Bawipai Thi le Sa cu Mithianghlim pawl hrangah laksawng a si lo; Asinain, misual pawl hrangah nunnak Sang a si. June 6, 2021

Bawipai Thi le Sa cu Mithianghlim pawl hrangah laksawng a si lo; Asinain, misual pawl hrangah nunnak Sang a si.

June 6, 2021

          Pope Francis in Bawipai Thi le Sa puai ni a tuah lai ah zumtu pawl hnenah Pathian ih laksawng a si mi Bawipai Thi le Sa cu cohlang dingah le kan nunram ah laksawng ih tuah dingah in rak sawm. Italy ram ah siseh, a dang ram pawl ah siseh Bawipai Thi le Sa puai tuah tikah Pope Francis in Bawipai Thi le Sa ih laksawng thuhla a rak ruat ih zumtu pawl hnenah Bawi Jesuh vekin an nunram cu laksawng ih nunpi dingah a rak sawm. Angelus thlacamnak cam dingah St. Peter tualrawn ih a tongkhawm aw tu mipi le Social media in a cuan tu pawl hnenih a sim lai ah Pope Francis in netabik zaanriah ei puai ih thilcang (Mk 14:12-16, 22-26) sungta tarlang phah in a rak ruat.

          Pathian ih tongkam pawl le a nuntu ziaza pawl in kan thinlung a pem. Sang cu a lak ih lungawi thu a sim hnu ah a dungthluntu pawl hnenah ‘la uh la ei uh. Hi mi cu kan taksa a si’ ti mi cam nak thawn Bawi Jesuh in tirhsiannak le hlawmawknak cu tangdornak nuntuzia le a tum bik mi Sacrament in pek’ tiin Pope Francis in fel fai zet in a rak sim.

A tha bik mi cu riantuan tu si ding hi a si

          Bawi Jesuh in a nunram ih neta lam ah ‘mipi cawm dingah Sang a rak zem lo. Asinain, dungthluntu pawl thawn netabik zaanriah ei nak ah a taksa a phel nak in nunram ih tumtahnak cu a mah le a mah a ap awk nak a si ih ‘a tumbik mi cu rian tuannak a si’ tiin Bawi Jesuh in in rak hmuh. Duhdawtnak le hlawmawknak pawl thawn a khat mi tangdor mi, Sang phel ah Pathian ih thatnak ziangtin theih a theih ding ti ruah sal nakah Pope Francis in Bawi Jesuh ih netabik zaanriah ei puai ah hmuk vek in a siat ol, a kuai ol. Asinain, a ralthatnak cu cui hmun ah cu vek thotho in a um’ ti mi ‘a no’ ti mi cafang a rak sim fiang.

Nunnak petu duhdawtnak ih thazaang

          Bawipai Thi le Sa ih thatnak cu thazaang a si. Mah le mah cohlang thei dingah le tih lo dingah mah le mah a fa te mi duhdawtnak ih thazaang, kan lungrualnak ih tel dingah mah le mah a suak ter tu duhdawtnak ih thazaang a si’ tiin a rak sim. Pope Francis in Bawipai Thi le Sa ih thatnak in a dang thazaang a can ter mi a sim mi cu ‘sualnak a tuah tu pawl duhdawt thei nak thazaang a si’ tiin a rak sim bet.

          ‘Bawi Jesuh in a mah le a mah a ap awk hlan te ah nunnak Sang in rak pek ta. A mah cu a thinlung sungih a thuk bik mi natnak a tuar lai ah a tumbik mi laksawng in rak pek. A mah thawn a ei tlang tu a dunthluntu, Sang cu a bang aw mi pakaan sungih a mah thawn a ei tlang tu in Bawipa a rak zuar.

Siatnak cu thatnak ih lehrulh ding.

     A mah a phatsan tu ruangih a cang mi harsatnak pawl cu Bawi Jesuh in siat nak cu that nak tamsawn thawn a rak rulsal. ‘A mah in Judah ih el nak cu zaangfah nak ih a cohlannak thawngin a rak rul kir sal. A mah in misual pawl cawhkuan a pek lo ih hlei ah misual pawl hrangah a nunnak a rak hlan. Kan nih in Bawipai Thi le Sa kan san tikah Bawi Jesuh in cu vek in a tuah.

          A mah in in thei. Kan nih khal sual nei mi kan si ih sualnak tampi kan tuah ti a hmu theh. Asinain, kan nunram ih um thei dingah ziangtik hmanah a bei a dong dah lo. Bawipa cu Mithianghlim pawl hrangah laksawng a si lo; Asinain, misual pawl hrangah Sang a si ti langternak ah Pope Francis in ‘nunnak Sang kan co tinten Pathian in kan thanau nak palw ah duhsan thar telh sak dingah a rat thu a rak sim.

          Zumtu pawl hnenah an thanaunak pawl cu Pathian thawn tuar tlang dingah a rak forhfial. Pathian ih zaangfah lainatnak cun kan harsatnak pawl a tih lo thu ralrinnak a rak pek.Cui hlei ah a mah in in dam ter thei lo mi thanaunak pawl ihsin duhdawtnak thawn in dam ter. In nat ter tu natnak pawl, midang pawl thawn mah le mah hlat awk nak, mah le mah thinnum lo in remdaihnak um lo ihi tahnak pawl ihsin in dam ter tiah a rak sim.

Bawipai Thi le Sa in Bawi Jesuh thawn in pehtlaih awk ter

          Pope in thu a sim nak ah ‘Bawipai Thi le Sa in Bawi Jesuh thawn in pehtlaih awk ter ruangah in dam ter thei. Cu mi cu kan Bawi Jesuh ih nuntu ziaza vek in cawng in siatnak cu that nak thawn rulkir sal dingah unau pawl hnen seu in a pe thei. Pope Francis in Pathian thu a si nak ih a cemnet nak ah Pathian in kan mah cu kan thinlung sungin a leng ah pot in midang ih thanaunak pawl tangdor nak thawn cohlang thiam dingah thazaang in pek.

          Pathian in in tuah vek in-hi mi cu Bawipai Thi le Sa ngaingai a si. Midang pawl duhdawt dingah le an sambaunak pawl bawm dingah, in duhdawt ih kan kim lo nak pawl ihsin in dam ter thei tu Bawi Jesuh cu sang cio uh si.‘Pathian ih Nu in Bawipai Thi le Sa ih thluasuah pawl cohlang thei dingah le kan nunram ih laksawng ah tuah dingin in bawm hram seh’ tiah Bawinu ih bawmnak dil in a thusim a rak cawl.  Hi thuthang cu Vatican thuthang ih kan ngah mi a si.

https://bit.ly/3pANBUB