak sung ihsin tuni ih kan ruat tlang dingmi thuthangṭha thawn pehpar in kan zoh ding asile cu zangfahnak timi te a um lonak ruangah a si. Buainak a suah pi tu pawl in midang parah zangfahnak an nei lo, zawnruahnak an nei lo ih mah nuamnak ding, mah duhmi thuah ding, mah hrang lawng ruat tivek hi a tlangpi in kan hmuh thei mi pakhat a si kan tile a sual lo ding. Tuni kan siarmi Bible sungah mi zangfahnak, mi zawnruahnak, mi hrangih thil ṭha tuahnak tivek pawl kan hmu thei. Kan siar ding mi Bible pawl cu veikhat siarnak ah Hebru 13:15-17, 20-21, Saam kan siar dingmi cu ‘Bawipa cu ka tuukhal a si; sammi zianghman ka nei lo timi Saam 23, le Gospel cu Marka 6:30-34 tiang pawl an si.

          Gospel kan siarmi sungah Bawi Jesuh in mipi parah zangfahnak a nei ih thu tampi a zirhnak thu kan hmu. Veikhatah Bawi Jesuh ih a thlahmi a dungthluntu pawl cu an hna ṭuannak in an kir ih an Bawipa an Sayapa a si mi Bawi Jesuh hnenah an tuahmi hmuahhmuah le an zirhmi hmuahhmuah an va sim. Cun an hnen ah mipi in pan in lut suak, sukso an tam tuk ruangah rawl ei caan khal an nei thim lo ti a si. Cutik ah Bawi Jesuh in kan mah te lawng dai te ih kan cawl thei nak ding hmun ah kan feh pei a ti ih lawng in an feh tlang. Asinan mi pi in an hmu an thei tikah an ke bak in an tlan ih Bawi Jesuh le a dungthluntu pawl an feh nak ding hmun an thleng hlan ah mipi pawl cu an rak thleng hmai sa. Cu tluk rori in mipi in thuthangṭha thei ding le an hrang ih thlacam sak ding an rak duh. Bawi Jesuh in lawng sungin a suak ih cuti rori in mipi ih zuamnak, mipi in an pannak kha a hmu tikah a thinlung cu anmah zangfahnak in a khat. Khaaltu nei lo mi tuurual bangin a hmu ih a zangfah tuk hai. Dai ten um in cawl dingah cu tawk hmun an feh cu asinan cuih a zangfahnak thinlung ruangah cawl lo in thu tampi a zirh hai timi kan hmu asi.

          Zangfahnak thinlung in hna tampi a ṭuan thei a si. Zangfahnak thinlung in tuah theinak thazang khal in pek thei a si. Zangfahnak in duhdawtnak lam khal ah in hruai thei a si. Zangfahnak in remnak khal a suak ter thei a si. Duhdawtnak a neitu in zangfahnak khal a nei. Zangfahnak a nei lo tu cu duhdawtnak khal a nei lo tu a si. Pathian cu duhdawtnak a siih zangfah lainatnak thawn a khat tu khal a si. Kan Pathian cu zangfah lainatnak nei tu Pathian a si vek in kan nih a mah a zumtu pawl khal in zangfahnak neitu kan si ve ding cu a ṭul tengteng mi asi. Zangfahnak kan ti tikah a famkim mi zangfahnak si cu a ṭul ding. Kaa lawng in zangfah um in timen vek si lo in ziang si ka tuah sak thei ding, ziangtin ka bawm thei ding ti ruatin tuahnak thawn mi par ih zangfahnak neitu kan si ding a ṭul asi. Jeim cakuat bung 2 nak sungih kan hmu mi vek in hnipuan a tlasamnmi le ei-bar ding a nei lomi kha ‘Pathian in lo thluasuah hram seh, hlum tein um uhla rawl ṭha tein ei uh’ vun ti ih ziang hman kan pek lo a si le cu ziangso a ṭhathnem. Ṭhathnemnak a nei lo a si a ti. Bawm thei na cing in zianghman tuah lo in zangfah um in kan ti men mi cu mizangfah nei cazin ah a tel lo ding asi. 

          Mi pakhatkhat par ah zangfahnak kan nei taktak a si le cu a hrangah ziang kan tuah thei pei timi kan ruah nak ah a lut cih ṭheu a si. Bawi Jesuh cu mipi parah zangfahnak a nei ruangah cawl dingin a tumtah mi hman cawl lo in thu tampi a zirh hai, an nat nak a dam ter hai. Cun tuni kan siar mi Gospel ih a tang lam kan siar bet a si le mipi in a mah an thlun a thuthangṭha simmi an ngai ih an ril a rawng tikah a dungthluntu pawl in cu mipi pawl hi tlung ter in an mah te cio rawl an hawl ter dingin ruahnak an nei. A sinan Bawi Jesuh in a dungthluntu pawl hnen ah ‘nanmah in an ei ding cu pek uh,’ tiah a ti hai. Hi tawkah ka simduhmi cu Bawi Jesuh ih zangfahnak cu let-twih a ciah zet mi zangfahnak, tuahnak a tel mi zangfahnak, a famkimmi zangfahnak a si timi kha ka sim duh mi a si.

          Mt 5:7 ah Bawi Jesuh in ‘mi zangfah thiamtu pawl cu mi thluasuak an si; ziangahtile Pathian in anmah a zangfah ve ding,’ a ti. Bawipa in zangfahnak neitu a si vekin kan nih khal pakhat le pakhat parah zangfahnak nei tu kan si ve ding in a duh asi. A mah hnenah zangfah dil in thla a cam tu pawl parah Pathian in zangfahnak a nei a si. Kan ram diahnak kan ram ṭhatnak ding hrangah zangfahnak nei tu Pathian hnen ah thlacam in dil cio uh si la kan mah khal zangfahnak neitu si in kan umnak cio ah remnak daihnak a tuah thei tu kan si cio thei nak dingin zuam cio u si. Pathian in kan zate parhah siseh, kan Myanmar ramah siseh daihnak thleng ter hram seh. 

Fr. Peter Lal Zin Thang (Hakha Diocese)