Jesuh ih Thlacam Sakmi Kan Si (sim tu - Rev. Fr. Lucas Tha Ling Sum) May 19, 2021

Jesuh ih Thlacam Sakmi Kan Si

Thuthangtha sim tu - Rev. Fr. Lucas Tha Ling Sum 

May 19, 2021

Siarding: Tirh. 20: 28-38; Saam 68: 29-30, 33-36 (33); Jn 17: 11-19.

          Zumtu u le nau, Pathian in thlawsuah lo pe hram seh tiah Falam RVA ihsin thlaza ka lo camsak a si. Tuttum ah “Jesuh ih Thlacam Sakmi Kan Si”, timi thu ka lo hlawm duh a si. Hmaisa ah Baibal kan siar ta pei.

          Jn 17:11-19 “Cun a tu ah na hnenah ka ra ding; kei cu leilung ah ka um nawn lo ding, asinan annih cu leilung ah an um hrih ding. 

          A thiang mi ka pa, nangmah le keimah cu pakhat kan si vekin leilung ih a um hrih mi pawl cu pakhat an si theinak dingah i pek mi na hmin ih huham in humhim hai aw. An hnenih ka um lai ah nangmah ih I pek mi na hmin ih huham in ka hum hai a si. Cathianghlim sungih a um mi kimnak dingah a hloral ding rak si cia mi pakhat dah tilo cun, mi pakhat hman an hloral lo; ka humhim ttheh a si. Atu cu na hnenah ka ra thlang ding; leilung tlunah hi thu pawl ka simnak cu ka lungawinak kha an thinlung sungah famkim zet ih an neih theinak dingah a si. Keimah cu hi leilung ih ta ka si lo vek hin an nih khal hi leilung ih ta an si ve lo; curuangah na thu cu an hnenah ka sim tik ah leilung in a huatnak a si. Anmah kha leilung in a huatnak a si. Anmah kha leilung ihsin lasuak aw tiah ka lo dil lo, asinan a ttha lo mipa hnen ihsin humhim aw tiah ka lo dil a si. Kei cu leilung ih ta ka si lo vekin an nih khal leilung ih ta an si ve lo. Annih cu na hnenah thudik in thianter hai aw; na ttong kam cu thu dik a si. Kei hi leilung tlun ih I thlah vek in annih khal ka thlah ve a si. Anmah tla thudik ih thianter an si theinak dingah keimah khal ka thiang ter aw zo a si.”

          Zumtu u le nau, Bawi Jesuh in a dungtlun tu pawl cu a phunphun in, tthimnak ah mangbangza a phunphun tuahnak in siseh, tahtthimnak tampi hmang in siseh, aw kam le ziaza in siseh, tampi thu a zirh a si. Asinan, mitu ih kan Baibal Cathianghlim siar mi sungah ziang mi kan hmu thei asilen Bawi Jesuh ih a dungthlun tu pawl cu thu lawng zirh lo in thla khal a camsak a si, timi fiangten kan hmu. Bawi Jesuh cu ziangcaan ah, zianghrangah thla a cam?, timi ruah bet hrih uh si.

          A pakhatnak ah, Bawi Jesuh in ziangcaan ah a dungthlun tu pawl ih hrangah thla a cam a si timi zoh hrih uh si. A dungthlun tu pawl khua zakip ah feh ih thutthangttha sim dingih a thlah caan ah thla a camsak a si. Hi tin Jesuh in a Pa ih hnen ah a sim: “Kei hi leilung tlun ih I thlah vek in annih khal ka thlah ve a si.” Zumtu u le nau, Bawi Jesuh ih a thutthangttha sim tu pawl thlah tik ah a thlah menmen lo. Thla khal a camsak a si, timi kan hmuh. 

          Cun a pahnihnak ah zianghrangah thla a cam timi kan zoh bet a silen a thupi pathum kan hmu thei. Cumi cu ziang an si? 

1. A thlah mi pawl pakhat a si theinak dingin, timi a si. Hitin a pa-ih hnenah thla a cam: “A thiang mi ka pa, nangmah le keimah cu pakhat kan si vekin leilung ih a um hrih mi pawl cu pakhat an si theinak dingah i pek mi na hmin ih huham in humhim hai aw”, a ti. Zumtu u le nau, thutthangttha sim tu le zirh tu dingih thlah mi zaten, pakhat le pakhat, hua aw le simsia aw loin, thinkhat lungkhat teih thuthangttha phuang ih uum thlang thei ding hi, Jesuh duh mi le thlaza cam mi a si.

2. A pahnihnak ih Jesuh ih thlacam mi cu a thlah mi pawl khuavang kut sungih tla lo ding in, timi a si. Bawi Jesuh in a pa ih hnenah hitin a dungtlun tu pawl hrangah thla a cam: “Anmah kha leilung ihsin lasuak aw tiah ka lo dil lo, asinan a ttha lo mipa hnen ihsin humhim aw tiah ka lo dil a si.”

3. Cun a pathumnak ih a camsak mi cu a dungthlun tu pawl ih thianhlimnak ding hrangah a si. Hitin thla a cam: “Annih cu na hnenah thudik in thianter hai aw”, a ti. 

          Zumtu u le nau, tikholhnak sacrament kan ngah veten rundamnak thuthangttha phuang dingin Jesuh ih thlah mi kan si ve a si. A dung thluntu pawl pakhat an si theinak dingin siseh, khuavang kut sungih an tlak lonak ding hrangah siseh, thudik ih an thianhlim theinak ding hrangah siseh, thla a camsak vek in Bawi Jesuh in thla in camsak ve a si.

Thuthangttha ngai tu nan zaten, Pathian in thlawsuah lo pe hram seh. Amen.