Tangdornak ih covo (sim tu - Rev. Fr. Dominic Thawm Hlei Hnin), February 11, 2021.

Tangdornak ih covo

Thuthangtha sim tu - Rev. Fr. Dominic Thawm Hlei Hnin

Caantluang zarh nganak, tlawngkai nili ni, February 11, 2021.

Siarding: Gen 2:18-25; Ps. 128:1-2, 3, 4-5; Mk 7:24-30

• Tuisun kan siarmi Bible hmaisabik, Semtirnak sung ahcun sersiamnak thu kan hmu. Himi sersiamnak thuanthu hi Gen 1:1- 2:4 sungih kan hmuh mi sersiamnak thaw cun malte an dang aw deuh. Gen 1:1-2:4 sungih sersiamnak thuanthu ahcun timtuahcia vekin a sangsang te ih rel a si nan, tui kan hmuhmi sersiamnak thuanthu ah cun a sangsang te in a si lo.

• Tuisun kan sairmi ih sersiamnak thuanthu ah milai le rannung cu an hramthoknak a bangaw ti'n - leilung in a si thu - kan hmu. Asinan, milai in rannung cu hmin a sak ih cuticun rannung parah milai ih thuneihnak cu a lang. Culawng si loin Pathian khal cun rannung pawl thawn biakawknak umloin milai thaw lawng in an be aw. Cucu milai ih sunlawinak a si.

• Pathian in rannung pawl ih hrangah "bawmtu" ttul in a ruat lo, milai hrang lawngah a ttul in a hmu. Curuangah milai cu a itthatter ih cui sungah a hnakruh ihsin nunau cu a rak sersiam ti in "nunau cu sersiam a si thu" kan hmu. 

• Pathian cun milai cu itthatter lo khalin nunau a sersiam thei ko. Asinan, khai sersiamnak kha "thuthuk" ih a um ding a duh ruangah cui sersiamnak cu milai ih theihpiding a duhlo, milai hmuh ih sersiam ding cu a duh lo. Curuangah milai cu a itthat ter.

• Nunau sersiamnak thu ah kan Bible ih reldan vek ahcun "mipa amah lawng um ding cu a tthatlo ruangah" a ti. Cui catlang cu kan zoh men asile nunau le mipa cu ruallepi men, social men, ti in hmuh theih a si. Asinan, Gen 2:24, kan zoh a si ahcun tthitumnak thu a khih hmuh. "Ka ruh sungih ruh, ka taksa sungih taksa" a ti, thikhat sakhat sinak, pumkhat sinak a khih hmuh.

• Himi thu ah thil pakhat kan theih ding le kan ruahcih ding ih a ttul mi cu "cangantu in BC thawngkhat lai ih ruahdaan vek in a ngan" ti hi a si. Cumi san lai ah "nunau pakhat ih dinhmun" cu a pasal bawm ding hi a si.

• Bible hlun sung ah "bawmtu"" ti cu "sawmdawltu le thanzang petu" timi a khih hmuh. Deut 33:7; Ps 33:20, le 70:5 lam ahcun Pathian cu "bawmtu" in kan hmu. Bawmtu dinhmun ah Pathian le nunau hi hmunkhat ah a ret tlang. Kan Bible in nunau cu "bawmtu" ih a rel tikah nunau ih "sinak" a rel duhmi siloin "kutcih tthitumnak ah nunnau ih dinhmun timi - dignity - kha a rel duhmi a si. Apasal sawmdawltu le a pasal ih thazang laknak a si.

•  

• Thuthangttha kan siarmi ah, Bawipa Jesuh in phunhnam dang mina a damternak thu kan hmu. Himi thu ih thupi cu "mina a damter" timi a bang nan, a ngaingai ahcun "Jesuh le ramdangmi nunau an biak aw" timi a si. Hi thu cu Gentile pawl ih umnak Tyre ram ih thil thleng a si.

• Hinu ih sinak kan zoh a sile, mirang Bible ahcun "a Greek, a syrophoenician woman" a ti. Curuangah hinu cu zumnak lamah Greek pawl ih zumnak a pom ve ruangah Jew pawl ih zumnak a zum ve lo ti a fiang. Cun hrinhnam lamah Syrophoenician a si ih Jew a si lo. Curuangah zumnak ah siseh, taksa ah siseh ramdangmi liolio a si.

•  

• Asinan, an khua le an ramah Bawipa Jesuh a ra thleng ti a theih tikah ruahsannak tumpi thawn a va pan. Bawipa Jesuh hnen ih a ra thlen tikah hinu cu "Jesu ih kehram ah a bok." Ti duhsan cu "hinu in tangdornak thawn dilnak a nei" ti a si. Amai hrangah siloin a fanu ih hrangah "harhdamnak" a dil.

• Bawipa Jesuh in Jew miphun silo, miphun dang a simi Syro-phoenician nu ih thlacamnak cu a co hlang ti kan hmu. Asinan ol-ai te men ih cohlan si lo in dawnkhamtu tampi pahbal hnu lawngah cohlan a si ti kan hmu.

•  

• Hmaisabik ih dawnkhamtu cu "miphun dang sinak" a si. Kan thei ttheu vek in Jew miphun cu Pathian ih hrilmi miphun an si ih Runtupa Messiah thawn pehtlaihnak neimi miphun an si. Anmah le anmah khal an thei awk ruangah Pathian thawi pehtlaihnak neilo miphun dang thawn an peh tlaih ve lo. Cumi lai-ah Jew miphun a si mi Jesuh ih hnenah hnamdaangmi Syro-phoenician nu cu a ra ih bawmnak a ra dil. miphun dang sinak hruang cu a pah a si.

• A pahnihnak ah nunau a si. Hlan lai ih an pehtlaih awknak lam kan zoh a si le nunau le mipa hi thleidan awknak a tam zet. Curuangah zalen zet ih biakawk a rak theih lo. Jew miphun asimi Bawipa Jesuh in miphundang nunau a biak ti cu mipi hmai ah thil mawilozet a rak si. Cukhalcu a pah tlang thotho.

•  

• Bawipa in, "Rawl cu faale pawl kan pek hmaisa pei. Faale pawl ih rawl cu uico pek cu a diklo a si" a ti. Bawipa ih ttongkam kan zoh tikah nunaunu cu "uico" thawn a rak tahtthim.

• Thutthentu 1:7 sung kan zoh a si le Adonibezek siangpahrang cu an kaih tikah a kut zungpi le ke zungpi an tan sak. Cumi thawn pehpar ih Adonibezek in "An kut zungpi le ke zungpi tan tthehmi siangpahrang sawm sarih in ka cabuai hnuai ii rawl ttilfuan an rak sar ttheu" a ti. Nautatnak awkam, ti siar thu langtertu aw kam a si.

• Bawipa ih rak hmanmi cui nautatnak le hmuhsuamnak awkam cu poi sa duhlo in nunaunu in "uico khal in ttilfuan cu an ei ngah ve" a ti. A tumtahmi le a duhmi, a fanu ih damnak" a ngah theinak dingah, hmuhsuam le zohtaihnak khal tuarin, thin tha naulo te-in a um. Kan cawn ding a si. Cui nunaunu ih zumnak le taimaknak cu Bawipa Jesuh in a hmuh tikah a rak cohlansak.

• Bawipa Jesuh ih lam ihsin kan zoh asile daan a pahbal ve. "nauhak pawl ih covo kha uico pek lo ding" a ti ko nan, tu ahcun a pe. Tthatnak tuah dingah a si.

• Paul in Rome pawl hnen ih ca a kuatnak ah "Rundamnak thuthangttha cu a hmaisa ah Judah miphun hrangah a si ih Gentile mi hrang khalah a si ve (Rm 1"16)" a ti. Rundamnak covo thawn pehparmi karbak a si.

• Bawipa ih ttongkam ah "Jew siarlo a dang miphun cu Bawipa ih rundamnak huham cotlak an si lo" timi a lang. Hmanseh, nunaunu ih ttongkam ah "Pathian ih rundamnak khawkhan ah miphun dang khal in covo an neih thei dan" a lang ve.

• Nunaunu ih ttongkam ah Bawipa ih ttongmi a el lo, 'Rundamnak cu Jew pawl hnen ihsin a ra" ti a thei. Cumi cu tangdorzet in a co hlang hnu ah "a ttil fuan te tal" ti ah a beisei. Cumi ruangah a fanu ih damnak a ngah.

•  

• Na hrang a silo tiih na ruahmi hman tangdornak le thin feknak thawi na dil a si ahcun na dilnak cu Pathian in a co hlang dingih a lo pe ding.