Nitin Thuthangtha (His Excellency Bishop Felix Lian Khen Thang - Kalay Diocese) ih sim mi Thuthangtha

Gospel Cathianghlim

Lk 16: 19 - 31

¹⁹“Voikhat ah milianzet pakhat a um ih hnipuan mankhung bik in a thuam aw ih nitin rawl thawthaw ei in nuam zetin a nung. ²⁰Lazaras an timi mi farahzet pakhat a um ve ih a pumpuluk in hma a khat ṭheh.

²¹Milian pa ih cabuai ihsin a tlami rawl ṭilfuan sar dingah milian pa ih saangka ah an hruai ṭheu. Uico an ra ih a hma cu an ra liak ṭheu.

²²Mifarah pa cu a thi ih vancungih rawl ei-nak puai ah Abraham kiangih to dingah vancungmi pawl in an fehpi. Milian pa cu a thi ve ih an phum;

²³cule Hell sungah a tla ih harzet in a tuar. Cuphah in tlunlam a hun zoh ih lamhlatzet ah Abraham le a kiangih Lazaras kha a hun hmu.

²⁴Cule a au ih, ‘Ka pa Abraham, i zaangfah hram aw. Lazaras kha fial awla a kutzung kha tidaiah hnim sehla ka lei daiter dingah ti i run forhseh; ziangah tile hi meisa sungah ka tuar a har tuk a si!’ tiah a ti.

²⁵Sikhalsehla Abraham in, ‘Ka fapa, vun ruat hnik! Na nun sungah khan thil ṭha hmuahhmuah na ngah ṭheh zo ih Lazaras cun thil ṭha lo lawnglawng a co. Asinain atu-ah cun anih cu hitawk ah hin nunnuam in a um ih nang cu harnak na tuar a si!

²⁶Cuih tlunah kan karlakah kawhrum tluan thukpi a um ih curuangah hitawk ihsin na hnenah rat a duhmi zohman an ra thei lo ih na umnak ihsin kan umnak khalah hin rat duhtu an um khal le an ra thei lo a si,’ a ti.

²⁷Cutikah milian pa cun ‘Cuti a si ahcun, maw ka pa Abraham, ka pa ih inn ah Lazaras kha hei thlah hram aw.

²⁸Cutawkah unau panga ka nei. Lazaras kha va feh sehla annih tal cu hitawk tuarnak hmunah hin an ra thlen lonak dingah ralrinnak va pe seh, tiah zaangfah ka dil a si,’ a ti.

²⁹Abraham cun, ‘Na unau pawl ralrinnak petu dingah Moses le profet pawl an um a si. An simmi kha rak ngai haiseh,’ a ti.

³⁰Milian pa cun, ‘Ka pa Abraham, cuti lawng cun a tawk lo. Mi pakhat thihnak ihsin a tho ih an hnen a thlen ahcun an nunsualnak cu an ṭhin ding,’ tiah a ti.

³¹Sikhalsehla Abraham cun, ‘Moses le profet pawlih thu an ngai duh lo a si ahcun mi pakhat thihnak ihsin tho hmansehla an lung duh cuang lo ding,’ a ti,” tiah Jesuh in a sim.