Rintlak Le Rintlak Lo Hnen-um

Lk 12: 39 – 48.

³⁹Cule hihi ciing uh: inn neitu pa in fifir ratnak ding tikcu kha a theih cia ahcun a inn kha a bauhter hrimhrim lo ding. ⁴⁰Cuvekin nannih khal ralringte in um uh, ziangahtile a ra ding tiih nan zum lo laiah Milai Fapa cu a ra thleng ding a si,” a ti.

Rintlak Le Rintlak Lo Hnen-um (Mat 24.45-51)

⁴¹Piter in, “Bawipa, hi tahṭhimnak hi kanmah ih hrangah na timi a si maw, asilole miseenpi hrangah so?” tiah a sut.

⁴²Bawipa in, “Zoso rinsan tlak le a fimmi hnen-um cu a si? Rinsan tlak le a fimmi hnen-um cu a bawipa in a innpi kilkhawitu dingah le a dang hnen-um pawl kha a tikcu caan te ih an covo rawl pe dingah a ret dingmi hnen-um kha a si.

⁴³A bawipa innih a ra kir tikah hna a rak ṭuan rerotu hnen-um cu ziangtluk lungawiza so a si!

⁴⁴Thungai in ka lo sim: cuih hnen-um cu a bawipa in a thilri hmuahhmuah kilkhawitu-ah a ret ding.

⁴⁵Sikhalsehla cuih hnen-um in, ‘Ka bawipa cu a rei hrih ding,’ a tiih hnen-um dang nunau siseh mipa siseh a thawi vivo ih a ei a in ih a riit a bah ahcun,

⁴⁶cuih hnen-um in a ra ding ti a zum lo caan le a theih lo ni ah a bawipa cu a ra thleng ding. A bawipa in a satcip seksek ding ih thulung lo le rintlak lo pawl lakah a re ding.

⁴⁷A bawipa in tuahter a duhmi hnaṭuan a thei nain tiimlaam a tuah lotu hnen-um cu nasa zetih vuak a tong ding.

⁴⁸Asinain a bawipa in tuahter a duhmi a thei lo nain thil pakhat khat a tuahtu hnen-um cu vuak tlak a si khal le dimte deuh ih vuak a tong ding. Tampi a ngahtu hnen ihsin tampi dil sal a si ding. Tam ngaingai pek a si mi hnen ihsin tam ngaingai dil sal a si ve ko ding,” a ti.