"Tangdornak cu Vancungram thlennak lamzin a si" ti’n Assumption Puaipi ni ah Pope Francis in sim

"Tangdornak cu Vancungram thlennak lamzin a si" ti’n Assumption Puaipi ni ah Pope Francis in sim

August 15, 2021

            Pope Francis in August 15 ni, Nu Mary Vancungah ruangpumpi thawn hruainak a ngahnak Puaipi ni ah St. Peter tualrawnpi ah Angelus thlacamnak neitlang dingih a ra pumkhawm mi pawl hnenah “Pathian in mahlemah tang a dor tu pawl a khaisang theu a si” ti’n ralrinnak a rak pek. 

            “Tuini, Nu Mary vancungih hruainak a ngahnak kan zoh tikah, tangdornak cu vancungram thlennak lamzin a si” ti’n kan ti thei. Jesuh Khrih in: amah le mah tang a dor tu cu khaisan a si ding ti’n in zirh (Lk 14:11). Pathian ih in cawisan hi kan thiamnak  pawl ruangah a si lo, kan lennak  ruangah khal a silo,  thatnak maksak kan tuahmi ruangah khal a si cuanglo; kan tangdornak ruangah a si sawn theu” ti’n Pope Francis cun a sim.

            Cuihleiah, “zumtu Khrihfa pawl hrangah thinlung sungih mi farah si ding hi a thupi tuk; thinlung sungih mi farah kan ti tikah Pathian a tul ringring tu kan si ding hi a thupi tuk tinak a si. Mah le mah lawng a ruat awk mi le maih hrang lawng ruat pawl ih nun ah Pathian in hmun a luah thei hrimhrim lo. Kanmah le kanmah kan ruahawk tuk caan hi a tam theu. Cuvek tikah kan nun ah Pathian a tlem thei lo. Hmansehla, tang a dor mi pawl cun an nun ah thil maksak cang suak dingin Pathian hrangah lamzin an on theu a si” ti khal in a sim bet. 

            Cule Pope in a ra pumkhawm tu pawl hnen ah, mah le mah vun cek awk that ding a sawm: “tangdornak hi ziangti’n kan hmu? midang ih upat sunloih ding le kan thil ti theinak lang ter ding men in kan cangvai maw? a silo le, midang rian ding thinlung thawn ha kan cangvaih? Mary vek in thungaitu si kan tum maw, a silo le, a ttongtu si ding le milar si ding lawng ha kan tum? Mary vekin ttong lo te’n dai teih um kan thiam maw, a silo le, mi biak ding lawnglawng ha kan tum? Midang thawn ttong el awk duhlo ah dungsip kan tum maw, a silo le, mi nehtu si ding lawnglawng ha kan tum?  timi pawl kan vun ruat that hnik pek” ti’n Pope in a thusimnak ah mipi pawl a sawm hai. 

            “Minung cu kan mit in latu thil hi kan uar zet theu; hmansehla, Pathian cun lenglam hnak in sunglam sawn a zoh; kan thinlung in zoh ih mi tangdor pawl par ah a lung a hmui. Mary ih thuthup khal cu tangdornak hi a si bik” ti khal in Pope cun a sim.

            Cun, biazai thiam zet Dante ih ‘sersiammi dang hnakin tang a dor sawn mi le cawisan sawn mi’ ti’n Mary thawn pehpar ih a rak ngan dahmi ruat phah in Pope Francis in, “san thuanthu sungah sersiam mi lak ih tang a dor bik tu le cawisan a si bik tu, ruangpum le thlarau thawn a sinak pumhlum in vancungram a congah hmaisabik tu hi leitlun a hringnun tam sawn cu mizaran dinhmun in anmaih innsungsang te ah  tangdornak thawn caan a rak hmang khiokhi timi te hi ruah ding tha zet pakhat a si” timi thu khal Pope Francis in a sim. 

            Cuihsin, Angelus thlacamnak an theh zawngah Taliban hriamhrei kai pawl ih uknak an lon ngahnak Afghanistan ram hrang ah le, linghnin ruangah a malbik minung 304 hrawng an thihnak Haiti ram mipi pawl hrangah thlaza cam sak dingin mipi pawl hnenah sawmnak a hlan ta. 

Source: CNA, August 15, 2021

https://bit.ly/2W5Lr4R