Minung Thawngli Rawl Darnak (sim tu Rev. Fr. Peter Zin), February 13, 2021.

Minung Thawngli Rawl Darnak

Thuthangtha sim tu Rev. Fr. Peter Zin

February 13, 2021, Zarhte ni.

Siarding: Marka 8:1-10

          Thuthangṭha a ngaitu duhdawtmi nu le pa, u le nau pawl, ṭihnungza ral phun zakip lak sungin hnangamnak a pe thei tu kan Bawipa Jesuh Khrih in nan zate hnen ah hnangam daihnak lo pe cio hia hram seh. Kan rampi hrang ih kan thlacamnak pawl khal Pathian in in ngai sak in a rei hlan ah kan ram ah daihnak um hram seh. 

           Bawi Jesuh in mipi rawl vei hnih a dar hai tiin Bible sungah kan hmu thei ih vei khatnak a darnak ah minung thawngnga lai an si ih veihninnak ah cu minung thawngli hrawng an si. Bawi Jesuh in minung thawngnga rawl a darnak hi Gospel a pali ten sungah kan hmu thei ih minung thawngli rawl a darnak cu Matthai le Marka sungah kan hmu thei. Tuni ih kan siarding mi Gospel cu Marka 8:1-10 tiang a si ih Bawi Jesuh in sanghlom pasarih le nga fate malte lai thawn minung thawngli rawl a darnak thu a si.

          Bawi Jesuh simmi thu ngai duh ruangah mipi in Bawi Jesuh an thlun ih a hnen ah an um nak nithum a si thlang tik ah ei ding rawl khal an nei nawn lo. Cutikah Bawi Jesuh in ‘himi pawl hi nithum sung ka hnenah an um zo ih atu ah ei ding zianghman an nei nawn lo; ka zaang an fak zet a si. Rawl zianghman ei lo ih ka tlunter a si ahcun mi hrekkhat cu lam hlapi feh ding an si ruangah lamzin ah an ṭamsawl ding,’ tiah a dungthluntu pawl hnen ah a sim. A dungthluntu pawl cun, ‘Hivek ramṭhing ahhin zo in so milai hi zat hrangah rawl cu a hawl thei ding?’ tiah a cang thei lo ding vek in an rak sawn. Cutikah Bawi Jesuh in a sut mi cu, ‘sanghlom ziangzatso nan neih?’ ti a si. A dungthluntu pawl khal in ‘hlom sarih’ kan nei an ti. Bawi Jesuh in misenpi cu lei parah a to ter hia hnuah cuih sanghlom pa sarih cu a lak ih Pathian hnenah lungawi thu a sim hnuah a phel ih mipi zem dingah a dungthluntu pawl a rak pek; a dungthluntu pawl khal in misenpi hnen ah an rak zem. Nga fatete khal malte lai an nei ih cumi khal cu Bawi Jesuh in hmaisa vek  thotho in Pathain hnen ah lungawithu a sim ih a dungthluntu pawl hnen ah a zem ter lala. Hi sanghlom le nga malte cu an zem rero nan a cem thei lo ih minung thawngli lai in khop zet in an ei hnu ah a hlei mi tete an khawm ih bawm sarih a rak kim ti a si. Bawipa ih thil ti thei nak a mak tuk a si.

          A tu ih kan thei mi Bawi Jesuh in sanghlom sarih le nga malte hmangin minung thawngli lai kha khop zet in rawl a dar nak thu zoh in ka sim duh mi cu a pakhatnak ah zarh hmai sa ih ka simmi Bawi Jesuh ih zaangfahnak thu a si. Bawi Jesuh in mipi pawl rawl ei ding hman ruat lo in a dung an thlun, a thu sim an ngai mi a hmu tik ah a zaangfah tuk hai. Zarh hmaisa ih ka sim mi vek in Bawi Jesuh ih zaangfahnak cu bawmnak a tel mi zaangfahnak a si. Thinlung le kaa lawng ih zaangfahnak si lo in tuahnak, bawmnak a tel mi zaangfahnak a si ih hihi kan nih ih kan cawng ding in inzirhmi khal a si. Ziangruangah Bawi Jesuh in mipi cu a zaangfah hai ti sile rawl ei ding an nei lo ruangah a si. Rawl ei ding an nei lo ruangah a zaangfah hai ih an ṭul mi rawl a pek hai. Nain khua ih nuhmei nu a fapa neih sun te a thi ih riahsia in a um tikah Bawi Jesuh in a zaangfah tuk ih a fapa a nung ter sal. Midam lo pawl a hmu tikah a zaangfah hai ih a dam ter hai. Bawi Jesuh in mi a zaangfah tikah an ṭul mi a tuah sak ṭheu a si. Bawi Jesuh vek in cu ziangtinkim kan tuah thei lo nan kan nih khal in mi kan zaangfah tikah kan ti thei tawk in an ṭul mi tuah sak ve ding kan si. Cu lawngah kan zaangfahnak hi a famkim mi zaangfahnak a si ding a si.

          Cun a pahnihnak ih kan sim rel duh mi cu himi Bawi Jesuh in rawl a darnak hi mipi in an dil ruangah a si lo. A mah Bawi Jesuh in rawl an ṭul ti a hmu ih a mah lungduhnak tein a pek mi, a tuah sak mi a si. Mipi in rawl an dil lo; a mah hnen in minung hi hmuah rawl khop kan ngah thei ding ti kha an ruahnak in khal a baan lo. Asinan mipi ih an tuah mi thil ṭha a rak um. Cumicu ziang a si ti sile, thuthangṭha ngai dingin a dung an rak thlun, a hnen ah an um. Khakha thil hman, thil dik an rak tuah ngah mi kha a si. Bawi Jesuh in Matthai 6:33 ah ‘Pathian Uknak le a felnak hawl hmaisa sawn uhla thil dang hmuahhmuah cu a lo pebet ding asi,’ a ti vek in Pathian Uknak thuthangṭha hawl in a dung a rak thluntu pawl ih ṭulsammi leitlun rawl khal cu hngilh lo tein a pek hai a si. 

          Cun a pathumnak ih lo ruahpi ding le thazaang kan lak tlang dingah ka duh mi cu: Bawi Jesuh in mipi rawl dar nak ding ah a dil hmaisa mi cu, ‘sanghlom ziangzatso nan neih,’ ti hi asi. Minung thawngli lai an si ih sanghlom cuzat cuzat a ṭul ding tivek in a ti lo, ‘ziangzat nan nei’ ti’n lawng a sut. Pathian in in bawm ding ah asilole thluasuah in pek dingah kan mah hnen in cuzat na tuah tengteng ṭul, cuzat na nei tengteng ṭul tivek in in dil lo. Kan hnen in a duh mi asilole in dil mi cu, ‘zaing zat na nei, ziangzat na tuah thei?’ ti hi a si. Pathian in kan nei lo mi, kan tuah thei lo mi in dil dah lo. Pathian in Abraham hnen ah a fapa raithawinak pek ding a dil hlan ah fapa pakhat a rak pek hmai a si. Cun an nei cia mi sanghlom pa sarih le nga malte tel lo in a duh a si ah cun Bawipa in phun dang in rawl a do hai thei a si. Asinan an nei mi a dil hmai sa, an ti thei tawk tel ve kha a duh. Nang le kei khal in ziang hman tuah lo in, kan mah tel ve lo in Pathian in thluasuah in pek thei, in bawm thei. Asinan kan mah lam in malte lai kan tel kan tuah ve ding cu a duh ih in dil hmaisa a si. Kan mah lam in kan ti thei tawk kan tuah ding ih cu lo cu a mah in in tuah sak ding asi, a tam sawn in bet sak ding asi.

          Tuni Gospel kan siarmi Bawi Jesuh in minung thawngli rawl a darnak thu zo in thlarau thazaang kan lak ding ah a chiat pathum ka sim mi a tawinak in kan zoh ding asi le pakhatnak ah Bawi Jesuh in mi a zaangfah tikah a bawm ṭheu vekin kan nih khal mi parih zaangfahnak kan nei mi kha kan ti thei tawk in bawmnak thawn lang ter a ṭul a si. Pahninnak ah Pathian Uknak kan hawl hmaisa a si le cu leitlun hrangih kan ṭulsam mi khal kan ṭul vek in Pathian in in pek ding a si. Pathumnak ah Pathian in thluasuah in pek ding tikah kan mah lam in kan tuah thei tawk in kan tuah ve ding ah a duh a si. Kan zate parah Pathian in thlarau thazaang in pek cio hram seh.

Fr. Peter Lal Zin Thang (Hakha Diocese)