Jesuh Zoh in Thazaang Laknak (sim tu Rev. Fr. Peter Zin), March 28, 2021, Palm Sunday

Jesuh Zoh in Thazaang Laknak
Thuthangtha sim tu Rev. Fr. Peter Zin
March 28, 2021, Palm Sunday
“Jesuh Zoh in Thazaang Laknak”

Thuthangṭha a ngaitu Bawi Khrih ah duhdawtmi nu le pa, u le nau pawl, Bawipa in lo um pi ringring hram seh la a lo humhim hia hram seh. Tuni cu Palm Sunday, kan lai ṭongin ṭhulhfau hna puai tiah kan ko ṭheu mi Zarh pi ni a si ih tuni ah Bawipa ih Jerulalem khuapi ah a lut lai ah mipi in an hmuak ih an thangṭhatnak mangsalnak kan tuah ih, cumi peh in Bawi Jesuh ih zonzaih retheih a tuarnak mangsalnak khal kan nei ṭheu. Tuni ih kan khawmnak khal cu ṭhen hnih in ṭhen ih a hmai sa sawn ah Bawi Jesuh Jerusalem khuapi ah a lut ih mipi in an lawm nak thu Gospel kan siar. Tun kum Palm Sunday hrang ih kan siar dingmi Gospel cu Marka 11:1-10 tiang a si. Cutawk ah Bawi Jesuh a hmuak tu mipi in “Hosana! Bawipa hmin in a rami cu Pathian in thluasuah hram seh! Kan pu David Siangpahrang uknak a ra dingmi cu Pathian in thluasuah ko seh! Hosanna! A sang bik van ah khin Pathian cu thangṭhat si ko seh,” tiah an au ciamco tikha kan hmu. Cumi vek in kan nih khal ṭhulhfau hnan kai in Hosanna tiah Bawipa sunlawipeknak kan tuah ve ṭheu.

Cumi ṭheh in Missa rai thawinak kan peh ih Missa rai thawinak sungih kan siar dingmi Bible pawl cu Bawipa ih zonzaih retheih a tuarnak le athihnak thu pawl kan siar. Veikhat siarnak ah Isiah 50:4-7, Saam 22 a sawnnak ah, ‘Ka Pathian, Ka Pathian, ziangahso i tlan san,’ ti a si ih himi ṭongfang hi Bawi Jesuh in thinglamtah parah harsa zet in a tuar rero lai ih a hmang mi ṭongkam pakhat khal a si. Veihnih siarnak ah Filipi 2:6-11 tiang a si ih hitawk ah Bawi Jesuh ih tangdornak thinlung fiang zet in kan hmu thei. Jesuh Khrih hi Pathian sinak a nei ringring tu a si nan minung sinak a lak, minung hmanah hnenum sinak a lak ih thinglamtah parih thihnak tiangin a tuarnak le cumiruang ah a sangbik ah khaisannak a ngah nak thu pawl a si. Gospel kan siar dingmi cu a sau zet, Marka 14 le 15 a zaten a si ih Bawi Jesuh zonzaih rethei a tuar ih a thihnak thu pawl a si.

Tuni ih kan siarmi pawl kan zoh tikah Bawi Jesuh cu Pathian hmin in a ra mi, David fapa a si, Israel Siangpahrang a si tiah an lawm an thangṭhat ciamco nak kan hmu ih cumi hnu ni rei lo te ah cumi mipi pawl in ‘thinglamtah par ah that aw, thainglamtah par ah that aw,’ tiah an au ciamco lala ih an thatnak khal kan hmu. A thok ah cu a cahnak le a thil ti theinak pawl an hmu an thei ruangah an uar zet ih an lawm ciamco. Asinan ralkap pawl in an vum kai ih an hrem mi an hmu tikah zo hman in a lam ah an ṭang ngam nawn lo, a dungthluntu pawl hman in an ṭih in an tlan san ta. Rualpi ṭha le ṭha lo ih harsatnak ton caan ah thei theih a si an si ṭheu vek in Pathian kan zum le kan duhdawt taktak maw ti hi harsatnak kan tong caan ah fiang deuh in kan thei thei ṭheu a si. Ziangtinkim kan sinpi caan ah ‘Bawipa a ṭha tuk e, Bawipa cu kan ziangkim a si e, Bawipa ka lungawi tuk,’ tihi a ol te a si. Asinan kan dam lo caan, harnak le riahsiatnak kan tong caan, le kan sinpi lo caan tivek ah Bawipa a ṭha kan ti thei pei maw? Bawipa kan rinsan, Bawipa kan duhdawt, kan ti thei pei maw? Bawipa ih dungthluntu ṭha taktak kan si le cu, kan lungawi caan ah siseh, kan riahsia caan ah siseh, Bawipa kan duhdawt thei ding ih kan tan san dah lo ding a si. Ziangtik caan poh ah siseh Bawipa a rinsan theitu, Bawipa a duhdawt thei tu le Bawipa lam a ṭang ringring theitu si ding in zuam u si tiah a pakhatnak ah ka lo forh duh a si.

Cun a pahnihnak ah, ‘Bawi Jesuh zoh in thazaang lak aw’ tiin thlarau thazaang lo pek hai ka duh. Ninghang, riahsia, vansang le beidong in na um maw? Hitivek in harsa in kan um caan ah kan Bawipa Jesuh kha zoh uh si. Kan Bawipa Jesuh a nun sung ah, thinbang in, riahsia in, kawlṭong mal lai kan hlang pei ih a-ṭhi-cian zet in le bawmtu nei lo vek in a khan-saa caan hi a rak um ve dah a si. Tuni Saam hla sungih kan hmu mi vek in, ‘Ka Pathian, Ka Pathian, ziangahso i tlansan,’ tiah thinglamtah parin a rak au ruangro ve dah a si. Cutiih a au nak kan zoh a si le ziangtlukin a tuar ti hi kan thei thiam cio ko ding. Kan nih khal Bawi Jesuh vek in kan nun sungah vei tampi mi ih tlansannak, lunglengnak, le bawmtu nei lo vek ih kan um caan, kan khan-saa caan a um ve ṭheu ding. Bawi Jesuh thinglamtah phur in Calvary tlang lam a pan rero lai ah a tha cem in vei thum tiang a tluk vek in kan nun sung ah thanau in kan tluk caan tampi a um ve ding. Hitivek in harsatnak kan tong ih kan tluk caan ah kan Bawipa Jesuh Khrih kha zoh in thazaang lak sal uh si.

Bawi Jesuh cun tawk seh ka ti thei nawn lo tiah a cawl ta men lo. Thincem in dung a sip lo. A tluk nan a tho sal ih a cem net nak tiang a feh ṭenṭo a si. Duhdawt mi nu le pa u le nau pawl, kan tluk caan tampi a um ko ding. Thosal u si, beidong lo in hmai nor in feh vivo ko uh si. Kan Bawipa thawn thinglamtah phur tlang in a cem net nak tiang feh tlang uh si. Nehnak in kan hmai in in hngak a si. Kan Bawipa kan zoh pei ih thazaang kan lak tlang cio pei.

Fr. Peter Lal Zin Thang (Hakha Diocese)