Pope Francis in Iraq ih Bishop, Siangbawi, Sister pawl hnen a sim mi thuthangtah March 5, 2021

Pope Francis in Iraq ih Bishop, Siangbawi, Sister pawl hnen a sim mi thuthangtah

March 5, 2021

            Duhdawt zet mi Bishop pawl, Siangbawi pawl, thukam pathum a la tu pawl, pa pakhat ih duhdawt nak thawn nan zaten ka lo pom. Pathian hnen khal ka lungawi. Ziangruangahtile Pathian ih lam hruai nak in kanmah pawl pum khawm nak caan in pe. Cutivekin Iraq Bishop Ignace Youssif Younan le Cardinal Louis Sako pawl hnen khal ah ka lung a awi. A tu kanmah pawl cu rundam tu ih nu buaih a la tu Cathedral biakinn ah kan tong aw khawm. Himi hmun ah kan zaten kanmai rundam tu hnen kan ret mi zum nak cu thi thawn lang ter in nunnak a pe tu kan u nau pawl ih thi thawn khuh kan si.

            Anmah pawl cu Pathian le kawhhran par ih an neih mi ralthat nak thawn a khat mi zum nak kha von mang salin Pathian hnen ih neih mi kan zate ih zum nak, thinglamta ih thilti thei nak le kawhhran par ih a neih mi zum nak khal nung ter sa uh si. Himi thu cu kanmah pawl ngaidam nak, khat le khat rem awk nak thluasuah a nung ter sal. Khristian pawl cu Bawi Jesuh ih duhdawt nak cui khui tawk hmun, tik cu ri khiah um loin lang ter dignah kawh kan si. Himi Gospel thuthangtha cu himi duhdawt zet mi ram ah than ding ah le nung ter dingah a si.

            Bishop pawl, Siangbawi pawl, Sister pawl, Pathian hnatuan pawl, kawhhran upa pawl si nak in nan zaten Khristu ih rintlak si nak lungawinak, harsat tuar nak, ruahsan nak le harsat ank pawl hlawm aw in tuar tlang ding a si. Pathian miphun ih tul mi le Pathain hnatuan nak ah niitn nan ton mi pawl cu a tui covid nat suan awk nak caan ah a luar sinsin. Himi dinhmun pawl cu a hlan ih a um mi a hram a simi phur nak a um mi dungthlun tu thinlung kha mal ter lo ding. Ziangruangahtile himi thu cu a hlan ihsin a thok ih himi leiram ah siat loin a um. Pope in a cawl zo tu Pope Benedict 16 ih thuthangtha sim mi cu beidong nak virus nat hrik suan dingah a ol tuk thu, veikhat veihnih ah kan kiangkap khal ah zamrang zet in a darh tin khal ruah a si. A sinan Pathian cu kan hnen ah himi a tha lo zet mi virus nat hrik do thei dingah do kham nak sii in pe zo. Himi dokham nak sii cu thlacam nak thawn kanmah pawlih dungthlun tu hnatuan nak ah rintlak si nak in a suak mi ruahsan nak a si.

            Himi donkham nak sii thawn kanmah pawl cu thazang thar pawl thawn hmailam ah lungawiza Gospel thuthangtha a than tu dungthluntu tha pawl tin khal siseh, Pathian ih rampi thianfai nak, thuhman le remdaih nak ah a um mi kan co ding. Kan kiangkap ih minung pawl cui thuthangtah cu ka thei ter duh. Bawi Jesuh cu Gospel thuthangtha ih lungawi nak ah nunnak thleng awk ank lamzin a si tiin a sim. Hi leiram ih hlanlai Khrstian thuanthu zoh asile Bawi Jesuh par ih an neih mi zum nak cu a nung. Cui zum nak cu midang hnen khal a darh. Leilungpi khal a thleng awk ter. Dungthluntu pawlih nunram cu ziangtin an nung ding timi cu mithianghlim pawl ih nunnak in a lang ter. Dungthluntu pawl ih nun ram cu "a hman le sual" thleidan thiam nak lawng asilo.

            Himi hnak in thluasuah a si. Nunram thar in, a thuk zet mi lungawi nak thawn aiawh a theih ding. Himi lungawi nak cu nunnuam nak dinhmun lawng ah a si lo. A har mi do nak ton caan khal ah tuah thei ding tiin " Evangelii Gaudium, 167 ah fiang zet in a um. Harsat nak cu Iraq mip pawl ih nitin nunram ih thenkhat a si. A liam zo mi kum zabi 10 ah Bishop pawl, Siangbawi pawl, Sister pawl, Pathian hnatuan pawl le nanmah mipi pawl cu ral buai nak, hmuhsuam nak, nat ol nak, a tui tuar rero mi sumdawn nak buai nak, mi pakhat cio ih him nak, himi him nak a um lo ruangah ram sung hman ah vai ih um nak, ram tin ih vai ih um pawl cu ram mipi pawl, cui ram mipi pawl ah Khristian pawl khal an tel nak hriam hma pawl an phur. Cuvek dinhmun ah nanmah pawl cu an tuu pawl thawn then aw lo thlauthla loin kiangnai teih kil khawi nak, tha pek nak, an tul mi pawl theih tawk in bawm phah in anmah pawl khal mi dang hrang thil tha tuah ve thei dingah thu nan tuah sak ruangah Bishop pawl, Siangbawi pawl, Sister pawl, Pathian hnatuan pawl nan hnen ah ka lung awi.

            Nanamah pawl kawhhran ih fim nak le zangfah nak hnatuan pawl cu Diocese hrangah siseh, cu hnak aiih tam kiangkap hrangah siseh a hrampi a kaih thu a hmuh. Tha nau loin pehbet in tha tho zet in tuah dingah, cutilawngah Iraq ih Catholic mipi pawl minung an mal nan Mt 13:31-32 ih a um mi an tam ci tahthim nak vek a si ding. A ci a fate nan a kung a kho tikah kiangkap ah a tampi bom nak a pe thei. Khrish duhdawt nak cu mah le mah thupi ih ret nak, mi engtai duh nak thinlung pawl hlon dingah, cuihnu ah leilung pumpi thawn pehpar mi kiangkap, khat le khat ulenau vekin upat in kilkhawi tu ding pawlkom din dingah a sawm. Iraq ih kawhhran a phunphun cu hlanlai thuanthu, daan, thlarau lam ro thil pawl a um. Himi cu pher pakhat thawn a bang aw ih, pher pakhat si dingah a zawng phunkim rawi in an tah. Pher ih tahthim nak cu uanu thinlung nan lang ter vekin a hrampi khal a lang ter. Pathian cu a hrampi a din tu a si. Ral ring ten thinsau zet in a tuah. Amai fale pawl khat le khat nel aw zet in um ter a duh.

            Antiok khuapi ih St.Ignatius ih zirh nak asimi "nanmah a lo thek darh tu zohman nan lak ah um ter hlah uh. Duhdawt nak le lungawi nak ah a bang aw mi thlacam nak, hmun khat ten um dingah pakhat lawngah ruahsan uh"  tiin a forhfial. Ulenau thinlung, hi leilungah nung in tha dingah ziang tluk in a thupi. Ziangahtile himi thinlung cu tuletu siatsuah a tuar. Diocese, Parish, biak nak lam pawlkom pawlih hnatuan tlang nak cu a lak a si lo. Iraq ramih hmailam hrang ah Diocese ih ruahsannak le tuah zo mi a si vekin "zaten lungrual dingah" timi Bawi Jesuh ih netabik rawl ei puai ah a thlacam nak cu famkim nak ah a cang. (Jn 17: 21.37)

            Tuu khal pawl, kawhhran mipi pawl, Bishop pawl, Siangbawi pawl, Sister pawl, Pathian hnatuan pawl Diocese ih hna pawl hmual nei in tuah dingah a danglam mi lamzin pawl thawn an karh zai. Cutivekih tuah laiah theih thiam lo awk nak, thil tha lo pawl khal ton a si. Himi dinhmun cu ulenau thinlung ah hmuh theih mi hmuh thei lo mi daan pawl a si. Himi daan apwl cu thinlung sung lawng ah ret ding. Kan zaten sual nei tu kan si. Kan famkim lo. Himi daan pawl cu thluasuah nak thawn siseh, a tum mi duhdawt nak thawn siseh, ngaidam nak timi thil ti thei nak a nei mi sii tha thawn siseh, ulenau thinlung thawn siseh, khat le khat ih tul mi cu thinsau nak thawn sup ding. Galati 6:2 cuihnu ah zingzoi nak pawl, harsat nak pawl ton nak caan pawl ah khat le khat thazang pek aw ding.

            Hitawk hmun ah Bishop pawl hnen ih a hleice ka cah ding mi  cu "nai ten umnak" thawn pehpar in kan tuu khal hnatuan nak ruah ka duh. Kan thlacam nak ah Pathian thawn khal siseh, Pathian ih in pek mi tuu pawl thawn siseh, kan hnatuan pi Siangbawi pawl thawn khal siseh nai ten um ding. Ahleice in nan Siangbawi pawl thawn naiten um uh. Nan Siangbawi pawl cu nanmah pawl tuanvo nei tu, manager vekin tuah ter hlah uh. Nanmah pawl cu an pa taktak nan si thu, an thuhla a thupi ih nan ret thu, thinlung tha te thawn tha nan pek thu hmuh ter uh. Thlacam nak thawn an hnen ah um uh. An hnatuan mi pawl theih sak nak, ruah nak pek nak pawl thawn zum nak thang ter uh. Cutivekin nannih cu tuu khal tha nan si. Bawi Jesuh kha nan Siangbawi pawl hmuh nak ding caan nan pek a si. Ziangruangahtile Bawi Jesuh cu a tu pawl a thei. A tuu pawl hrangah a nun nak a pe. Jn 10:14-15

            Duhdawt mi Siangbawi pawl, mipa, nunau, Pathian hnatuan pawl, Pathian thuthangtyha sim tu pawl, hmailam ah Pathian hnatuan dingah a timtuah rero tu Siangbawi tlawngkai rero tu Brother pawl nan thinlung sungah Pathian ih aw a ngai tu nauhak Samuel vekin nannih khal nan thei Cuihnu ah "ka man" tiin a sawn. ISamuel 3:4 ih a sawn nak cu ni tin zoh sal in a thar in um dingah a forhfial. Hitivekin a sawm nak cu nan hnen ah thuthangtha zemdarh nak ah zuam nak, ralthat nak, nunnak ah in hoha seh. Ziangruangahtile kansim dingah in pek vekin tuanvo khal kan nei. Pathian hna kan tuan nak nunram cu uk mi tiin kan ti nan zun sung lawnglawng ah to in um ding a ti duhmi a silo. Veng, khua pawl ih tuu pawl um nak ah feh in anmah thawn tong aw idngah kanmah kan um nak in an thazang a um ding. Ahleicein hngilh tuar nak, nauhak pawl, upa pawl, mi naa pawl, mi harsa pawl ruah sak ding. Kan kiang ih a um  tu pawl hnen pek awk nak in nan tuan asile nan zangfah nak, nunnem nak, duhdawt nak neih nak asi ruangah kanmah pawl cu Bawi Jesuh ih rian kan tuan nak cu Mt 25:40 ah fiang zet in a sim.

            Bawm a tul tu pawl hrang rian tuan nak in Bawi Jesuh hrang rian tuannak a si timi ruah tikah thin hna a ngam ding. Curuangah ziangtik caan khalah Pathian ih mi phun pawl hrang rian tuan dignah dungsip dign a silo. Cui Pathian miphun sungah nannih khal nan tel. Nan nu le nan pi pawl mang uh. An pek awk nak thawn pehpar in St. Paul in "na hnen ah zum ank ah ka cawm" tiin a lawm. ITimote 1:5 tuu khal tha si uh. Pathain miphun ih rian tuan tu hta si uh. Sumpai ngah in hnatuantu pawl vek si hlah uh. Kanmah pawl cu Pathian miphun thawn kan pehpar awk thu ruat uh. mah thawn sai lo vekin um hlah uh. Caan tha hleice a ngah tu tinkhal ruat aw hlah uh. Himi a sunglawi mi pehpar awk ank thawn hlat aw hlah uh. Ziangruangahtile kan zaten Pathian ih a thianghlim mi mi phun kan si.

            A liam zo mi kum 10 hrawngah thil tha lo tuah nak ruangah himi biakinnn pi ah nun nak a cem tu kan unau pawl vun ruat sal uh. Anmah pawl mithianghlim ih khaisang thei dingah tuah a si zo. An thih nak cu ral buai nak, huat nak thawn tuah nak, thi luang tiang thil a can nak cu a hman mi ziangvek biak nak in hman a zirh lo. "Fratelli Tutti, 285) biak nak miphun tleidang lo in ruah nak luar pawl ih thah nak ah nunnak a cem tu apwl zaten khal man a tul. Ur ah himi ram sung ih a um mi biak nak lam hotu pawl thawn an tong aw. Hitivek ih ton awk nak cu Biak nak cu Pathian ih fa le pawl karlak ah remdaih nak le lungrual nak tuah ding a si thu than dingah a si. Nannih pawl cu nanmah khat le khat karlak ah siseh, zum nak a bang lo mi pawl karlak ah siseh, rem nak a din tu pawl, lungnem nak, zum nak a bang lo nan um tlang nak thlaici nan tuh ruangah nan par ah ka lung a awi. Himi dinhmun cu mi tinkim hrang ah ruahsan nak a nung ter sal thei ding. Himi hmun ah mino pawl a hleice ah ret in a ruat sak.

            Hmun tinkim ih mino pawl cu thanso nak, ruahsan nak ih hminsiannak a si. Ahleice in Iraq ram hangah a si. Himi leiram ah thuanthu a ummi ro thil pawl lawng a um lo. Ruah ban a si lomi a tleu mi hmailam khal nan nei. Cumi thil cu "mino" pawl an si. Mino pawl cu nanmah pawl ih lungmankhung an si. Anmah pawl kilkhawi dingah, an tumtah mi nung ringring dingah cawm dingah, anmah pawl thawn feh tlang dingah, an ruahsan nak ah thazang pe dingah an lo tul. An nauhak nan harsat nak kum reipi an tuar ruangah thin sau nak an tul. Kum upa pawl thawn hmunkhat in himi ram ih tongmankhung vkein a thleng thei thu, rah a rah mi thingkung tha an cang thei timi mang ding. Cutivekin cang dingah kan kilkhawi nak par ah a bun aw. Thaten thang thei dingah an tul mi dinhmun pawl zuam zet in tuah dingah a tul.

            Ulenau pawl, an Baptism san nak le Khristmas thapek nak saramentu pawl thawn, cuti thawn Siangbawi pawl ih Siangbawi sinak thawn, Sister pawl cu anmah pawl ih kumkhua thukam nak an lak nak thawn nan nunram cu Pathian hnen an ap. Cuihnu ah himi leiram, himi tidai ah a tul nak hmun ah feh dingah thirhthlah pawl ih that nak lak in nanmah pawl cu cui thuanthu ih thenkhat nan si. Curuangah rintlak zet in tuan dingah, tuah zo mi thukam nak siat bal lo dingah le hmailam a thar in din uh. Nan lang ter mi pawl cu hmuh ton mi sawm nak pawl ruangah a hnget zo.

            Mi ral tha pawl ih thi thawn a khat zo. Curuangah iraq ram hrangah ni tleu a suah ding lawng siloin Iraq ram ih ramri tiang tleu in, Bawipa ih that nak le himi miphun hnen kanmah pawl in ramdam tu Pathian ah lungawi dingin in tuah zo a si. Lk 1:46-47 Petbet in kanmah pawl in atuvekin hmunkhat ih kan ton awk thei ruangah ka lung a awi. Rundamtu ih Bawinu le dungthlun tu St.Thomas pawl in thla lo cam sak hram seh. Lo kil him hram seh. Nanmah le nan tuu pawl khal lung diriam zet in dungthlun tu ka ap. Ka hrang khal ah thla in cam sak dingah zangfah ka lo dil. Ka lung awi. Himi thuthang cu Rome Reports thuthang ihsin kan ngah mi a si.

Photo courtesy of: The Tablet

http://bit.ly/38g2CDS