Nitin Thuthangtha (Rev. Fr. David Kap Cin Mang ih sim mi)

XXV Sunday of Ordinary Time (Year C)

Bible Vei (1) Siarnak

Amos 8: 4 – 7

⁴Ngaihnik uh, nannih mi tlasam a palcihtu le ramsung mi rethei zonzai siatsuah a tumtu pawl!

⁵Nan thinlungte cun, “Zarh ni a sau tuk, kan hngak thei lo; kan rawl zuar kan duh thlang. Ziangtikah so Sabbath ni a cem ding ih thil kan zuar thei sal ding? Kan thil man cu a hlei in kan ngen ding ih thil tahnak le khing thlainak pawl cu kan thil leitu pawl bumnak ah a dik lo in kan tuah ding.

⁶A sia bik sangvut hman cu man tamzet ah kan zuar ding. Leiba nei ih kedam tuak khat man hman a pe thei lotu mi farah kan hawl ding ih sal zuat dingah kan lei ding,” tiah nan ti.

⁷ Bawipa Israel ih Pathian in siatcam thukam in, “Sualnak an tuahmi cu ka hngilh dah lo ding.

Saam Hla Bu

Saam 113: 1-2, 4-8.

¹ Bawipa thangṭhat uh! Maw Bawipa ih siahhlawh pawl, a hmin cu thangṭhat uh.

² Bawipa ih hmin cu atu le kumkhua in thangṭhat si seh.

⁴ Bawipa in miphun hmuahhmuah a uk; A sunlawinak cu van hnakin a saang sawn.

⁵ Bawipa kan Pathian bangtu zohman an um lo; Amah bangtuk ih a saang bikah um tahratin,

⁶Lei le van pawl suk zoh ih a run zoh theitu zoso a um ding?

⁷Mi farah pawl cu leivut lak ihsin a khaisaang ih, Mi tlasam pawl cu an harsatnak ihsin a cawi hai;

⁸Annih cu uktu pawl le bawi pawl ih hawipi ah a tuah hai a si.

Bible Vei (2) Siarnak

1 Tim 2: 1-8.

¹A hmaisa bikih ka lo fial duhmi cu mi hmuahhmuah hrangah Pathian hnenah thlacam uh, dil uh, midang ai-ah thlacam uhla lungawi thu sim uh, ti a si.

²Daite le hnangamte ih kan um theinak dingah le Pathian ṭihzahnak thawn ziaza ṭha ih kan nun theinak dingah siangpahrang le ramsung hotu upa pawl hrangah thla cam uhla Pathian hnenah dil uh.

³Cutiin nan tuah le a ṭha; cule mi hmuahhmuah thutak thei haisehla, rundammi si haiseh ti a duhtu,

⁴in Rundamtu Pathian a lung a awi ding.

⁵Ziangah tile Pathian pakhat lawng a um ih minung le Pathian karlakah remnak tuahtu minung palai pakhat a um.

⁶Cuih palai cu mi hmuahhmuah tlen dingah a nunnak a petu Khrih Jesuh a si. Cutiin a nunnak a pekmi cu Pathian in a tikcu a kim tikah mi hmuahhmuah rundamsuak a duh, ti langternak a si.

⁷Curuangah a si zumnak thu le thudik phuangtu dingah Zentail mi hnenah tirhthlah le zirhtu-ah in thlah. Thuphan ka sim lo, thudik ka sim a si!

⁸Pathian biaknak hmun kipah mipa in thla cam haiseh ti ka duh. Pathian hnenah a pum a pe awmi thinhengnak le thu-el awknak um lotein mipa in an kut thli rin thla cam haiseh.

Gospel Cathianghlim Siarnak

Lk 16: 1-13.

Thil Kilkhawitu Mi Hrokhrawl

¹Jesuh in a dungthluntu pawl hnenah, “Voikhat ah milianzet pakhat a um ih a thilri kilkhawitu dingah siahhlawh pakhat a nei. Cuih a siahhlawh pa cun na tangka a thehvorh a si, tiah a bawipa cu an sim.

²Cuhrangah a hnenah a ko ih ‘Na thu ka theihmi hi ziangtinso a si? Ka thilri na kilnak cazin kimtein i pe aw; ziangah tile ka thilri kilkhawitu na si thei nawn lo ding,’ tiah a ti.

³Cutikah a siahhlawh pa cun ‘Ka bawipa in ka hnaṭuan ihsin i dawi tum a si hi! Ziang so ka tuah pei? Leilung lai ding le ka ti thei lo; mi thil dil ih um ding le ka ning a zak fawn.

⁴Asinain thil pakhat tuah ding ka thei! Ka hnaṭuan a cem tikah an innih i umter siangtu rualpi ṭha ka neih a ṭul ding,’ tiah a thinlung in a ruat.

⁵Cuhrangah a bawipa hnenih leiba a neitu hmuahhmuah a ko khawm. Pakhatnak pa cu ‘Ziangzat so ka bawipa na baak?’ tiah a sut.

⁶Anih in ‘Olif hriak pung zakhat,’ tiah a let. Thilri kilkhawitu pa cun ‘Hihi na cazin a si ding: to awla pung sawmnga, tiah ngan aw,’ tiah a ti.

⁷Cule a dang pakhat pa cu, ‘Nangteh ziangzatso na baak?’ tiah a sut. Anih in, ‘sangvut dip thawngkhat,’ tiah a let. Thilri kilkhawitu pa cun, ‘Hihi na cazin a si ding: dip zariat, tiah ngan aw,’ tiah a ti.

⁸Hi mihrokhrawl thilri kilkhawitu pa hi cubangtuk in fimvar zetih thil ti a thiam ruangah a bawipa in a porhzet, ziangah tile hi leilungtlun mi pawl hi anmah ih thu tawlrelnak ahcun tleunak sungih a ummi pawl hnakin an fimvar sawn a si,” tiah a ti.

⁹Cule Jesuh in, “Cuti a si ruangah hiti in ka lo sim: leilung tlunih sumsaw hmangin rualpi tuah uh, ziangah tile leilung thilri a cem tikah kumkhua a hmunmi inn ah luhter nan si ding.

¹⁰Thil fate ih rintlak a si mi cu thil tumpi khalah rintlak a si ding; thil fate thu-ah zumtlak lo a si mi cu thil tumpi thu khalah zumtlak lo a si ding.

¹¹Leilung thilri nan tawlrelnak hmanah rintlak lo nan si ahcun ziangtinso lennak taktak cu nan hnenah pek nan si thei ding?

¹²Cule midang thilri par hmanah rinsantlak nan si lo ahcun nanmah ih co dingmi ngaingai cu zo in so a lo pek duh ding?

¹³Mi pakhat cu bawi pahnih ih sal a si thei lo. Pakhat a hua ding ih pakhat kha a duh ding; pakhat hnenah rinsantlak in a nung ding ih pakhat tu cu a nautat ding. Pathian le sumsaw cu nan rian tlang thei lo,” tiah a ti.