Hnatuan ringring Pathian (sim tu - Rev. Fr. Pius Kei Lian Cung), February 8, 2021.

Hnatuan ringring Pathian

Thuthangtha sim tu - Rev. Fr. Pius Kei Lian Cung 

February 8, 2021.

Siarding: Seem 1:1-9; Saam 104; Mk 6:53-56.

          Duhdawtmi u le nau pawl, Bawipa ih pekmi damnak le lungawinak cu nan parah thleng hram seh. 2021, Feb ni 8 ih Bible kan siar dingmi pawl cu Seem 1:1-9, Saam 104, Mk 6:53-56 tla an si. Siarnak pa 3 sungah Pathian ih pehzom rero ih a hnatuan nak pawl kan hmu.  Curuangah kan thulu ding khal ah “Hnatuan ringring Pathian” ti ka hril. Seem 1:1-9 sungah Pathian ih leile van sersiamnak thu le a tuahmi pawl parah a tha a tinak thu pawl kan hmu. Cang 2nak ah: “Lei cu pianhmang nei lo thlahawmpi lawng a rak si. Thimnak in ti thukpi cu a khuh ih, Pathianih thlarau cu tipi parah a leng” tiin kan siar. Cui pianhmang neilo, thlahawmpi le thimnak cu Pathian ih tongkamnung nih a dai, a tongngah tikah duhnungza tleunak le a mawizetmi lei le van ah a cang a si. Pathiantongkam thawi tonawk cu mawinak, thatnak, thlengawknak a si. Leidip ih sersiam a si mi kan taksa khal hi Pathian ih tongkam nung nih in dai lo, in tong lo a si ah cun pianzia nei lo thlahawm men le thimnak ih khuh mi men fang kan si. Pathian ih Tongkamnung a si mi Jesuh thawn kan tongaw aw, kan kop awk tikah kan nunak cu a mawimi le dunhnung za ah a cang. Kan nun hi mi ih umnak tha ah cang thei hram seh. Pathian ih sersiammi kan leilungpi hi zoh le zilthlithiang le in ding tidai siseh, ei in ding rawl phun zakip le umnak hmunhma siseh a lak in in pe rero. Mitha tilo misual thlei dang loin in phur, in cawi, in cawm. Kan umnak kan tlanlen nak le hna kan tuannak a si. Leilung hnenah kan lungawituk tiah ka khat te hman kan ti dah lo nan kan suahin kan thih tiang phunzai lo in in cawm, in kil a si. Pathian ih tongkam Jesuh krih thawi sersiam tharmi zumtu cun leilungpi ih nun hi cawng u si. Kan nunnak le kan sinak hi mi hmuahhmuah hrangah hlan u si, siang u si. Thimnak ih a khuhmi tipi thukpi parah Pathian ih thlarau cu a leng. Pathian thlarau ih umpinak cu mihmuahhmuah ih co a si. Asinan Pathian ih tongkam a simi Jesuh thawngih sersiam tharmi cun tilipi lawng siloin finglethlang le leiram tha sinsin, mawisinsin nak kan co ngah. Zumlo tu pawl lakah siseh, zumtu krifa lak khal ah siseh, misual le mitha kan rawl aw celcel ko, kan bangaw cio ko lo maw, tiah mihrek khat cun kan ti men thei. Minung ruahnak in cu kan dang aw tuk lem lo vek a bang nain, thlarau mit thawi kan zoh a siah cun a dang aw zet. Lei le van sersiam hlan le sersiam hnu tluk in a dang aw aw. Leilung sersiam nak ah hin, leidip a sive mi kan ruangpum sersiam tharnak hi a thar in hmu u si, thei u si, lungawi in mawinak thatnak tampi parter u si.   

          Saam 104 cu a thulu ah “Semsuahtu Pathian thangthatnak” ti a si. Leiparih minung, tilva le vate pawl kilkhawitu, cawmtu Pathian a si thu le, tiva, thingkung pawl le tikcucan remruat tu Bawi a si thu pawl kan hmu. Cang 24 ah “Maw Bawipa na tuahmi hi an tam ngaingai; fimnak thawn na tuah theh hai, lei lung cu na tuahmi thil nung in an khat a si” tiin kan siar. Kan Bawipa Pathian hin a semsuah mi ziangtinkim hi nitin, zantin in kilkhawi ih a tharsuah ringring ti hi thei le zum in lungawi in thangthat u si. Bawipa hi a hnatuan a cawlmen lo. A dai thlan lo. Ziangkim semsuah tu Pathian cun ziangkim a cemnet tiang a tuamhlawm ding, a kilhim ding, a tuanbet rero lai ding. Cang 29 ah cun “An thaw na lak sak tikah cun an thi ih an seemnak leilung ah an kirsal. Asinan thaw na pek tikah cun an nung; leilung nunnak thar na pek a si” a ti. Thihnak a neta lo ih nunnak a ne tasawn. Leilung nunnak thar pe rerotu Bawipa cun leilung thawi tuahmi minung khal nunnak thar in pe bet rero cat bang lo in. Kum reizet nai hlun thiam lo, thar sin rero thei cu leilungpi le minung kan si.

          Mk 6:53-56 sungah “Jesuh ih khawtin khual a tlawnnak le mina pawl damnak a pek thu pawl kan hmu.  Jesuh ih damnak a pek tinten, a ruangpum damnak, an thinlung hnangamnak le an thlarau thlarau thianhlimnak tiin damnak phun 3 a pe theu. Taksa, thinlung le thlarau ah lamdannak le tharsuahnak an nei, an co.  Kan Bawipa Jesuh hi hna a tuan nasa ti a lang zet. Cang 56 ah ‘Jesuh cu a fehnak pohpoh ah, khawte ah siseh, khawpi ah siseh, lolak khalah siseh, dawrhmun khal ah sieh, mina pawl cu a hnenah an rak thlen pi’ tithu kan hmu. Minung pawl parah damnak, lungawinak ah a thar in nun thlengawknak a pek vivo ih, kan umnak leilungpi khal thasin mawi sin dingin Bawipa in a thleng vivo lai ding a si. Curuangah Bawi paih in sersiam thar reronak hi theiaw in kan nih khal leilungpi le minung nunnak thasin, mawisin dingin Bawipa thawn tuan u si. Leilungpi a thangso sin ko, minungkhal kan mawi sin vivo ko. Lungawiza zet a si. Asinan sualnak lam le biaknak daithlannak lam khalah leitlun huap in kan thangso vivo. Nuncan ziaza that lonak, thudik thup tahratih thuphan lalternak, Aanaa le hriamnam rinsan ih minekrawknak pawl hi a tam vivo. Huat awk nak le thinhengnak le rem awklonak khal leitlun huapin hmunhma a la vivo. Jesuh ih remtthat mi si tum lo ih kan duhnak men ih leitlun mawiter tum mai hi tih a va nung ve.Thilri pakhatkhat kan remhthat duh cun kan phoih thluhta theu. Siahbal thluhta a tul hmaisa. Harnak kan tonmi ziangkim khal hi, Bawipa ih in kholhfainak ah cohlang thiam in Bawipai in remhnak, le nuntharnak in pekmi ah amah rinsan in hnangam u si. A thasin ding mi le a mawisin dingmi hi Bawipa thawngin ruahsan cio u si.

          Bawipa ih remh thei lo ding tiang in kan leilungpi hi a siatbal lo, Bawipa ih remhtthat thei lo tiangih misual khal kan um lo. Leilungpi le a parih um mi ziang tinkim tharsuah ih hnatuan ringring tu Bawipa a hmin thangthat si ko seh, Amen.