Nitin Thuthangtha (Rev. Fr. Pius Kei Lian Cung ih sim mi)

Wednesday of week 25 of the Year

Bible Vei (1) siarnak

Ezra 9: 5-9.

⁵Zanlam thawinak pek tikcu a kim tikah ninghangih ka tonak ihsin ka tho ih, ka hnipuan tlekpi thawn baan phar le khukbil in Bawipa ka Pathian hnenah cun thla ka cam.

⁶“Maw Pathian, ka ning a zak tuk ih na hmai ka zoh ngam lo. Kan sualnak hi kan lu hnakin a sang sawn ih van a hun dai.

⁷Kan pupa ih san in atu tiang kannih na minung pawl hi kan sual ngaingai. Cutiih kan sual ruangah kanmah le kan siangpahrang pawl le kan puithiam pawl tiangin ramdang siangpahrang pawlih kutsung kan thleng. An duhduh in in that, kan thilri in long, thawng ah in thlak ih tuihsun tiangin ningzak hmaisia in in tuah.

⁸Atu-ah tikcu tawite sung, Bawipa kan Pathian, nangmah in in zaangfah ih mi hrekkhat pawl cu nungdam in in luatter ih hi hmun thianghlim ahhin himdam in kan um. Saltaannak ihsin in runsuak ih nunnak thar in pe.

⁹Sal kan si nain saltaannak ah in taanta lo. Persia siangpahrang pawl cu kan parah an mithmai na ṭhatter ih Judah le Jerusalem ah himdamte ih um sal dingah le a siat thluh zomi na Biakinn sak sal dingah in thlah.

Saam hla

Tobit 13:2, 4, 6-8.

Gospel Cathianghlim siarnak

Luke 9: 1-6.

Dungthluntu Hleihnih A Thlah

(Mat. 10.5-15; Mar 6.7-13)

¹Jesuh in a dungthluntu hleihnih pawl cu hmun khatah a ko ih khawsia dawi theinak le natnak a phunphun damter theinak huham a pek hai.

²Cule Pathian Uknak thu sim ding le mina damter dingah a thlah hai.

³An hnenah, “Khual nan tlawn tikah zianghman keng hlah uh: kianghrol siseh, zaal siseh, rawl siseh, paisa siseh, angki hlei khal keng hlah uh.

⁴Nan tlun-inn ah hmun dang nan feh sal hlan lo va caam uh.

⁵An lo khirnak khua cu tlansan uhla anmah ralrin peknak ah nan ke ih leidip kha thingta uh,” tiah a ti.

⁶Dungthluntu pawl cu an feh ih khawte an tlawng vivo; Thuthang ṭha an sim ih khuazakip ah mina an damter vivo.