"A hlomi Tuu ruun" (sim tu Rev. Fr. Lucas Thang Ling Sum) July 7, 2021

A hlomi Tuu ruun

Thuthangtha sim tu Rev. Fr. Lucas Thang Ling Sum 

July 7, 2021

Siarding: Gn 41: 55-57; 42: 5-7a. 17-24a; Ps 33: 2-3. 10-11. 18-19 (22)/ Mt 10: 1-7

            Zumtu u le nau, RVA ihsin lungawi sopar ten kan lo hmuak a si. Pathian in remdaihnak lo pe hram seh. Tuittum ah “A Hlomi Tuurun” timi thu ruat khawm thlang uhsi. Hmaisa ah Baibal kan ngai ta hrih pei.

Matthai 10:1-7. 

            Jesuh in a dungtluntu hleihnih kha hmunkhat ah a ko ih thlarau ttha lo dawi hlo theinak le natnak le damlonak a phunphun damter theinak huham a pek. Tirhthlahmi hleihni ih hmin pawl cu hmaisa bik ah Simon (Peter timi) le a nau Andru, Zebedi ih fapa Jeim le a nau Johan, Filip le Bartholomeo, Thomas le siahkhongtu Matthai, Alfias ih fappa Jeim le Tadias, Phunttan Simon le Jesuh a zuartu Judas Iskariaot tla an si.

            Hi hleihnih pawl cu Jesuh in a thlah ih ttha tein thu a cah hai. Zential ramah va feh hlah uh, la, Samaria khuasungah va lut hlah uh. Cu hnakin a hlomi tuurun Israel mi pawl hnenah nan feh pei. Feh uh la, vancung uknak a nai zo, tiah va sim uh. Mina dam ter uh, mithi thotersal uh, phaarnat a nei mi pawl damter uhla khuavang pawl dawihlo uh. Man lo ih nan ngah mi kha man lo in va pe uh. Nan kordip ah sui tangka siseh, ngun tangka le dar tangka siseh, pai hlah uh. Nan khualtlawnnak lamzin hrangah rawl dilnak ah cawdip siseh, angki hlei siseh, kedam le kianghrol siseh, keng hlah uh. Hnattuantu pa cu a sammi hmuahhmuah pek thluh a si ding. 

Himi cu Pathian ih ttongkam a si. Khrih Jesuh hnen ah tthangtthatnak um seh law.

            Zumtu u le nau, Jesuh thlun tu hi mitampi an um timi kan Baibal sung ihsin kan thei. Asinan, Bawi Jesuh in cumi mitampi lak ihsin mi nung hlei hnih, special in, a hleice in, a hril ih “thlarau ttha lo dawi hlo theinak le natnak le damlonak a phunphun damter theinak ‘huham’ a pek” a si, ti thu kan thei. 

• Ziangruangah minung 12 kherkher a hril a si a si tilen hi nambat 12 in Israel miphun 12 a khih hmuh a si, tiah Baibal thiam pawl in an sim. Cun ni nikhat ah Pathian in Israel miphun hmuahhmuah a finkhawm thluh sal ding a si, timi khal a khih hmuh a si, tiah an sim bet. 

            Zumtu u le nau, Bawi Jesuh ih hi Tirhthlahmi 12 pawl hnenah hitin thu a cah: “Zential ramah va feh hlah uhla Samaria khuasungah va lut hlah uh. Cu hnakin a hlomi tuurun Israel mi pawl hnenah nan feh pei. Feh uh la, vancung uknak a nai zo, tiah va sim uh”, a ti. 

• Ziangruangah Bawi Jesuh in “Zential ramah va feh hlah uh; Samaria khuasungah va lut hlah uh. Cu hnakin a hlomi tuurun Israel mi pawl hnenah nan feh pei” a ti a si pei?

• Bawi Jesuh in mi thlen dan a nei si pei maw?

• Amaih miphun Israel pawl lawng, rundamnak pek a duh si pei maw?, tin thu suhnak tampi a um.

            Bawi Jesuh ih “a hlomi tuurun Israel” a timi pawl hi zo pawl an si pei?. Israel mi pawl lakah hin, thu pakhatkhat ruangah, tthimnak ah sipuazi ruangah siseh, lolen hmin siatnak pakhatkhat ruangah siseh, Isarel misenpi ih hnon mi an um. Cun hrek khat cu biaknak lam ihsin a daithlang mi le a vakvai mi an um. Hi, mi ih hnon mi le biaknak lam ih a vakvai mi pawl hi Bawi Jesuh ih “a hlomi tuurun Israel” a timi pawl an si. Himi pawl Bawi Jesuh ih a hmuh tik ah a thin a nuam lo; a zaang an fak tuk. Curuangah Bawi Jesuh in hi a hlomi tuurun Isarel pawl hnenah vafeh uhla vancung uknak a nai zo, tiah vasim uh tiah, dungthluntu 12 pawl a sim mi a si. Tthongdang ih kan sim asilen a hlomi tuurun Israel pawl hi mipi hnenah rakir sal hai seh, pirpak in um hlah hai seh, thinkhat lungkhat ten pumkhat ah cang sal hai seh, a tinak a si.

            Zumtu u le nau, nang le kei khal a hlomi tuurun Israel pawl vek kan si pang maw? Kan famkim lonak ruangih a hlomi tuu, kan si pang hmanah, thinnau le riahsia in um hlah uh si. Ahlomi tuurun Israel pawl, hawl tu Jesuh in, nang le kei, nitin in in hawl ringring a si. 

            Pathian in a tuurun sungah himdam ten kumkhua in lo kilkhawi hram seh. Amen.