Rian mi le Rian tu (sim tu Rev. Fr. Lucas Tha Ling Sum) May 26, 2021

"Rian mi le Rian tu"

Thuthangtha sim tu Rev. Fr. Lucas Tha Ling Sum

May 26, 2021

Siarding: Sir 36: 1, 4-5, 10-17; Saam 79: 8, 9, 11, 13; Mk 10: 32-45

          Zumtu u le nau, Falam RVA ihsin a thar in cibai ka lo buk a si. Pathian in remdaihnak lo pe hram seh. Tuittum ih ka lo hlawm duh mi cu “Rian Mi le Rian Tu” timi thu a si ding. Hmaisa ah Baibal Cathianghlim ngai ta hrih uhsih. A tawi zawngin Mka 10:35-45 ta lawng ka ron siar ding.

          “Cule Zebedi ih fapa James le Johan cu Jesuh hnenah an ra ih ‘Sayapa, thil pakhat in tuah sak hram dingah kan duh, tiah an ti. Jesuh in, ‘Ziangso nan duhmi cu a si?’, tiah a sut. An nih in a sunglawimi na uknak sungih na bawi tohkham parih na to tikah na kiangah in toter ve hram aw; pakhat na vorh lam ah, pakhat na keh lam ah, tiah an ti.

          Jesuh cun an hnenah, ziang kan dil tihi nan thie lo. Ka in dingmi tuarnak khuathai hi nan in thei ding maw? Baptisma ka lak vek rori in nan la thei ve ding maw?’ tiah a sut. Annih in, kan ti thei ding, tiah an let. Jesuh in an hnenah, Ka in dingmi khuathai hi nan in thei ngai ko dingih batisma ka lak vek in nan la thei ve ko ding. Sikhalsehla ka vorhlam le ka kehlam ih totu ding hril thei nak cu keiih thu a si lo. Pathian in hi hmun cu a timtuah sak cia mi pawl hnenah a pe ding a si, tiah a ti.

          Cuih thu cu dungthluntu dang pahra pawl in an theih tikah James le Johan parah an thin a heng ngaingai. Curuangah Jesuh in an zate in a ko khawm ih, leitlun ram uktu pawl cu an ukmi pawl kha an lal-hawh ih an hotu pawl tla cu thu an nei nasa ti cu nan thei. Asinan nannih lakah cun hibangtuk cun a si lo pei. Nanmah lak ih pakhat in, a tum bik si a duh ahcun nan zate riantu a si pei. Nanmah lakah pakhatnak si a duhtu cun nan zate sal a si pei. Ziangahtile Milai Fapa hman hi, rianmi si lo in miriantu si dingah le mi tampi tlen dingah a nunnak pe dingin a ra a si, tiah a ti.”

            Zumtu u le nau, mi tu ih kan theih vek in Zebedee ih fapa John le James hi Bawi Jesuh hnenah an feh ih hi tin an dil: Vancung uknak ramah  na vorh lam le na ke lam ah in to ter aw, an ti. Dungtluntu dang pahrah pawl ih hi thu an theih tik ah James le Johan ih parah an thin a heng ciamco. James le Johan an nah sik a si ding, tiah zum a um. Bawi Jesuh ih vorh lam le keh lam ih to ngah an duh ve a si ding tiah zum a si. Bawi Jesuh in James le Johan ih parah an thin a heng a si, timi a thei ruangah an zaten a ko khawm ih hi tin thu a zirh: “Nanmah lak ah pakhat in a tum bik si a duh ahcun nan zate riantu a si pei. Nanmah lakah pakhatnak si a duhtu cun nan zate sal a si pei. Ziangahtile Milai Fapa hman hi rianmi si lo in miriantu si dingah le mi tampi tlen dingah a nunnak pe dingin a ra a si, tiah a ti.”

            Zum tu u le nau, leitlun mi kan si vek in dinhmun ttha le dinhmun sang hi kan duh ciau. Kan hawl ciau a si. Cuti asilen ziangtin cu mi dinhmun cu kan ngah thei pei? Bawi Jesuh ih a dungtluntu pawl hnen ih a zirh mi cu, mi rian uh, riantu si zuam uh. Kei khal rianmi si loin, miriantu ah si ka rat a ti. Curuangah a tthabik lamzin cu mi zawnruahthiam nak le mi riannak a si, timi hi tuittum ah Bawi Jesuh in fiang ten in zirh a si.

            Thuthangttha ngai tu nan zaten, miriantu si thei dingin Pathian in thlawsuah lo pe hram seh. Amen.