Maria bangin Bawipa ih tongkam ngai in Martha vekin kan nunah a takin nuncilh uhsi.

Martha le Mary tei unau thuanthu (October 8, 2019)

Siarding: Jonah 3:1-10; Ps. 130:1-4, 7-8; Lk. 10:38-42.

Tuisun kan siarmi Thuthangtha cu Martha le Maria tei unau hnenih Jesu a va lennak thu a si. Himi thu hi fiang deuh ih kan theih theinak dingah malte kau deuh ih zoh ta uhsi. Martha le Maria tei unau tahthimnak hlan deuh ah Samaritan mitha thu kan siar.

Mt 22: 36 ah Daan thiam pakhat in Bawipa Jesu ih hnenah "Thukham lakih a tumbik cu ziang a si? A tumbik thupek" ti ih a suh tikah Jesu in "Pathian duhdawt ding le innhnen duhdawt ding" thu a si tiah a sawn. Cui duhdawtnak thukham cu Samaritan mitha thuanthu (Lk. 10:25-37), le Martha le Mary tei unau thuanthu (Lk. 10:38-42) ah famkim in kan hmu thei. Samaria mitha thuanthu ah innhnen duhdawt ding thu fiang zet in kan hmu ih Mary ih umtudan ah Pathian duhdawt ih thupitzia a langter.

Tuisun kan siarmi thuthangtha, Martha le Mary tei' unau thu lam ah feh thlang uhsi.

Kan Bawipa Jesu cu Martha le Mary tei inn ah a leng. A dungthluntu pawl thawn khual tlawng ih feh in a lang nan, Martha le Mary tei inn ih va leng cu a mah lawng ti in kan Bible cun a tar lang. Himi ah kan Bawipa cu Judah pawl ih nunphung thlun lo in, a pahbal in kan hmu. Ziangah ti le mipadang tello in amah lawng nunau pawl hnen ah a leng. Mai sungkhat hnenih va len cu a poi lo nan, sungkhat silo, mihran nunau hnen ih mipa dang tello ih mah lawng va len hi an nunphung a si lo. Cui tlunah cui nunau pawl ih umnak inn ah thu a zirh. Cucu tuisun ah Jesu ih tuahmi a rak si ngelcel. A sullam cu Jesu ih phuanmi rundamnak cu nunau mipa ti umlo, phunhnam theidan umlo in zocio hrangah a si ti, langter a duh ruangah a si.

Martha tei unau cun innleng an neih ruangah anmah le an ti thei tawk in an mileng cu an rak zoh tha. Martha khalin an mai tul a ti daan in mileng cu a rak tuamhlawm ih Mary khal cun amai tul a ti daan in a rak tuamhlawm ve. Asinan, an unau hnih in tul an ti daan cio an bang aw lo. Martha cun a inn lengtu cu a ril a rawng pang ding maw, ti in ei le in a tawlrel nan Mary cun a inleeng thawn caan pe in a um. Zo cio an mai tul an ti daan vek ih an rak zohthatnak ah thubuai ziang khal a umlo.

Thubuai a si aciah lo nan, thubuai vek ih a ra lang a um ih cucu khuitawk in a thok ti le, Martha in "Mary cu hnatuan ii bawm lo, ii ra bawm seh" ti ih a mawh thluknak in a thok. Mai hnatuan cio cu thupibik ih kan ret tuk nak ah midang ih hnatuan cu thupi in kan ruat nawn lo. Cutikah kan mawh thluk. Kan zir dingah, midang ih hna tuannak khi a va poisakpi, thupi ih ruahsak kan tum dingih an tlaksamnak a um pang a si le, mawhthluk loin bawm le sawmdawl kan tum ding.

Martha cun "Ka mileng cu ziangha ka pek ding" ti ah a caan a hmang ih Mary cu "Ka mileng hnen ihsin ziangha ka ngah thei ding" ti ah a caan a hmang. Bawipa Jesu ih dinhmun lam ihsin kan zoh a si le Martha hnen ihsin angah ding lam a si ih Mary hnen ahcun a pek ding lam a si. Minung mit ih zoh ahcun innteek lam in a thabik ih kan rak "pek" ding lam a si. Asinan, tu cu mi menmen siloin "Pathian fapa" a si tikah anih cun "Ngah lam hnak in pek lam ah" thluasuah a um sawn a ti kha (Acts 20:35). Cui tlun ah "a mai nunnak hman pe ding in a ra" (Mk 10:45).

Kan Bawipa kan bek dingmi lak ih a thinlung a tawng tu bik cu mei-ur thawinak hnak in a kekkuaimi thinlung (Ps 40: 6-9) a si sawn. Bawipa ih duhzawng cu a thu ngai ih thlun a si. Tu ah Mary cun Bawipa ih thu ngai dingin a pek awk nak kan hmu. Curuangah "a tha deuh a hril ngah" zo.

Samaria mitha thuanthu thawn kan zoh tlang a si le Martha ih tuah le tuannak pawl hi dem ding ziang hman a um lo, a thatuk law law, a fuh law law, lawm tlakzet a si. Sikhalsehla Bawipa cun a lawm danglam cuanglo ih a mawhthluk ve cuang lo. Amahlawngte, a hril mi hnatuan kha tha tein ruat sal dingah a sawm.

Duhdawtnak thawi thiltha tuah ti hi a thupi tuk ko nain himi lawng thuthangtha a si cuang lo. Thuthangtha cun a huap kau tuk. Pathian zumtu kan sinak le Jesu thluntu kan sinak ih a muril cu kanmah bulpak cio le Pathian kan pehtlaih awknak hi a si. Pathian thawi pehtlaih awknak kan neih lo ahcun Pathian kan zum man le Jesu dungthluntu kan si man a tangkai lo.

Vei tampi cu Pathian hnatuan ah kan buaituk ih amah Bawipa thawi umtlang ding le Bawipa ih hrangih caan pek ding hman kan theih hngilh pang theu. Tuah minung sinak taksa le ruangrai thawn Bawipa thawn tlangleng tlang thei kan si lo tikah Bawipa thawi kan komawk theinak bik cu "thlacamnak" hi a si. Thlacamnak thawngin Bawipa thawi a komaw theutu pawl hrang ahcun an hnatuan buainak in Bawipa thawi an komawknak a pelhsolh ter lo. Midang thawi kan duhdawt awknak langtertubik cu a hrangih hnathatuan hi a si. Cui hnathatuannak cu thlacam saknak le a tulsam mi poisak pinak a tel lo asi ahcun duhdawtnak diktak a sit i a theih lo ding. Jesu in Martha ih hnenah "thil tul zetmi pakhat a um" a ti. Jesu hnen ihsin a tongkam kan ngai ngah hnu lawngah a dang a luangsuak vivo ding mi a si sawn.

Maria ih dinhmun kan zoh a si le Bawipa a ra thlen ve ten Bawipa ih ke hramah caan a hmang. "A kehramah a um" ti cu a thlun ngaingai timi langternak ih an rak hman theu mi tongfang a si. Curuangah Bawipa ih "ke hram" ih caan a ahman daan in, Maria cu Bawipa thluntu ngaingai a si ti a langter.

Mi inn ah fehin rual le pi pawl kan va len caanah, innteek ka rualpi cu kan hnenah ra lo in amai hna tuan men sehla nuam kan ti lo zet ding, "ka ra len hi hnaihnoknak ka lo pe sawn maw" ti ah kan mah le mah hman thu kan ruat ding. Tisa in awmsak ih lakphak in tuahsak tikah "hna in tuan san" ti in kan ruat cuang lo. Ei le in thawi in rak zohthatnak hnakin kan kiangah to in thunuam kan rel tlangnak ah nuam kan ti, manhla kan ti sawn theu. Midang parih "poisakawknak - kazuhsaih" kan nei kan timi hi an hrangih thiltuah lawng siloin an "aw ngai" hi a thupi zet.

Europe hmunpi a dinsaltu ti-ih ruahmi, Europe pawl ih an pa tluk ih an ruahmi, (AD 480-547) ih san a rak hmangtu mithianghlim Benedict cun Christian nunzia cu "thlacamnak le tuah tuannak - Ora et Labora" ti in a rak ko. Cui nun cu tuini Martha le Maria tei unau ah kan hmu ih Pathian hna kan tuannak le Bawipa ih dung kan thlunnak ah zohthim ding thazet an si: Maria bangin Bawipa ih tongkam ngai in Martha vekin kan nunah a takin nuncilh uhsi.